بۇگىن اتىراۋ قالاسىنداعى الماگۇل ىقشام اۋدانىندا قازاقستاننىڭ حالىق جازۋشىسى, ۇلى وتان سوعىسىنىڭ ارداگەرى ءابۋ سارسەنباەۆ ەسكەرتكىشىنىڭ اشىلۋ سالتاناتى ءوتتى.
شاراعا اتىراۋ قالاسىنىڭ تۇرعىندارى, ارداگەرلەر مەن زيالى قاۋىم وكىلدەرى, ءابۋ سارسەنباەۆتىڭ تۋىستارى قاتىستى.
اتىراۋ وبلىسىنىڭ اكىمى نۇرلان نوعاەۆ ەسكەرتكىش وبلىس ورتالىعىنداعى كورنەكتى جەرلەردىڭ قاتارىن تولىقتىراتىنىن اتاپ ءوتتى.
- مەملەكەت باسشىسىنىڭ «رۋحاني جاڭعىرۋ» باعدارلامالىق ماقالاسىن ىسكە اسىرۋ اياسىندا ايماقتا ۇلتتىق قۇندىلىقتاردى دارىپتەۋگە, كاسپي وڭىرىندەگى تاريحي تۇلعالاردى ۇلىقتاۋعا باعىتتالعان شارالار اتقارىلىپ جاتىر, - دەدى نۇرلان نوعاەۆ. -بۇگىنگى شارا حالقىن سۇيگەن, تۋعان جەرىن قاستەرلەگەن اقىنعا, جازۋشىعا دەگەن قۇرمەت. ونىڭ شىعارمالارىنداعى كەيىپكەرلەر ەلدىڭ, قازاق حالقىنىڭ تاعدىرىمەن تىكەلەي بايلانىستى قاراپايىم ادامدار بولدى. تاعدىر ءابۋ سارسەنباەۆپەن تانىس بولۋ باقىتىن بۇيىرتقان ادامدارعا, شىعارماشىلىق مۇراسىن بۇگىنگە دەيىن جەتكىزگەن تۋىستارى مەن جاقىندارىنا العىس ايتامىز. وسى شاراعا قاتىسىپ تۇرعان بارشاڭىزدى اقىننىڭ شىعارماشىلىق مۇراسىن زەرتتەۋگە, ناسيحاتتاۋعا شاقىرامىن.
اشىلۋ سالتاناتىندا ءسوز العاندار ءابۋ سارسەنباەۆتىڭ كەيىپكەرلەرى قاراپايىم ادامدار بولعانىن اتاپ ءوتتى. ونىڭ شىعارمالارىندا بالىقشىلار ءومىرى تۋرالى كوپ ايتىلادى.
ەسكەرتكىشتە جازۋشىنىڭ تۇتاس تۇلعاسى مۇسىندەلگەن, بيىكتىگى – 3,5 مەتر. اۆتورى -قر سۋرەتشىلەر وداعىنىڭ مۇشەسى, مادەنيەت قايراتكەرى ايدارحان قالماحانوۆ.
باقىتگۇل باباش,
«Egemen Qazaqstan»
اتىراۋ