بۇل تۋرالى وڭىرلىك كوممۋنيكاتسيالار قىزمەتىندە ورداباسى اۋدانىنىڭ اكىمى قايرات جولدىباي ۇلى مەن وبلىستىق دەنەشىنىقتىرۋ جانە سپورت باسقارماسىنىڭ باسشىسى پولات قىرىقباەۆ مالىمدەدى. ءداستۇرلى تۋرنير 54 مەملەكەتتە كۇرەسكە ءتۇسىپ, 48 مەدال جەڭىپ العان, جاۋىرىنى جەرگە تيمەگەن قازاق حالقىنىڭ تۇڭعىش كاسىپقوي بالۋانى, وراسان كۇشتىڭ يەسى, كۇرەستىڭ بىرنەشە تۇرىنەن الەم چەمپيونى قاجىمۇقان مۇڭايتپاس ۇلىن ۇرپاق جادىندا جاڭعىرتىپ وتىرۋعا باعىتتالعان. «قر تۇڭعىش پرەزيدەنتى نۇرسۇلتان نازارباەۆ ماڭگىلىك ەل بولۋ مۇراتى بابالاردىڭ ەرلىگى, بۇگىنگى بۋىننىڭ ەرەن ىستەرى جانە جاس ۇرپاقتىڭ جاسامپازدىعى اراسىندا ساباقتاستىق بولسا عانا جۇزەگە اساتىنىن ۇنەمى ايتىپ كەلەدى. تاريحتا ەسىمى التىن ارىپتەرمەن جازىلعان ۇلى تۇلعالاردى دارىپتەۋ – وسى ساباقتاستىقتى جالعاستىرۋ بولماق. قاجىمۇقان مۇڭايتپاسوۆ – بارشا قازاقتىڭ ماقتانىشى. ونىڭ ەرلىگى, ەلدىڭ اتىن الەمگە تانىتۋعا سىڭىرگەن ەڭبەگى ۇشان تەڭىز. ءومىرىنىڭ سوڭعى كۇندەرىن ورداباسىدا وتكىزىپ, وسى قاسيەتتى مەكەندى ماڭگىلىك تۇراعى ەتكەن بالۋاندى بۇگىندە ورداباسىدان بولە جارا ءسوز ەتە المايمىز. كۇش اتاسىنىڭ اسىل سۇيەگى جاتقان اۋدانىمىزدان الەمدىك, حالىقارالىق جارىستاردا توپ جارىپ جۇرگەن بالۋاندار ۇلاس مومىنوۆ, نۇرلان اسىلوۆ, داۋلەت بايجىگىتوۆ, قۋات بايقوجاەۆ, ەلتاي سىدىقوۆ, وڭعار ۇندەمەسوۆ, وڭدىباي ۇندەمەسوۆ, سەيداحمەت قوناقباەۆ سىندى جىگىتتەر قاجىمۇقاننىڭ ىزىمەن ءجۇردى», دەدى ورداباسى اۋدانىنىڭ اكىمى.
بۇگىندە اۋداندا قاجىمۇقانداي بولسام دەگەن ماقساتپەن سپورتتىڭ وسى تۇرىمەن اينالىسىپ جۇرگەن جاستار كوپ. ال جۇمانازار ەرسۇلتانوۆ, ءادىلجان ىستىباەۆ, اعايىندى عۇمار, عۇسمان قىرعىزباەۆتار, ابزال ارىستانبەك تالاي ءدۇبىرلى دودادا توپ جارىپ, ورداباسى ءوڭىرىنىڭ مەرەيىن تاسىتىپ ءجۇر. ايتا كەتەلىك, ورداباسى جەرىنەن قر ەڭبەگى سىڭگەن 6 جاتتىقتىرۋشى, 3 سپورت قايراتكەرى, كۇرەستەن 100-دەن اسا سپورت شەبەرى, بىرنەشە حالىقارالىق دارەجەدەگى سپورت شەبەرى, الەم بىرىنشىلىكتەرىنىڭ, ازيا چەمپيوناتتارىنىڭ جەڭىمپازدارى مەن جۇلدەگەرلەرى شىققان.
تۇركىستان وبلىسى