ۋنيۆەرسيتەت رەكتورى ازامات ءتىرىجان ۇلى ەدريسوۆ ءبىلىم ورداسىنىڭ بۇگىنگى بەتالىسىنا كەڭىنەن توقتالدى: «ءبىز حالىقارالىق ستاندارتتارعا ساي ءبىلىم بەرۋ جۇيەسىن جاڭعىرتىپ, ساپالىق دەڭگەيدى ارتتىرۋ ارقىلى الەمدىك ءبىلىم كەڭىستىگىنە ەنە الامىز. وسى ورايدا وقۋ ورنىندا سانعا ەمەس, ساپاعا جۇمىس ىستەۋ ماسەلەسى قولعا الىندى. باستى مەجە – ءبىلىم, عىلىم, ءوندىرىس, يننوۆاتسيانى ۇشتاستىرا وتىرىپ, ينۆەستيتسيا قۇيۋ, وسى ارقىلى مەملەكەتىمىزدىڭ حالىقارالىق قوعامداستىقتاعى بەدەلىن بەكەمدەي ءتۇسۋ.
جوعارى وقۋ ورنى مايتالمان مامان, ناعىز عىلىم ادامدارىن دايارلايتىن ورتا. وسى تۇرعىدا عىلىمي كادرلار ساباقتاستىعىن قامتاماسىز ەتە وتىرىپ, پروفەسسورلىق-وقىتۋشىلار قۇرامىنىڭ عىلىمي الەۋەتىن ارتتىرىپ, تالانتتى جاستاردى عىلىمعا تارتىپ, ماگيستراتۋراعا, دوكتورانتۋراعا تۇسۋىنە ىقپال ەتىپ, جاعداي جاساۋ قاجەت. «PhD دارەجەسى اتاق, ابىروي, كۇنكورىس كوزى ءۇشىن كەرەك» دەگەن جالاڭ تۇسىنىكتى جوققا شىعاراتىن كەز جەتتى. دوكتورانتۋرا – جوعارى بىلىكتى عىلىمي-پەداگوگيكالىق, عىلىمي كادرلاردى دايىنداۋ نىسانى, ال وعان تۇسۋدەگى باستى باعدار – عىلىمدى دامىتۋ ەكەندىگىن ەسكەرە وتىرىپ, ۇمىتكەرلەر بۇل قادامعا سانالى تۇردە بارسا, تۇيتكىلدى ءبىراز ماسەلە وڭ شەشىم تابار ەدى. ءبىلىم الۋشىلارىمىز عىلىمعا دەن قويىپ, دوكتورانتۋرامىز الەمدىك دەڭگەيدە تىنىستاعاندا عانا قازاقستان عىلىمى العا باسادى. اعىمداعى جىلى ەلىمىزدە ماگيستراتۋرا مەن دوكتورانتۋراعا ءتۇسۋ ەرەجەسىنە ءبىرشاما وزگەرىستەر ەنگىزىلدى. بيىلدان باستاپ IELTS, TOEFL سىندى سىناقتاردى ءساتتى تاپسىرىپ, سەرتيفيكات يەلەنگەندەر عانا دوكتورانتۋراعا جولداما الاتىن بولادى. ال ءبىزدىڭ وقىتۋشىلارىمىز مۇنداي وزگەرىسكە دايىن با؟ قانداي وڭتايلى شەشىم جاساۋ ارقىلى عىلىمعا ۇمتىلعان وقىتۋشىلارىمىزعا قولداۋ تانىتا الامىز؟ قازىر وسى ورايدا شەشىمىن تاپپاعان ماسەلەلەردى شەشۋ جولدارى قاراستىرىلۋدا. جاقىندا اعىلشىن ءتىلىن ءبىلۋ دەڭگەيىن انىقتاۋ ماقساتىندا وقىتۋشىلارىمىز تەست تاپسىردى. الەمنىڭ, عىلىم مەن اقپاراتتىڭ ءتىلىن بىلمەي دوكتورانت اتانۋ مۇمكىن ەمەس. وسى ولقىلىقتى جويۋ ماقساتىندا دوكتورانتۋراعا ءتۇسۋدى نيەت ەتكەن تالاپكەرلەرگە قولداۋ كورسەتىلىپ, ۋنيۆەرسيتەت تاراپىنان ءۇش ايلىق اعىلشىنشا كۋرستى تەگىن وقىتۋ قولعا الىندى. بۇل ىزگى باستاما ۇمىتكەرلەردى قاناتتاندىردى. عىلىم دوكتورى دارەجەسىن يەلەنگەن دوكتورانتتارىمىزدىڭ عىلىمي-زەرتتەۋ جۇمىستارى ەل كادەسىنە جاراپ, وتاندىق عىلىمنىڭ دامۋىنا وڭ ىقپال ەتسە, ءبىز كۇتكەن ءۇمىت اقتالادى. مەملەكەتتىك ءبىلىم بەرۋ تاپسىرىسى بويىنشا, ۋنيۆەرسيتەت تاراپىنان بولىنەتىن قوماقتى قارجى قۇمعا سىڭگەن سۋداي جۇتىلىپ كەتپەسە ەكەن. الەمدىك عىلىم نارىعىندا ۇمىتكەرلەرىمىز ءباسەكەگە تۇسە الا ما دەگەن سۇراق ءبىزدى قاي كەزدە دە تولعاندىرۋى ءتيىس. عالىمداردىڭ جاس بۋىنىن دايارلاۋ, ۋنيۆەرسيتەت كادرلىق قۇرامىن ساپالى تۇردە جاڭارتىپ وتىرۋ – باستى ماقساتىمىز. ءبىلىم مەن عىلىم ۇستەمدىك قۇرعان زاماندا قارمۋ قولداۋ تانىتىپ, قاناتتاندىرعان جاس دوكتورلار اكادەميالىق قوعامداستىقتىڭ داستۇرلەرىن, قۇندىلىقتارىن, ۇمتىلىستارى مەن ماقسات-ءمىندەتتەرىن تولىققاندى بولىسەتىن اكادەميالىق ۇجىمىمىزدىڭ تابىستى, بەلسەندى مۇشەلەرىنە اينالادى دەپ ۇمىتتەنەمىز».
