ادىلەت ءمينيسترى م. بەكەتاەۆ بايانداما بارىسىندا, احقو قۇقىقتىق قامتاماسىز ەتۋ ءۇشىن نەگىزگى زاڭعا وزگەرىستەر ەنگىزىلگەنىن اتاپ ءوتتى. كونستيتۋتسياعا سايكەس نۇر-سۇلتان قالاسىندا قارجى سالاسىندا ەرەكشە قۇقىقتىق رەجيم ورناتىلدى.
سونداي-اق, كونستيتۋتسيالىق زاڭ قابىلداندى. حالىقارالىق قارجى ورتالىعى اۋماعىنداعى ينۆەستورلاردىڭ قىزمەتى اعىلشىن قۇقىعىمەن رەتتەلەدى. رەسمي ءتىل - اعىلشىن ءتىلى.
«قارجى ورتالىعى اۋماعىندا تاۋەلسىز سوت جانە حالىقارالىق تورەلىك ورتالىعى قۇرىلدى, وندا سوت ادىلدىگىن اعىلشىن سۋديالارى جۇزەگە اسىرادى», دەدى م.بەكەتاەۆ.
ءمينيستردىڭ ايتۋىنشا, اتالعان شارالاردىڭ بارلىعى مەنشىك قۇقىعىن قورعاۋعا جانە سوت تورەلىگىن ءتيىمدى ىسكە اسىرۋعا كەپىلدىك بەرەدى. بۇل ءىرى جوبالاردى ىسكە اسىرۋدى قامتاماسىز ەتەتىن شەتەلدىك ينۆەستورلار ءۇشىن اسا ماڭىزدى.
«ينۆەستيتسيالار ادىل قۇقىقتىق قورعاۋعا سەنىمدىلىك بولعان جاعدايدا سالىنادى. مۇنداي سەنىمدىلىك جىلدار بويى قالىپتاسادى, كەيدە ول ءۇشىن ونجىلدىقتار قاجەت. بيزنەس ءۇشىن قاجەتتى سەنىمدىلىكتى اعىلشىن قۇقىعى, اعىلشىن ءتىلى جانە اعىلشىن سوتى بەرەدى. ويتكەنى الەمدىك بيزنەستىڭ 80 پايىزى اعىلشىن قۇقىعىن تاڭدايدى. وسى سەبەپتەن اعىلشىن قۇقىعىنا نەگىزدەلگەن گونكونگ جانە دۋباي سياقتى قارجى ورتالىقتارى ءوز ەلدەرىنىڭ ەكونوميكالارىنا ءىرى ينۆەستيتسيالاردى تابىستى تارتىپ وتىر», دەدى مينيستر.
سونداي-اق ول قازاقستانعا ينۆەستيتسيالار عانا ەمەس, ينۆەستيتسيالارمەن قوسا جاڭا تەحنولوگيالار دا قاجەت ەكەنىن اتاپ ءوتتى.
«قارجى ورتالىعى اۋماعىندا زياتكەرلىك مەنشىكتى حالىقارالىق تىركەۋ بويىنشا ىڭعايلى سەرۆيس قامتاماسىز ەتىلەدى. اعىلشىن ءتىلىن ەركىن مەڭگەرگەن جانە ۇزدىك الەمدىك ۋنيۆەرسيتەتتەردە ءبىلىم العان حالىقارالىق دەڭگەيدەگى زاڭگەرلەر دايارلاندى», دەدى م.بەكەتاەۆ.
مينيسترلىكتىڭ اقپاراتىنا سۇيەنسەك, حالىقارالىق قۇقىق ۇستەمدىگى يندەكسىندە قازاقستان 7 جىل ىشىندە 10 تارماققا ءوسىم كورسەتىپ, 126 ەلدىڭ ىشىندە 65-ءشى ورىندا تۇر.