عىلىمي كونفەرەنتسيا كورنەكتى عالىمنىڭ ەلەۋلى ەڭبەگىن, عىلىم سالاسىنداعى جاڭا باعىتتار مەن شىعارماشىل جاس عالىمداردىڭ ىزدەنىستەرىن پاش ەتۋگە باعىتتالدى. اكادەميك قيلىباي مەدەۋبەكوۆ شاكىرتتەرىمەن بىرگە اعىلشىننىڭ باعالى مايدا ءجۇندى ەت-ءجۇن قويىنىڭ لينكولن, رومني-مارش, بوردەر-لەيستەر, گەمپشير, سۋففولك, وكسفوردداۋن, شەۆيوت, ساۋتداۋن تۇقىمدارىنىڭ كليماتقا بەيىمدەلۋى مەن پايدالانىلۋى بويىنشا اۋقىمدى زەرتتەۋ جۇمىستارىن جۇرگىزدى. تاباندى ەڭبەكتىڭ ناتيجەسى كوپتەگەن جىلدار بويى ەلىمىزدىڭ ءتۇرلى ايماقتارىندا كروسسبرەدتى قوي شارۋاشىلىعىن جاساۋ ءۇشىن جۇزەگە اسىرىلاتىن اسىل تۇقىمدى قويلاردى رەپرودۋكتسيالاۋعا قىزمەت ەتكەن يمپورتتىق قويلاردىڭ بىرەگەي تابىنىن قالىپتاستىردى. كەيىننەن عالىمنىڭ عىلىمي بەدەلىنىڭ ارقاسىندا قازاقستانعا اۆستراليا مەرينوسىنىڭ ءىرى پارتياسى جانە العاش رەت انالىق مال باسى اكەلىنگەن بولاتىن. وسىلايشا, اۆستراليا مەرينوسىن قازاقستاننىڭ وڭتۇستىك-شىعىس جاڭا بيوتوپتارىندا جەرسىندىرۋدىڭ وڭ اسەرى, ولاردى تازا تۇقىمدى ەتىپ ءوسىرۋ مۇمكىندىگى پايدا بولدى.
عىلىمي ىزدەنىس پەن جاۋاپتى باسشىلىق قىزمەتتەردى قاتار ۇشتاستىرعان قيلىباي مەدەۋبەكوۆ قازاق قوي شارۋاشىلىعى جانە قازاق قوي شارۋاشىلىعى تەحنولوگياسى عىلىمي-زەرتتەۋ ينستيتۋتتارىن باسقارعان جىلدارى تالانتتى عالىمدار شوعىرى بۇل سالادا جەمىستى جۇمىس ىستەدى. وسىنىڭ ارقاسىندا قازاقستاندا قوي مەن جىلقىنىڭ 8 تۇقىمى مەن 10 تۇقىمدىق جانە زاۋىتتىق سۇلەلەرى, كوپتەگەن جەلىلەرى شىعارىلىپ, مال ءوسىرۋ مەن ءونىم ءوندىرۋدىڭ, ولاردى ءتيىمدى ازىقتاندىرۋدىڭ عىلىمي تەحنولوگيالارى يگەرىلدى.
«قيلىباي ۇسەن ۇلىنىڭ بۇكىل عۇمىرى مەن اتقارعان ەڭبەك جولى, ونىڭ عىلىمي ءومىر مەكتەبى كەيىنگى بۋىن جاستار ءۇشىن تۇنىپ تۇرعان ونەگە دەپ ايتا الامىز. ەلىمىزدەگى اۋىل شارۋاشىلىعى سالاسىنىڭ ءالى دە شەشىمىن تاپپاي جاتقان كۇردەلى كەزەڭىندە قاجىرىن اياماعان قايراتكەر ەل ءۇشىن پايدالى جولدى جاڭىلماي تابا ءبىلدى. ول ەڭ الدىمەن ءىرى عالىم, دارىندى سەلەكتسيونەر, پراكتيكالىق مال شارۋاشىلىعىنىڭ بىلىكتى باسشىسى بولدى. قويدى اسىل تۇقىمداستىرۋ مەن سەلەكتسيالاندىرۋ, ونىڭ ىشىندە شەتەلدەن اكەلىنگەن مال تۇقىمدارىن جەر جاعدايىنا بەيىمدەۋ مەن سونىڭ نەگىزىندە ونىمدىلىگى جوعارى جاڭا قازاقستاندىق قوي تۇقىمىن الۋ ءتاسىلى زووتەحنيكالىق عىلىمعا قوسقان باعا جەتپەس ۇلەسى ەكەنىن ۇمىتپاۋىمىز كەرەك»,–دەيدى «اۋىل شارۋاشىلىعى اەروفوتوگەودەزيالىق ىزدەستىرۋ مەملەكەتتىك ينستيتۋتىنىڭ ديرەكتورى, پروفەسسور ابدىعاني بەگمانوۆ.
ايتۋلى عالىمنىڭ ءبىلىم بەرۋ سالاسىندا بولاشاق جاس مال شارۋاشىلىعى ماماندارىن دايىنداۋعا وراسان ۇلەس قوسقانىن تىلگە تيەك ەتكەن قازۇاۋ رەكتورى, اكادەميك تىلەكتەس ەسپولوۆ, تاياۋ ارادا قيلىباي مەدەۋبەكوۆ تۇرعان ءۇيدىڭ قابىرعاسىنا ەسكەرتكىش تاقتا ورناتىلاتىنىن جەتكىزدى. ونىڭ سوزىنشە, الماتى قالاسىنان عالىمنىڭ اتىنا كوشە بەرۋ ءىسى دە ونوماستيكالىق كوميسسيانىڭ قاراۋىنداعى شەشىمىن كۇتكەن ماسەلەنىڭ ءبىرى.
عالىمنىڭ شىعارماشىلىقتاعى ۇلكەن ىزدەنىستەرىنىڭ ناتيجەلەرى 700-گە جۋىق عىلىمي ماقالالار, ادىستەمەلىكتەر, كىتاپتار مەن مونوگرافيالاردا جارىققا شىعىپ, اۋىل شارۋاشىلىعى وندىرىسىندە, ەلىمىزدىڭ اۋىلشارۋاشىلىعى باعىتىنداعى جوعارى جانە ارنايى وقۋ ورىندارىندا وقۋ قۇرالى رەتىندە كەڭىنەن قولدانىلىپ كەلەدى.