اتالعان كۋرسقا قاتىستى قارمۋ وقىتۋشىلارى دا ءوز پىكىرلەرىن ءبىلدىردى.
سۆەتلانا مۋسينا, ەكونوميكا فاكۋلتەتىنىڭ اعا وقىتۋشىسى:
– ايتۋلى كۋرس ءبىلىم ورداسى تاراپىنان ماماندارىمىزعا كورسەتىلگەن ۇلكەن قولداۋ دەپ ءبىلەمىن. وقۋ ورنى اعىلشىن ءتىلىن قانشالىقتى مەڭگەرگەنىمىزدى سىناپ كورۋ مۇمكىندىگىن تۋعىزىپ وتىر. اقىلى تۇردە وسىنداي كۋرستارعا بارىپ جۇرگەن تالاپكەرلەرىمىز ەندى اقشاسىن ۇنەمدەپ, وقۋ ورنى ۇسىنعان ينتەنسيۆتى كۋرسقا تەگىن بارا الادى. كۋرسقا قاتىسۋ ارقىلى وزىمە دەگەن سەنىمىم ارتتى, ارمانىما ءبىر قادام جاقىنداعاندايمىن. مورالدىق تۇرعىدان قولداۋ تانىتىپ, كاسىبي تۇرعىدان شىڭدالۋىما ىقپال ەتكەن ۋنيۆەرسيتەت باسشىلىعىنا ايتار العىسىم شەكسىز.
سامات جاكين, فيلوسوفيا جانە پسيحولوگيا فاكۋلتەتىنىڭ وقىتۋشىسى:
– مەن باكالاۆريات, ماگيستراتۋرادا وقىپ جۇرگەن كەزدەن اعىلشىن ءتىلىن ۇيرەنىپ, IELTS تاپسىرۋعا دايىندالدىم. اتالعان سىناق بۇگىنگى كۇننىڭ تالابى, تابىستى عىلىمي-پەداگوگيكالىق مانساپقا باستايتىن العىشارتتاردىڭ ءبىرى. وقۋ ورنى ىشىنەن تەگىن ءۇش ايلىق كۋرستىڭ ۇيىمداستىرىلۋى ماقتانارلىق, قۇپتارلىق ءىس. ۋنيۆەرسيتەتتىڭ كادرلىق الەۋەتىن دامىتاتىن ينتەنسيۆتى كۋرستار ۇزاق مەرزىمدى تەرەڭدەتىپ وقىتۋعا ارنالعان IELTS ەمتيحانىنا دايىندالۋعا باعىتتالعان. جوعارى دەڭگەيدەگى وقىتۋ ءۇردىسىنە قاتىسىپ, ءتاجىريبەلى مامانداردىڭ كەڭەسىن تىڭداۋ – بۇل بىزگە بەرىلگەن بىرەگەي تاماشا مۇمكىندىك.
P.S.: قازاق عىلىمىنىڭ كوشباسشىسى قانىش ساتباەۆ ءبىر سوزىندە: «ءوز ءبىلىمىن ءومىردىڭ, ءوندىرىستىڭ تاجىريبەلەرىمەن نىعايتىپ, بايىتىپ وتىراتىن, تاپقان ءىلىمىن, ۇلكەندى-كىشىلى اشقان جاڭالىعىن حالىقتىڭ قاجەتىنە بەرىپ وتىراتىن عىلىم عانا ءوز دارەجەسىندە زامان تالابىنىڭ ورەسىندە بولادى», دەپتى. ءۇمىت ەتكەن ۇمىتكەرلەرىمىز سول ۇدەدەن شىعىپ, وتاندىق عىلىمنىڭ دامۋىنا وزىندىك ۇلەس قوسسا, نۇر ۇستىنە نۇر بولار ەدى.
گۇلنار شومەنوۆا