پرەزيدەنت قاسىم-جومارت توقاەۆ ۇكىمەتكە جالاقىسى ەڭ تومەن جۇمىسكەرلەردىڭ جالاقىلارىن 2019 جىلدىڭ 1 ماۋسىمىنان باستاپ كوتەرۋدى تاپسىردى. بۇل تۋرالى قاسىم-جومارت توقاەۆ ءوزىنىڭ تۆيتتەردەگى پاراقشاسىندا جازدى.
«ۇكىمەتكە بيۋدجەت سالاسىنداعى جالاقىسى تومەن قىزمەتشىلەردىڭ جالاقىسىن كوتەرۋدى 1 شىلدەدەن ەمەس, 1 ماۋسىمنان باستاۋ تۋرالى تاپسىرما بەردىم. بۇل شەشىم ءبىر ميلليوننان استام ازاماتتىق جانە مەملەكەتتىك قىزمەتشىلەردىڭ جاعدايىنىڭ جاقسارۋىنا تىكەلەي اسەر ەتەدى», دەپ جازدى پرەزيدەنت.
ەستەرىڭىزدە بولسا, ەلباسى نۇرسۇلتان نازارباەۆ «Nur Otan» پارتياسىنىڭ كەزەكتى XVIII سەزىندە وسى جىلدىڭ 1 شىلدەسىنەن باستاپ بيۋدجەت سالاسىنداعى ايلىعى تومەن قىزمەتكەرلەردىڭ جالاقىسىن 30 پايىزعا ارتتىرۋدى تاپسىرعان ەدى.