تاياۋدا قازاقستان سۋرەتشىلەر وداعىنىڭ مۇشەسى, تاۋەلسىز «تارلان» سىيلىعىنىڭ لاۋرەاتى, كوركەمونەر اكادەمياسىنىڭ اكادەميگى اسقار ەسەنباەۆتىڭ «ىزدەنىس ۋاقىتى» اتتى كورمەسىن تاماشالاۋدىڭ ءساتى تۇسكەن ەدى. شەبەر ءتىلىنىڭ تىلسىم قۇدىرەتى وزىنە ەرىكسىز باۋرايدى. ەكسپوزيتسيا مۇسىندىك پورترەتتەر مەن سيمۆوليكالىق پورترەتتەردى, گرافيكالىق جۇمىستاردى, ءبارىن قوسقاندا ءار جىلداردا شەبەردىڭ قولىنان شىققان توقساننان استام تۋىندىنى قامتىعان.
«ادامنىڭ كوزى ءۇشىن ەرەكشە كونفيگۋراتسيالاردا جان مەن ويدىڭ فانتاستيكالىق مۇمكىندىگىن ءوزىنىڭ وعاش دەنەسىمەن سەندىرەتىن باسقا جاراتىلىستاردىڭ تاڭعاجايىپ وبرازدارىن جاساي الاتىندىعىنىڭ ارقاسىندا اۆتورعا ەكسپرەسسيا مەن گيپەربولا ءتىلى جاقىنىراق. قاراپايىم عانا مۇسىندىك كولەمدەر ءومىردىڭ تراگەديالىق ءمانىن بەرە الاتىن بولسا, وندا ءمينيماليزمنىڭ ءتىلى ەسەنباەۆقا تاۋەلدى بولدى دەي بەرىڭىز», دەيدى ونەر يەسىنىڭ قولتاڭباسى حاقىندا ونەرتانۋشى بايان بارمانقۇلوۆا.
اسقار ەسەنباەۆتىڭ شىعارماشىلىق جولى 80-جىلداردىڭ ورتاسىندا باستالدى. كورمەدەن ءمۇسىنشىنىڭ ءوز ۋاقىتىندا ونەرسۇيەر قاۋىمنان جوعارى باعا العان «كىتاپحاناشى ليۋسيا», «ۆيكتور» سىندى تانىمال تۋىندىلارىن كەزدەستىرۋگە بولادى. سونىمەن قاتار ەكسپوزيتسيادا مەملەكەتتىك ونەر مۋزەيى قورىنان الىنعان اۆتوردىڭ 1985 جىلى ورىنداعان ءوزدەرىنىڭ پاكتىگىمەن جانە قورعانسىزدىعىمەن ادام جانىن تەبىرەنتەتىن ۇل بالا مەن قىز بالانىڭ مۇسىندەرى بەينەلەنگەن «بالالار» دەپ اتالاتىن كومپوزيتسياسى دا ۇسىنىلعان. يسا پايعامباردىڭ «سەندەر ‒ مەنىڭ دوستارىمسىڭدار» دەگەن سوزىمەن اتالعان شىعارماسى يسا پايعامبار مەن ونىڭ رۋحاني كەمەلدىككە ۇمتىلعان ون ەكى شاكىرتىنىڭ جۇمىلا, ەكپىندى ءارى سەنىمدى ادىمداعان شەبىنەن تۇرادى. كۇمىس جاعىلعان گرانيتتەن جاسالىپ, ميف پەن ءدىننىڭ قۇپيا كەڭىستىگى اراسىندا سالتانات قۇرعان ادامزات تاريحىنا قويىلعان باستى ەسكەرتكىشتەرگە ارنالعان وبەكتىلەر توپتاماسى دا قىزىعۋشىلىق تۋدىرادى. سان قىرلى مۇسىندەرگە كوڭىل قويساڭىز, ءوزىنىڭ سيمۆوليكالىق ماندەرىنىڭ قاراپايىمدىعىمەن جانە كۇردەلىلىگىمەن كوز تارتاتىن كونە زامانداردىڭ كەيپىنە ەنگەندەي كۇي كەشەسىز.
ا.ەسەنباەۆتىڭ جۇمىستارى ءا.قاستەەۆ اتىنداعى مەملەكەتتىك ونەر مۋزەيىنىڭ قورىندا, مەملەكەتتىك ترەتياكوۆ گالەرەياسىندا, سونداي-اق اقش, يتاليا, گەرمانيا, فرانتسيا جانە رەسەي ەلدەرىنىڭ جەكە كوللەكتسيالارىندا ساقتاۋلى.
الماتى