قوس بوكسشى ءبىر-ءبىرىن جاقسى بىلەدى. 2012 جىلى لوندوندا الاۋى تۇتانعان وليمپيا ويىندارىنىڭ جارتىلاي فينالىندا ولاردىڭ جولدارى قيىسىپ, سول كەزدەسۋ رينگ قوجايىنىنىڭ جەڭىسىمەن اياقتالعان ەدى. وليمپيادا چەمپيونى اتانعاننان كەيىن دجوشۋا بىردەن كاسىپقوي بوكسقا اۋىستى. التى جىلعا جۋىق ۋاقىت ارالىعىندا ۇلىبريتانيا وكىلى تولعاي تابىستارعا قول جەتكىزدى. 22 كەزدەسۋدىڭ بارلىعىن جەڭىسپەن اياقتاپ, 21 قارسىلاسىن ەسىنەن تاندىردى.
دىچكو اۋەسقوي رينگىندە تاعى ءبىراز ۋاقىت ونەر كورسەتىپ ءجۇردى. بۇل رەتتە ول نەسىبەسىز بولعان جوق. ريو وليمپياداسى مەن الەم چەمپيوناتتارىندا جۇلدە الدى. قۇرلىقتىق دودالاردا دارا شىقتى. تەك سودان كەيىن بارىپ قانا كاسىپقوي رينگكە شىقتى. ەكى جىلعا جۋىق ۋاقىت ارالىعىندا جەرلەسىمىز جەتى رەت جەكپە-جەككە شىعىپ, بارلىق باسەكەنى مەرزىمىنەن بۇرىن اياقتادى.
لوندون وليمپياداسىندا يۆان دىچكو ءوزىنىڭ جەڭىلمەگەنىن ايتۋدان ەش جالىققان ەمەس. الەم چەمپيونىن جەكپە-جەككە شاقىرا وتىرىپ وتانداسىمىز: «ول مەنى وليمپيادادا ۇتقان جوق. ماعان تيەسىلى التىندى تورەشىلەر وعان الىپ بەرگەن ەدى. سول اعاتتىقتىڭ ورنىن تولتىراتىن كەز كەلدى. قازىر كەزدەسسەك تە دجوشۋانىڭ مەنى جەڭە المايتىنى انىق» دەپ مالىمدەدى.