پەرىشتە كوڭىلدىڭ پەريزات ورنەكتەرى

كۇندەلىكتى ومىردە ءبىز ءجيى كورىپ جۇرسەك تە, سىرى مەن سىمباتىنا زەر سالىپ جانىمىزبەن ۇڭىلە بەرمەيتىن ءار ءسات­تىڭ ادەمى كورىنىسى ايانات­تىڭ بالا قيالىنا قانات بىتىرگەندەي. بايابان دالانى مىڭبوياۋعا شومىلدىرعان اسەم گۇلدەر, جازعى جازيرا, ءدۇ­نيەگە جان بىتىرگەن شۇعى­لالى كوكتەم, سىلدىراپ اققان تاۋ وزەنى, بۋىرقانعان اساۋ تە­ڭىز ونىڭ كەنەبىندە قاز-قال­پىندا كوز الدىڭا كەلەدى. نە­بارى 5-سىنىپتا وقيتىن ايانات بۇعان دەيىن بىرنەشە رەسپۋبليكالىق بايقاۋدىڭ جە­ڭىمپازى اتاندى. بىلتىر يۋنەسكو شەڭبەرىندە ۇيىم­داس­تىرىلعان بالدىرعان سۋرەت­شىلەر فەستيۆالىندە دە ەرەك­شە كوزگە ءتۇسىپتى. الما­تى­دا ونىڭ ءارتۇرلى جانردا ورىن­دالعان قىرىقتان اس­تام شى­عارماسىن قامتىعان جە­كە كورمەسى اشىلدى. ۇلكەن ار­مانعا قول سوزعان كىشكەنتاي سۋرەت­شىنىڭ يدەياسىنىڭ كەڭ­دىگى, تاقىرىپتارىنىڭ تەرەڭ­دىگى كوڭىل قۋانتادى.

– اياناتتىڭ جۇمىستارىنا قاراپ ءوز قاتارلاستارىنىڭ ارا­سىندا دەڭگەيى بار, بولا­شاعىنان مول ءۇمىت كۇتۋگە بولا­تىن سۋرەتشى دەپ ايتا الامىز. كار­تينالارىنان ومىرگە, قورشاعان ورتاعا دەگەن بالاعا ءتان كوزقاراس, قۇشتارلىق پەن مەيىرىم شۋاعى ەسەدى. گۇلدەر, تابيعات, تەڭىز, قۇستار, قالا تىنىسى وعان ەرەكشە اسەر ەتكەن. ءتۇس تاڭداۋى, كومپوزيتسيالىق شە­شىمدەرى بالا جۇرەكتەن ءورىل­گەن. كەيدە بەلگىلى زاڭ­دى­لىق­تارعا باعىنىپ نەمەسە ويلاردىڭ قۇرساۋىندا قال­عانىنا بايلانىستى بالا­لاردىڭ ويىن, العان تۇستەرىن كاسىبي سۋرەتشىلەر الا الماي جاتاتىن جاعدايلار دا بولادى. بالانىڭ قاسيەتى – ەركىن, بۇكپەسىز, تازا كۇيدە بەينەلەي الۋىندا, – دەيدى قازاقستان سۋرەتشىلەر وداعىنىڭ مۇشەسى شاتتىق باتان.

بالعىن سۋرەتشىنى مەكتەپ تابالدىرىعىن اتتاعان ءسات­تەن سيقىرلى ونەردىڭ سىرى­نا باۋ­لىپ جۇرگەن ۇستازى راۋشان نابيقىزى ورىمدەي قىزدىڭ دەگدار سالاعا دەگەن ىڭكارلىگى تۋرالى ويىن بىلايشا جەتكىزدى: «اياناتتىڭ كوزىندە وت بار. ول ومىرگە ەرەك­­شە قۇشتارلىقپەن, ماحاب­باتپەن قارايدى. سە­زىمتال. سالعان كارتينالارىندا تە­ڭىز بەن اسپاندى, تاۋ مەن دالانى تۇتاس قۇشاعىنا سىي­دىرعىسى كەلەدى. ءوزىنىڭ «كۇن مەن ءتۇن» دەپ اتالعان شى­عار­­ماسىندا اق پەن قارانى, ءومىر­دىڭ كولەڭكەسى مەن شۋاعىن قا­تار قويىپ سالىستىرا بەي­نەلەيدى. سۋرەتشىنى شىڭعا شىعاراتىن ەڭبەك پەن ىزدەنىس. بۇل قاسيەتتەر كىشكەنتاي ءشا­كىر­تىمدى قاتارلاستارىنان دارا­لاپ تۇرادى».

اياناتتىڭ «مىڭبوياۋلى تىرشىلىك» دەپ اتالعان جەكە كورمەسىنە بارىپ ونىمەن اڭگى­مەلەسۋدىڭ ءساتى ءتۇستى. ءتورت جا­­­سى­نان سۋرەت سالا باستاع­ان ول ءوز كارتينالارىندا قوڭىر ءتۇس­تى كوبىرەك پايدالانا­تى­نىن, بو­لاشاقتا ايشا عالىم­باەۆا اپاسى سياقتى ايگىلى قىل­قالام شەبەرى بولۋدى ارماندايتىنىن ايتادى.