سالتاناتتى ءراسىم بارىسىندا باۋىرجان بايبەك سوڭعى 3 جىل ىشىندە تۇرعىن ۇيگە ءزارۋ 9 مىڭنان استام وتباسىنىڭ باسپانالى بولعانىن, ونىڭ ىشىنە «نۇرلى جەر» باعدارلاماسىنىڭ ەنەتىنىن اتاپ ءوتتى. ولاردىڭ تەڭ جارتىسى – كوپبالالى جانە تولىق ەمەس وتباسىلار, جەتىم بالالار, ارداگەرلەر, ەرەكشە كۇتىمدى قاجەت ەتەتىن جاندار. جاقىن ارادا تاعى 2 مىڭعا جۋىق الماتىلىق وتباسى كوپتەن كۇتكەن پاتەرلەرىن الاتىن بولادى.
«ەلباسى تاپسىرماسىمەن ءبىز كوپبالالى وتباسىلارعا كەشەندى قولداۋ كورسەتىپ كەلەمىز. 2 اپتا بۇرىن عانا مەملەكەت باسشىسى قاسىم-جومارت توقاەۆتىڭ قاتىسۋىمەن العاشقى انالاردى قولداۋ ورتالىعى اشىلىپ, 1000-عا جۋىق وتباسى كەڭەس الدى. 400-دەن استام ءبۇلدىرشىن بالاباقشاعا تەگىن بارۋدا. ۇزدىك وقۋلارى ءۇشىن 3 مىڭنان استام وقۋشى مەن ستۋدەنت جەرگىلىكتى بيۋدجەت ەسەبىنەن ناۋرىز ايىنان باستاپ ستيپەنديا الۋدا. جۇمىسپەن قامتۋ جانە جاڭا ماماندىقتارعا وقىتۋ جۇرگىزىلۋدە», - دەدى باۋىرجان بايبەك.
«باقىتتى وتباسى» باعدارلاماسىنا قاتىسۋ ءۇشىن بەرىلگەن ءوتىنىش ءبىر اي ىشىندە ونلاين-رەجيمدە http://www.baqytty-otbasy.kz پورتالىندا قابىلداندى. بۇدان سوڭ قالا اكىمدىگى قۇجاتتاردى تەكسەرىپ, جەڭىلدەتىلگەن نەسيەگە ۇمىتكەرلەردىڭ ءتىزىمىن بەكىتىپ, تۇجقب جىبەرگەن.
وتىنىشتەر ساراپتاماسى «باقىتتى وتباسى» باعدارلاماسىنا قاتىسۋشىلاردىڭ باسىم بولىگىنىڭ 2016-2018 جىلدارى پاتەر كەزەگىنە تۇرعاندىعىن جانە كەزەكتە 6-10 مىڭىنشى ەكەنىن, ولاردىڭ پاتەردى كەم دەگەندە 5-6 جىلدان سوڭ عانا الاتىنىن كورسەتتى. ال قالالىق باعدارلاما ولارعا جاڭا پاتەردى بۇگىن الۋعا مۇمكىندىك بەرىپ وتىر.
الماتىدا ءۇي كەزەگىندەگى 1276 كوپبالالى وتباسىلاردىڭ تەڭ جارتىسىنان كوبى جەڭىلدەتىلگەن تۇرعىن ءۇي باعدارلاماسىن ءوتىنىش بەردى. قازىرگى كەزدە 195 كوپبالالى وتباسى بانكتە پاتەر قۇجاتتارىن راسىمدەۋدە, 44 وتباسى ساتىپ الۋ كەلىسىمىن جاساپ, تۇرعىن ءۇي سەرتيفيكاتتارىن الدى.
«قازىرگى كەزدە «تۇرعىنۇيقۇرىلىسجيناق» بانكى 345 وتباسىدان نەسيە ءوتىنىشىن قابىلدادى, ولاردىڭ ىشىندە 195 وتباسى پاتەرلەردى تاپتى, ەندى زاەم راسىمدەۋگە دايىندالۋدا. بۇگىنگى كۇنى 12 كوپبالالى وتباسىعا جالپى سوماسى 163 ملن تەڭگە بولاتىن نەسيە بەرىلدى, ءبىز ولاردى قۇتتىقتايمىز. زاەمدى ولار ەلىمىزدەگى ەڭ تومەنگى 2% مولشەرلەمەمەن الدى, العاشقى جارنا كولەمى 10%. العاشقى جارنانى تولەي الماعاندارعا الماتى اكىمدىگى كومەكتەستى, ءبىر ميلليون تەڭگە كولەمىندە تۇرعىن ءۇي سەرتيفيكاتتارىن بەردى», - دەپ ءتۇسىندىردى جانار جۇبانيازوۆا.
«باقىتتى وتباسى» باعدارلاماسى بويىنشا جەڭىلدەتىلگەن نەسيە جاڭا ءۇيدى ساتىپ الۋعا بەرىلەدى. زاەمنىڭ جالپى سوماسى 15 ملن. تەڭگە. الماتى تۇرعىنى انار اسانبەكوۆا ەكى بولمەلى پاتەردى 13,5 ملن. تەڭگەگە ساتىپ الدى. ءوزىنىڭ جەكە پاتەرىنە ول كۇيەۋىمەن جانە 5 بالاسىمەن جاقىن كۇندەرى كوشەتىن بولادى.
«بۇعان دەيىن ءبىز قالا ماڭىندا جالدامالى پاتەردە تۇردىق. «باقىتتى وتباسى» باعدارلاماسىن بىلگەن سوڭ قۇجاتتاردى جيناپ, ءوتىنىش بەردىك, پاتەردى تاڭدادىق, ەندى كوشۋگە دايىندالۋدامىز. قۋانىشىمىزدا شەك جوق, الماتىدان ءۇي ساتىپ الامىز دەگەن ويىمىزدا بولعان جوق, ويتكەنى قالتامىز كوتەرمەيتىن ەدى», - دەپ قۋانىشىمەن ءبولىستى انار اسانبەكوۆا.
ەلباسى «نۇر وتان» پارتياسىنىڭ XVIII سەزىندە كوپبالالى وتباسىلارعا قولداۋ كورسەتىپ, پاتەر الۋ جولىن جەڭىلدەتۋ بويىنشا تاپسىرما بەرگەن ەدى. الماتى جەرگىلىكتى بيۋدجەتتەن قارجى ءبولىپ, كوپبالالى وتباسىلار ءۇشىن «باقىتتى وتباسى» تۇرعىن ءۇي باعدارلاماسىن قولعا العان العاشقى قالا.
الماتى