ايتۋلى كۇنى ۇشقان ۇياسىنا دەگەن سالقار ساعىنىشىن ارقالاپ كەلگەن تۇلەكتەر الدىمەن ۋنيۆەرسيتەت قاقپاسىنداعى «ءماڭگىلىك ەل» تريۋمفالدى اركاسىنا جينالدى. تۇلەكتەر قاۋىمداستىعىنىڭ 25 جىلدىعىنا ارنالعان فورۋم جۇمىسىنا 2 مىڭنان استام تۇلەك قاتىستى.
ۋنيۆەرسيتەت تاريحىندا ەكس-ستۋدەنتتەردىڭ سلەتى تۇڭعىش رەت 2014 جىلى ۇيىمداستىرىلسا, ال تۇلەكتەر كۇنى مامىر ايىنىڭ سوڭعى سەنبىسىندە ءداستۇرلى تۇردە ءوتىپ كەلەدى. وقۋ وشاعىنىڭ ۇجىمى تۇلەكتەر ۋنيۆەرسيتەتپەن تىعىز بايلانىسىن ۇزبەي ۇلكەن ءومىرگە جولداما بەرگەن التىن ۇياسىنىڭ ءاربىر جەتىستىگى مەن جەڭىسىنە بىرگە قۋانىپ وتىراتىنىن ايتادى.
ۋنيۆەرسيتەت پەن تۇلەكتەر قوعامداستىعى اراسىنداعى دانەكەر, ءىس-شارانىڭ ۇيىتقىسى – قازۇۋ تۇلەكتەرى قاۋىمداستىعى. قاۋىمداستىقتى 1981 جىلعى زاڭ فاكۋلتەتىنىڭ تۇلەگى, كونستيتۋتسيالىق كەڭەس توراعاسى قايرات ءمامي باسقارادى. تورالقا قۇرامىنا ولجاس سۇلەيمەنوۆ, مىرزاتاي جولداسبەكوۆ, كەنجەعالي ساعاديەۆ, اقمارال ارىستانبەكوۆا, ارمانجان بايتاسوۆ, الماسادام ساتقاليەۆ, نۇرلان سماعۇلوۆ جانە ت.ب. تانىمال تۇلعالار ەنگەن.
II فورۋمنىڭ ءىس-شارالارىنا ۋنيۆەرسيتەت شاكىرتتەرى, مەملەكەتتىك قۇرىلىمدار, عىلىمي قوعام, بيزنەس-قاۋىمداستىق, قازاقستاننان, الىس جانە جاقىن شەتەلدەردەن كەلگەن سەرىكتەس جوعارى وقۋ ورىندارىنىڭ, قازاقستانداعى ديپلوماتيالىق ميسسيالاردىڭ وكىلدەرى, ۋنيۆەرسيتەت وقىتۋشىلارى قاتىستى.
مەرەكە مەتسەناتتاردىڭ ۋنيۆەرسيتەتكە تارتۋ ەتكەن قۇرمەت تاقتاسىنىڭ تۇساۋكەسەرىمەن باستالىپ, ءال-فارابي جانە ءومىربەك جولداسبەكوۆتىڭ ەسكەرتكىشتەرىنە گۇل شوقتارىن قويۋ ءراسىمىنە ۇلاستى. قوناقتار نازارىنا قازۇۋ جەتىستىكتەرىنەن سىر شەرتەتىن ارنايى فوتوكورمە ۇسىنىلدى.فورۋمنىڭ سالتاناتتى اشىلۋىندا ءسوز العان الماتى قالاسىنىڭ اكىمى باۋىرجان بايبەك مەملەكەت باسشىسى قاسىم-جومارت توقاەۆتىڭ قۇتتىقتاۋ حاتىن وقىدى. قازۇۋ رەكتورى, اكادەميك عالىم مۇتانوۆ, پارلامەنت سەناتىنىڭ اپپارات باسشىسى سەرىك سىدىقوۆ, پارلامەنت ءماجىلىسىنىڭ ۆيتسە-سپيكەرى گۇلميرا يسيمباەۆا, اقىن ولجاس سۇلەيمەنوۆ, ىشكى ىستەر ۆيتسە-ءمينيسترى راشيد جاقىپوۆ, بعم دەپارتامەنتىنىڭ ديرەكتورى ادىلەت تويباەۆ, «Astana Group» كومپانياسىنىڭ پرەزيدەنتى نۇرلان سماعۇلوۆ جانە باسقا دا بەلگىلى تۇلەكتەر ءسوز الىپ, جينالعان جۇرتشىلىقتى اتاۋلى كۇنمەن قۇتتىقتادى.
