قاراعاندى وبلىسىنىڭ شاحتەرلەرى تۇڭعىش پرەزيدەنت – ەلباسى نۇرسۇلتان نازارباەۆقا ۇندەۋ جولدادى. وعان 3053 شاحتەر قول قويعان.
«اسا قۇرمەتتى ەلباسى! قاراعاندى وبلىسىنىڭ شاحتەرلەرى قاشاندا ءسىزدىڭ تىرەگىڭىز. ءبىز ارقاشان تەك قانا سىزگە سەنىپ كەلدىك. سىزگە سەنۋگە بولاتىنىن سان مارتە ىسىڭىزبەن دالەلدەدىڭىز. ءسىز ەڭبەك ادامىن جەتە ءتۇسىندىڭىز, ويتكەنى ءوزىڭىز دە ەڭبەك ادامىسىز. ءسىزدىڭ پرەزيدەنتتىك وكىلەتىڭىزدى تاپسىرۋ تۋرالى شەشىمىڭىزدى ەستىپ, كوڭىلىمىز قۇلازىدى», دەپ جازادى قاراعاندى شاحتەرلەرى.
ۇندەۋدە شاحتەرلەر ورتاسىندا مۇنىڭ جۇرەكتى اۋىرتار توسىن جاڭالىق بولعانى ايتىلعان.
«بىزگە ۇزاق ۋاقىتتان بەرى كورسەتىپ كەلگەن قولداۋىڭىز ءۇشىن سىزگە العىس ايتامىز. ءسىز ءاردايىم ەڭ قيىن ساتتەردە بىزبەن بىرگە بولدىڭىز. ءبىز ۇنەمى ءسىزدىڭ قامقورلىعىڭىزدى سەزىنەمىز. ءبىز ارقاشان ءسىزدىڭ باعىتىڭىزدى قولدايمىز. ءبىز ەلىمىزدىڭ جۇرەگى - ەلوردانى نۇر-سۇلتان دەپ اتالعانىن قولدايمىز. ءبىزدىڭ اۋىر ەڭبەگىمىزدى ۇنەمى جوعارى باعالاعانىڭىز ءۇشىن سىزگە تاعى دا العىس ايتقىمىز كەلەدى. سىزگە مىقتى دەنساۋلىق جانە اماندىق تىلەيمىز», دەيدى شاحتەرلەر.