وڭىردەگى ەرەكشە جىلىجاي شالعايداعى نەجينكا اۋىلىندا ورنالاسقان. وسىدان ون جىل بۇرىن «نەجينكا-ەركە» جشس-نىڭ ديرەكتورى مۇرات جۇمابەكوۆتىڭ باستاماسىمەن تۇرعىزىلىپ, تۇرعىندار مەن وقۋشىلار جۇمىلا اتسالىسقان.
ۇزىندىعى 25 مەتر, ەنى 16 مەتر بولاتىن جىلىجاي بوي كوتەرگەننەن بەرى وسىندا مەڭگەرۋشى بولىپ ەڭبەك ەتەتىن تاتيانا ساۆەنكوۆانىڭ ايتۋىنشا, سەرىكتەستىك جەتەكشىسى عيماراتتىڭ جوباسىن عالامتوردان الىپ, جەرگىلىكتى جەردىڭ كليماتىنا ىڭعايلاستىرعان. بۇگىندە مۇندا كوكونىس پەن گۇلدىڭ جيىرماعا تارتا ءتۇرى وسەدى. ەشقانداي گەربيتسيد قولدانىلمايدى, تەك كوڭدى عانا پايدالانعاندىقتان, ءونىم ەكولوگيالىق جاعىنان تازا. شاتىرى پوليكاربوناتپەن قاپتالىپ, جىلى بولۋى مۇقيات ەسكەرىلگەن. ورتاشا جىلىلىق +20, 25 گرادۋس بولسا, جاز مەزگىلىندە +40 گرادۋسقا دەيىن جەتەدى. مۇنداي تەمپەراتۋرا قيار, قىزاناق وسىرۋگە وتە قولايلى.
جىلىجاي ىشىندە تروپيكالىق پالما دا ءوسىپ تۇر. جاس وسكىن پەتروپاۆلداعى بوتانيكالىق باقتان اكەلىنىپ, ماۋەلى اعاشقا اينالىپتى.
بيىل تاعى ءبىر جىلىجايدىڭ قۇرىلىسى قولعا الىنىپ, جىل اياعىنا دەيىن پايدالانۋعا بەرىلمەك. ول ءۇشىن 100 مىڭعا جۋىق شىنى شولمەك جينالىپتى. جەرگىلىكتى كاسىپكەردىڭ تىڭ يدەياسىنا كەزىندە كۇمانمەن قاراعانداردىڭ كۇدىگى سەيىلىپ, كومەك قولدارىن بەرۋگە قۇلشىنىپ وتىر. سولتۇستىك قازاقستان وبلىسى, ع.مۇسىرەپوۆ اۋدانى