قازۇۋ رەكتورى عالىم مۇتانوۆتىڭ ايتۋىنشا, الما-ماتەر – وتاندىق ەليتا كادرلاردىڭ باستى «ۇستاحاناسى». بۇگىندە قازۇۋ الەمدىك دەڭگەيدەگى زەرتتەۋ ۋنيۆەرسيتەتىنە اينالىپ كەلەدى. QS جالپى تانىلعان حالىقارالىق رەيتينگتە الەمنىڭ 800 ۇزدىك جوو ىشىنەن 220-ورىنعا تابان تىرەپ, توپ-250 ۋنيۆەرسيتەتتىڭ قاتارىنا ەنگەن. الەمدەگى ەڭ ەكولوگيالىق 200 جوعارى وقۋ ورنىنىڭ جانە تەحنولوگيالىق دامىعان 50 ۋنيۆەرسيتەتتىڭ ساپىنا كىرەتىن وقۋ وشاعى «تۇركى الەمىنىڭ ەڭ ۇزدىك ۋنيۆەرسيتەتى» دەپ تانىلعان.
«تۇلەكتەر كۇنىن تويلاۋ يدەياسى ەلباسىنىڭ «تۋعان جەر» باعدارلاماسىمەن ۇندەسەدى. وتانعا دەگەن قۇرمەت ەلىنە, تۋعان اۋىلى مەن قالاسىنا دەگەن ماحابباتتان باستالادى. تۇلەكتەرىمىزدىڭ ءوزى ءبىلىم الىپ, ستۋدەنتتىك شاعىن وتكىزگەن, الما-ماتەرگە دەگەن ەرەكشە ىقىلاسى – بۇل دا جالپىۇلتتىق ءپاتريوتيزمنىڭ ەڭ ەرەكشە قىرى. ءبىز ەلىمىزدىڭ ەكونوميكا, عىلىم, ءبىلىم, مادەنيەت سالالارىنا قوماقتى ۇلەسىن قوسىپ جۇرگەن تۇلەكتەرىمىزدى ماقتان تۇتامىز», دەپ اتاپ ءوتتى ۋنيۆەرسيتەت رەكتورى.
«مەن قازاقستاننىڭ ەڭ ءۇزدىك جوعارى وقۋ ورنىنىڭ تۇلەگى ەكەنىمدى ماقتانىشپەن ايتىپ جۇرەمىن. الما-ماتەر قۇرىلعان ساتتەن باستاپ دارىندى دا تالانتتى مامانداردى جينادى. قازىرگى تاڭدا تۇلەكتەر ءبىزدىڭ تاۋەلسىز رەسپۋبليكامىزدىڭ دامۋىنا اتسالىسىپ, ەل يگىلىگى جولىندا ەڭبەك ەتىپ كەلەدى», دەدى ولجاس سۇلەيمەنوۆ.
فورۋمدا ۋنيۆەرسيتەتپەن تىعىز بايلانىستى قولداپ قانا قويماي, الما-ماتەرگە دەمەۋشىلىك كورسەتىپ جۇرگەن بىرقاتار ءتۇلەكتەر ماراپاتتالدى. اتاپ ايتار بولساق, «قازۇۋ مەتسەناتى» سەرتيفيكاتتارى مەحانيكا-ماتەماتيكا فاكۋلتەتىنىڭ ءتۇلەگى اسىلبەك قوجاحمەتوۆكە, جۋرناليستيكا فاكۋلتەتىنىڭ ءتۇلەگى ارمانجان بايتاسوۆقا, حيميا فاكۋلتەتىنىڭ تۇلەگى ابدراسيل جارمەنوۆ پەن زەلينا كاترانوۆاعا تابىستالدى.
سونىمەن قاتار ءال-فارابي اتىنداعى قازۇۋدىڭ «ەرەن ەڭبەگى ءۇشىن» مەدالىمەن ولجاس ءسۇلەيمەنوۆ, ەۋرازيالىق گۋمانيتارلىق ينستيتۋتىنىڭ رەكتورى, 1969 جىلدىڭ تۇلەگى امانگەلدى قۇسايىنوۆ, بەلگىلى قوعام قايراتكەرى راحمان الشانوۆ, «ەۋرازيا» ءبىرىنشى ارناسىنىڭ باس ديرەكتورى سەرگەي كيسەلەۆ, «ءبىلىمدى ەل» قوعامدىق-ساياسي گازەتىنىڭ باس رەداكتورى ءلاززات تۇركىستانوۆا ماراپاتتالدى.
فورۋم اياسىندا «ءBىzdىń elıta – ناشا ەليتا» كىتابىنىڭ ءۇشىنشى تومىنىڭ تۇساۋى كەسىلىپ, الما-ماتەر جەتىستىكتەرى تۋرالى فيلم كورسەتىلدى. رەسمي ءىس-شارالار گالا-كونتسەرتپەن اياقتالدى. تۇلەكتەر كۇنى فاكۋلتەتتەردەگى كەزدەسۋلەرمەن جالعاسىپ, قوناقتار ءۇشىن كامپۋس-تۋر ۇيىمداستىرىلىپ, تۇلەكتەر بالى ءوتتى. الماتى