«زەنيت» مادەنيەت ۇيىندە وتكەن جيىنعا 500-دەن استام جاستار قاتىستى. باتىس قازاقستان يننوۆاتسيالىق جانە تەلەكوممۋنيكاتسيالار قىزمەتى ۋنيۆەرسيتەتى مەن م.وتەمىس ۇلى اتىنداعى باتىس قازاقستان مەملەكەتتىك ۋنيۆەرسيتەتىنىڭ ۇستازدار قۇرامى, بەلسەندى ستۋدەنت جاستار ەلىمىزدەگى اسا ماڭىزدى سايلاۋ دوداسىنا قاتىسىپ جاتقان پارتيا ۇمىتكەرىنىڭ باعدارلاماسىن دەن قويا تىڭدادى. كەزدەسۋدە تاراتىلعان ۇگىت-ناسيحاتتىق ماتەريالدار, ساحنا تورىندەگى الىپ مونيتوردان كورسەتىلگەن بەينەروليكتەر قازاق جانە ورىس تىلدەرىندە ساياسي پارتيا اتىنان سىنعا تۇسكەن ۇمىتكەردىڭ سايلاۋالدى باعدارلاماسىن ەگجەي-تەگجەيلى حاباردار ەتتى.
- مەن سوڭعى كۇندەرى ەلىمىزدىڭ ءار وڭىرىنە ساپار شەگىپ, سايلاۋ ناۋقانىنا وراي ءتۇرلى ۇجىمدارمەن كەزدەسىپ ءجۇرمىن. وسىنداي كەزدەسۋلەردە حالىق ءبىزدىڭ ۇمىتكەرىمىز دانيا ەسپاەۆانىڭ قاراپايىم ادامي تۇلعاسىنا, جەكە ومىرىنە قاتىستى ساۋالداردى ءجيى قويادى. شىنىندا دا ادامنىڭ جەكە ءومىرىن جاقىن بىلگەندە, ونى جاڭا قىرىنان تاني تۇسەتىنىمىز راس. دانيا ماديقىزى كوپبالالى وتباسىندا دۇنيەگە كەلگەن, ءبىر جاسىندا اناسىنان, 12 جاسىندا اكەدەن ايىرىلىپ, تاعدىردىڭ قيىندىعىنا شىڭدالىپ وسكەن قايراتكەر تۇلعا. مەكتەپ پەن جوو-دا تەك ۇزدىك وقىپ, قارجى سالاسىندا قىزمەت ەتىپ, ادال ەڭبەگىمەن مانساپ بيىگىنە شىققان قايسار قىز. ءوندىرىستىڭ ءار سالاسىن, كاسىپكەرلىكتىڭ قىر-سىرىن جەتىك بىلەتىن دانيا ەسپاەۆا ءوزىنىڭ قىزمەت باسپالداعىندا تەك قانا كاسىبيلىكتى, ادالدىق پەن شىنشىلدىقتى مۇرات ەتكەن. ول پارلامەنت قابىرعاسىندا جۇرگەندە دە ەلگە پايدالى تالاي ءىس اتقاردى. ناقتى ءبىر مىسال كەلتىرە كەتەيىن: اناۋ ءبىر جىلدارى پەدياتر ماماندىعى مەديتسينالىق وقۋ ورىندارىنان الىنىپ, ەمحانالاردا بالالار ۇلكەندەرمەن بىرگە قارالا باستاعان كەزدە الدىمەن دابىل قاعىپ, بۇل كەلەڭسىزدىكتى جويۋعا اتسالىسقان دا – دانيا ماديقىزى بولاتىن. ءبىزدىڭ ۇمىتكەردىڭ قوعامدى جايلاعان سىبايلاس جومقورلىققا قارسى كوزقاراسى دا ەرەكشە. جالپى, مەنىڭ ويىمشا شاڭىراقتا ۇيلەسىمدىلىك ورناتۋ, قوعامدى قوقىستان تازارتۋ ىسىنە ەر ادامنان گورى ايەل ادام بەيىم كەلەدى. دانيا ەسپاەۆا بۇگىنگى قازاقستان قوعامىن جاڭاشا وزگەرتۋدىڭ ايقىن جوسپارىن ۇسىنىپ وتىر. سوندىقتان, 9 ماۋسىم كۇنى ەلىمىزدىڭ سايلاۋشىلارى لايىقتى تاڭداۋ جاسايدى دەپ ويلايمىن, - دەدى نۇر-سۇلتان قالاسىنان ارنايى كەلگەن مەيمان, «اق جول» پارتياسى توراعاسىنىڭ ورىنباسارى دميتري ۆاسيلەۆ.
بەلگىلى الاشتانۋشى عالىم, جاھانشا دوسمۇحامەد ۇلى اتىنداعى «قايراتكەر» قوعامدىق قورىنىڭ توراعاسى دامەتكەن سۇلەيمەنوۆا دا ءوز سوزىندە بۇگىنگى «اقجول» پارتياسى مەن تاريحي «الاش» قوزعالىسىنىڭ اراسىنداعى بايلانىس, ساباقتاستىق تۋرالى ناقتى مىسالدارمەن كەلتىرىپ ءوتتى. ايماقتىق شتاب جەتەكشىسى, پارتيانىڭ وبلىستىق فيليالى توراعاسى سەرىك مەرعاليەۆ «اق جول» پارتياسىنىڭ قوعامنىڭ پروگرەسسيۆتى وكىلدەرىنە, اسىرەسە جاستارعا ارقا سۇيەيتىنىن باسا ايتتى.
- قازاقستان رەسپۋبليكاسى پرەزيدەنتتىگىنە ۇمىتكەر دانيا ەسپاەۆانىڭ سايلاۋالدى ۇگىت-ناسيحات جۇمىستارى باتىس قازاقستان وڭىرىندە وتە بەلسەندى جۇرۋدە. ءبىز ءتۇرلى ۇجىمدا, جوو, ءىرى كومپانيا, ءوندىرىس ورىندارىندا حالىقپەن ءجيى كەزدەسىپ, وي-پىكىرىن ءبىلىپ, ءوزىمىزدىڭ ۇمىتكەردىڭ باعدارلاماسىمەن تانىستىرىپ ءجۇرمىز. بۇگىنگى كەزدەسۋىمىز دە جوسپارىمىزعا ساي ءوتىپ جاتىر, - دەيدى پارتيا فيليالى توراعاسىنىڭ ورىنباسارى رادا حايرۋشەۆا.
كەزدەسۋ سوڭى سۇراق-جاۋاپقا ۇلاستى.
باتىس قازاقستان