نۇرسۇلتان نازارباەۆتىڭ پرەزيدەنتتىك وكىلەتتىگىن توقتاتۋ تۋرالى شەشىم قابىلداۋى ناعىز تاريحي وقيعا. ەلباسى تاۋەلسىز مەملەكەتىمىزدىڭ ەرتەڭى ءۇشىن ەڭ كۇردەلى تاۋەكەلدەرگە بارۋدان جۇرەكسىنگەن ەمەس.
وتكەن 30 جىل ىشىندە قازاقستان اتىن الەمگە ايگىلەۋدەن بولەك شەكارامىزدى شەگەندەۋ, ونىڭ ىشىندە ورتاق وزەندەردى ءبولىسۋدىڭ قانشالىقتى ماڭىزدى بولعانىن, ءبىر عانا كاسپي تەڭىزىنىڭ مارتەبەسىنە قاتىستى ۇزاققا سوزىلعان كەلىسسوزدەردىڭ جەمىسى اياقتالۋىن كەلەر ۇرپاق ماقتانىپ ايتىپ جۇرەتىن بولادى.
ەلباسى ەل ىشىندەگى الەۋمەتىك جاعدايدىڭ جاقسارۋىنا, مادەنيەت پەن ءبىلىمنىڭ وركەندەۋىنە, سپورت پەن دەنساۋلىق سالاسىنىڭ دامۋىنا ءبىرىنشى كەزەكتە كوڭىل ءبولدى. ونى ءبىز ءوز بالالارىمىزدىڭ ءبىلىم, علىمى, ونەر جارىستارىنا قاتىسىپ, الەمنىڭ وزىق مەملەكەتتەرىنڭ وقۋشىلارىنان وزىپ كەلگەنىنەن كورىپ وتىرمىز. سپورت سالاسىنداعى جەتىستىكتەر تۋرالى ايتسام, ۇزاق تاڭعا جەتەدى. الەۋمەتتىك جاعدايدىڭ كوتەرىلۋىن, كوپبالالى انالارعا قاتىستى قولداۋ شارالارىنىڭ جولعا قويىلعانىنان حاباردارمىز. ەلباسى ءوز جولداۋىندا ازاماتتاردى وتانشىل بولۋعا, تۋعان جەرىن تۇلەتۋگە ۇندەدى عوي. ونىڭ ناقتى جولدارىن كورسەتىپ تە بەردى. حالقىمىزدىڭ ءال-اۋقاتىن ارتتىرۋعا, تۇرمىسىن تۇزەۋگە ۇكىمەت بىلەك سىبانىپ كىرىسىپ جاتىر. تۇڭعىش پرەزيدەنتتىڭ مۇعالىمدەردىڭ مارتەبەسىن كوتەرۋگە, دارىگەرلەردىڭ جالاقىسىن كوبەيتۋگە تاپسىرما بەرگەنى سول كەزدە-اق ەل ءىشىن ءسۇيسىندىرىپ تاستادى. ەلباسىنىڭ تاريحي ميسسياسىنا قاتىستى ايتقاندا الدىمەن وسى جاعدايلار ويىما ورالدى.
ال ەلوردامىزعا ەلباسى ەسىمىن بەرۋ ماسەلەسى ۋاقىتتىڭ كورىگىندە ءپىسىپ, جۇرتتىڭ جۇرەگىندە ناقتىلانعان شەشىم. جالپى, الماتى – بۇرىنعى باس قالا. بۇگىندە بۇل ۇلى ميسسيانى استانا ارقالاپ, قازاقتىڭ كوشىن العا سۇيرەپ كەلەدى. ءبىز كورگەن توقسانىنشى جىلداردىڭ باسىندا اقمولا دەپ اتالاتىن كىشكەنتاي عانا كەنت ەدى.سولتۇستىك ايماقتىڭ كليماتى قاتال جازىق دالاسىندا ورنالاسقان شاعىن شاھار كوپ ۇزاماي توتى قۇستاي تۇرلەنىپ, جەردەگى جۇماققا اينالدى. عاجايىپ قۇبىلىستىڭ اۆتورى – قازاقستاننىڭ تۇڭعىش پرەزيدەنتى نۇرسۇلتان نازارباەۆ. ول قالانىڭ ساۋلەتتىك كونتسەپتسياسىن ازىرلەپ, اۋماعىن كەڭەيتتى. قازىر وتىز جىل بۇرىنعى اقمولا مەن بۇگىنگى استانانىڭ كەلبەتىن سالىستىرعاندا, جەر مەن كوكتەي ايىرماشىلىقتى ەش قيىندىقسىز بايقاۋعا بولادى. اقش مەملەكەتى دە استاناسىن ۆاشينگتون دەپ اتادى ەمەس پە؟! ۆەتنامدىقتار دا ءبىرىنشى پرەزيدەنتىنىڭ قۇرمەتىنە ءبىر قالاسىن حوشيمين دەپ وزگەرتتى. ىرىمشىل قازاقپىز, جولىن بەرسىن, استانا اتاۋىن نۇرسۇلتان دەپ اۋىستىرۋدى ءبارىمىز قولداعانىمىز ءجون.
ءبىز بۇل شەشىمدى قولداۋ ارقىلى ەلباسىنا دەگەن قۇرمەت پەن العىس سەزىمىن عانا ەمەس, نازارباەۆپەن بىرگە وركەندەگەن قازاقستاننىڭ نىعايۋىنا دا ءوز باعامىزدى بەرگەنىمىزدى بىلدىرەمىز. سوندىقتان, نۇر – سۇلتان اتاۋى ەلورداعا ابدەن جاراسىمدى.
جاقسىلىق ۇشكەمپىروۆ,
قازاقستاننىڭ ەڭبەك ەرى,
«جاقسىلىق» شارۋا قوجالىعىنىڭ باسشىسى
الماتى وبلىسى