سال مۇحيت, عاريفوللا قۇرمانعاليەۆ سىندى دۇلدۇلدەر تۋعان ءوڭىر اقىن قىزى شولپان قىدىرنيازوۆانىڭ 70 جىلدىق مەرەيتويىن كەشەندى شارالارمەن اتاپ ءوتتى. اۋدان ورتالىعىندا اقىن تۇلەپ ۇشقان مۇحيت اتىنداعى ورتا مەكتەپتە شولپان باتىرقىزى اتىندا قازاق ءتىلى مەن ادەبيەتى كابينەتى اشىلدى. سالتاناتتى شاراعا باتىس قازاقستان وبلىسى اكىمىنىڭ ورىنباسارى عابيدوللا وسپانقۇلوۆ, قازاقستان جازۋشىلار وداعىنىڭ مۇشەلەرى ايسۇلۋ قادىرباەۆا مەن داريعا مۇشتانوۆا, مەرەيتوي يەسىنىڭ ايتىستاعى سەرىكتەرى ۇزىلدىك ەلەۋباەۆا, كۇلاش سالىمگەرەيقىزى, ساعىنتاي بەيسەنعاليەۆ, حاتيموللا بەردىعاليەۆتەر ارنايى كەلدى. قاراتوبە اۋداندىق م.مەراليەۆ اتىنداعى تاريحي-ولكەتانۋ مۋزەيى ۇيىمداستىرعان «ونەردىڭ جولى – ولمەس جول» اتتى كورمە «تۋعان جەردىڭ تۇعىرىندا تۇلەدىم» اتتى ادەبي-سازدى كەشكە ۇلاستى. ال «ايتىستىڭ شولپان جۇلدىزى» اتتى ايماقتىق-رەسپۋبليكالىق اقىندار ايتىسىنا ماڭعىستاۋ, اقتوبە, اتىراۋ وبلىستارىنان جانە باتىس قازاقستان وبلىسىنىڭ اقجايىق, ءبورلى, جاڭاقالا, جانىبەك, قازتالوۆ, قاراتوبە, سىرىم, تەرەكتى اۋداندارىنان 14 اقىن قاتىسىپ, كورەرمەننىڭ ىستىق ىقىلاسىنا بولەندى.
باۋىرجان حاليوللا, داريعا مۇشتانوۆا, ۇزىلدىك ەلەۋباەۆا, ەرتاي بيمۇقانوۆ سىندى بەلگىلى ايتىس اقىندارى تورەلىك ەتكەن ايماقتىق-رەسپۋبليكالىق اقىندار ايتىسىنىڭ باس جۇلدەسى – 500 مىڭ تەڭگەنى ماڭعىستاۋلىق ارعىنبەك قالباەۆ جەڭىپ الدى. ءى ورىندى ورالدىق تالعات مىقي يەلەنسە, قوس ەكىنشى جۇلدە اقتوبەلىك جانىبەك بەيبىتوۆ پەن اقجايىقتىق مەيىرمان شاكەنوۆكە بۇيىردى. جاڭاقالالىق ورىنبەك مەڭدىقۇل, قازتالوۆتىق ەستەمىس مۇحامبەتوۆ, اتىراۋلىق الشىنبەك مۇحانعاليەۆتەر ءىىى ورىندى مىسە تۇتتى. ال وسى ايتىستىڭ ەڭ جاس تالاپكەرلەرى – قاراتوبەلىك رايىمبەك وتەپوۆ پەن ورالدىق ءادىل احمەتوۆكە داريعا مۇشتانوۆا مەن ۇزىلدىك ەلەۋباەۆا اتىنداعى ارنايى سىيلىق بەرىلدى.
سۋرەتتى تۇسىرگەن راۋشان مەرگەنوۆا
باتىس قازاقستان