جۇلدە شارتى بويىنشا 50 مىڭ فۋنت-ستەرلينگ الحارتحي مەن اۋدارماشى مەريلين بۋت اراسىندا تەڭدەي بولىنگەن. سىيلىقتى ۇيىمداستىرۋ كوميتەتىنىڭ سايتىندا دجوحا ءالحارتحيدىڭ پارسى شىعاناعى ەلدەرى اراسىنان اعىلشىن تىلىنە اۋدارىلعان وماندىق ءبىرىنشى رومانيست ايەل ەكەندىگى ايتىلعان. جازۋشىنىڭ بۇعان دەيىن ەكى رومانى, قىسقا اڭگىمەلەر جيناعى جانە بالالارعا ارنالعان كىتابى جارىق كورگەن.
«اسپان دەنەلەرى» كىتابى وتارلىق داۋىردەن كەيىنگى وماننىڭ قازىرگى دامۋ ساتىسىندا كورىنىس تاباتىن اپالى-ءسىڭلىلى ۇشەۋدىڭ وتباسىلىق ءومىر جولى جايىندا سىر شەرتەدى. «بولمەدە باستالىپ, الەمگە ۇلاساتىن وقيعا ۋاقىت پەن ءولىم-ءجىتىمنىڭ تەرەڭ ماسەلەلەرىن جانە جالپى تاريحىمىزدىڭ ۇرەيلى تۇستارىن شەشۋدە ايقىندىلىقتى كورسەتەدى. اۋىزەكى ءتىل مەن پوەزيا ىرعاعى ءساتتى ءۇندەسكەن اۋدارما دالمە-ءدال بەرىلگەن», دەيدى قازىلار القاسىنىڭ توراعاسى, تاريحشى بەتتاني حيۋز.
حالىقارالىق بۋكەر سىيلىعى 2005 جىلدان بەرى اعىلشىن تىلىنە اۋدارىلىپ, بريتانيادا جارىق كورگەن روماندارعا بەرىلەدى. 2018 جىلعى ماۋسىمنىڭ ۇزدىك جازۋشىسى رەتىندە پولياك جازۋشىسى, اقىن ولگا توكارچۋك تانىلعان بولاتىن.