تاريحي ارحيتەكتۋرالىق قۇندى ەسكەرتكىشتەردىڭ ءبىرى سانالاتىن گاۋھار انا بەيىتى 1989 جىلدان «ازىرەت سۇلتان» مەملەكەتتىك تاريحي-مادەني قورىق مۇراجايى قاراماعىنا ەنگىزىلىپ, قورعاۋعا الىنعان. ال 2015 جىلى انانىڭ كىشىگىرىم بەيىتىنە «ازىرەت سۇلتان» قورىق-مۋزەيى قايتا كەسەنە تۇرعىزدى. كەسەنە اۋماعى گۇلزارلارمەن اباتتاندىرىلىپ, اعاش كوشەتتەرى وتىرعىزىلعان بولاتىن. تۋريستەر مەن قوناقتارعا جايلى جاعداي جاساۋ بۇگىن دە كۇن تارتىبىندەگى باستى ماسەلەنىڭ ءبىرى. بۇل ورايدا, گاۋھار انانىڭ قابىر جاپقىشى جاڭارتىلىپ, كىلەم مەن قوناقتارعا ارنالعان توسەنىشتەر اۋىستىرىلعان. سونىمەن قاتار, كەسەنە مەن قۇدىق سۋىنا اپاراتىن اياق جول بويىنا ارنايى قۇمىرالار ورناتىلىپ, گۇلدەر قوندىرىلعان, اۋلا تاستاردان تازارتىلعان. «بىلتىرعى جىلى كەسەنەگە كەلۋشىلەرگە ارنالعان اۆتوتۇراق سالىنىپ, اينالاسى تەمىر شارباقپەن قورشالدى. قاۋىپسىزدىكتى ساقتاۋ ماقساتىندا بەينەكامەرالار ورناتىلدى. بيىل اتالعان كەسەنە اۋماعىندا اباتتاندىرۋ جۇمىستارىن جۇرگىزۋ قارقىندى تۇردە جالعاسۋدا», دەيدى گاۋھار انا كەسەنەسىنىڭ قورىقشىسى ورازعالي ساپارباەۆ.
الىس-جاقىننان اعىلاتىن تۋريستەردىڭ لەگى كوپ بولعاندىقتان زاماناۋي تالاپقا ساي قىزمەت كورسەتۋ ورىندارى قاراستىرىلىپ, كەسەنە تۋرالى ءۇش تىلدە جازىلعان اقپاراتتىق تاقتايشا ورناتىلىپتى. سونداي-اق كەسەنە ماڭىنا مادەنيەت جانە سپورت مينيسترلىگىنىڭ قولداۋىمەن ساپار ورتالىعىن سالىپ, تۋريستەر ءۇشىن رۋحاني مەكەنگە اينالدىرۋ كوزدەلۋدە.
تۇركىستان وبلىسى