«ديپلوممەن – اۋىلعا!» دايىنسىڭ با بارۋعا؟

ماسەلەن, الماتى وبلىسىندا جوبا باستالعالى بەرى 6253 جاس مامان اۋىلعا ات باسىن بۇرعان ەكەن. ياعني, ەسەپ بويىنشا 2009-2018 جىلدار ارالىعىندا «ديپلوممەن – اۋىلعا!» باعدارلاماسى بو­يىنشا كەلگەندەرگە جالپى سوماسى 785,3 ملن تەڭگە بولاتىن كوتەرمە جاردەماقى بەرىل­گەن. ال بىلتىر بۇل قول­داۋعا 571 جاس مامان يە بولىپتى. 

جالپى, 2009-2018 جىلدار ارالىعىندا «ديپلوم­مەن – اۋىلعا!» جوباسىنا قاتىسۋشىلارعا قانداي ماماندىقتار بويىنشا سۇرانىس تۋدى؟ مالىمەتتەر ەڭ جوعارى كورسەتكىش ءبىلىم سالا­سىنا قاتىستى ەكەنىن كور­سەتەدى. جەتىسۋدىڭ اۋىلدارىنا بالا وقىتۋعا كەل­گەن جاس مۇعالىمدەر سانى 4328 ادامدى قۇراعان. مۇ­نان كەيىنگى ورىن مەديتسينا سالا­سىنا بۇيىرىپتى, 1487 دارىگەر, مەدبيكە سياق­تى ماماندىق يەسى ەلگە ورال­عان. سونداي-اق 236 جاس مامان اگروونەركاسىپ كەشە­نىنە, 113 ادام مادەنيەت مەكە­مە­لەرىنە, 49 جاس الەۋمەتتىك قامسىزداندىرۋ سالاسىنا جانە 40 سپورت مامانى ءوز بولاشاعىن اۋىلمەن باي­لانىستىرۋعا بەل بۋعان ەكەن. ايتپاقشى, جوبا اياسىندا بەرىلگەن تۇرعىن ءۇي ساتىپ الۋ نەسيەسىنىڭ  جالپى كولەمى 7,7 ملرد تەڭگە شاماسىندا. بۇل قارجىعا 2912 جاس مامان باسپانا ساتىپ الدى دەۋگە بولادى.

ەلباسى نۇرسۇلتان نازارباەۆ جاستار جىلىنىڭ اشىلۋىندا سويلەگەن سوزىندە  «ديپلوممەن – اۋىلعا!» جوباسى بويىنشا بەرىلەتىن كوتەرمە اقىنى 70 ايلىق ەسەپ­تىك كورسەتكىشتەن ارتتى­رىپ, 100 پايىزعا دەيىن جەت­كىزۋ تۋرالى ايتقان ەدى. ال­ما­تى وبلىسىنىڭ اكىمدىگى بۇل تاپ­سىرمانى ورىنداۋعا كىرىس­تى. بيىل سۇرانىسقا يە 742 جاس مامان 176750 تەڭ­گە مولشەرىندە كوتەرمە جار­دەم­اقى الادى دەپ كۇتىلۋدە. مۇنان بولەك, تاعى 523 ادام­عا 3787,5 مىڭ تەڭگە مول­شە­رىن­دە جەڭىلدەتىلگەن نەسيە بەرۋ جوسپارلاندى. دەمەك, اۋىل­عا ورالاتىن جاستار قاتارى وسە تۇسپەك.

ايتپاقشى, اۋىلعا ورالۋ دەگەننەن شىعادى, بىلتىر ەلباسى جارلىعىمەن قايتا قۇرىلعان رايىمبەك اۋدانىنا قايتا قونىستانعان جاس­تار قاتارى كوبەيىپ كەلەدى. ايماقتا شەكارالىق ءوڭىر­دى دامىتۋعا باعىتتالعان ءىس تە قارقىندى ءجۇرىپ جاتىر. ماسەلەن, اۋدان ورتا­لى­عى نارىنقول اۋىلىن­دا جاس ما­ماندارعا ارنالعان 109 تۇر­عىن ءۇيدىڭ قۇرىلىسى باس­تال­عان. قازىر 20 ءۇي پايدا­لانۋ­عا بەرىلىپ تە قويعان ەكەن. اۋىل­داعى جاڭادان سالىنعان باسپانا ءبىرىنشى كەزەكتە مەملەكەتتىك قىزمەتكەرلەرگە جالعا بەرۋ ادىسىمەن بولىنگەن. جاڭادان اشىلعان اۋدان بولعاندىقتان, نارىنقولعا كەلىپ تۇراقتاپ جاتقان جاس ماماندار ءۇشىن باسپانا جا­يى قيىندىق تۋعىزعان ەدى. بۇيىر­سا, بيىل قالعان 89 ءۇي دە قولدانىسقا بەرىلمەكشى.

– ەڭ باستىسى, شەكارلىق اۋدان­عا جاستار قايتا ورالا باس­تادى. ەلباسىنىڭ جار­­لى­عى شىققاننان بەرگى ۋا­قىت­­تا اۋدانعا 700 ادام قونىس اۋدار­عان. سوندىقتان جاس ما­مان­داردى باسپانامەن قام­تۋ ەڭ ماڭىزدى ماسەلەلەر قاتا­رىندا. 20 جالعا بەرى­لە­تىن ءۇيدىڭ قۇرىلىسىنا وب­لىس­تىق بيۋدجەتتەن 395,3 ملن تەڭگە بولىنگەن بولاتىن, قازىر بۇل ۇيلەر پايدالانۋعا بەرىلدى, – دەيدى بۇل جايىن­دا وبلىس اكىمى اماندىق باتالوۆ.

جالپى, قايتا قۇرىلعان اۋدانعا باعىتتالعان جۇمىس ناتيجەسى ءبىر جىلعا جۋىق ۋاقىتتىڭ ىشىندە ايقىن ناتي­جە بەرە باستادى. اۋدان ورتا­­­لىعىنداعى  جولدار جون­­دەلدى, جارىقتاندىرۋ جۇر­­گىزىلدى, تۇرعىن ۇيلەر سا­لىن­­دى, بالالار الاڭدارى مەن سپورت­تىق الاڭدار پايدا­لان­ۋ­عا بەرىلدى. مەملەكەت باس­شىسىنىڭ جاستاردى قول­داۋ­عا قاتىستى تاپسىرماسىنان كەيىن دە «ديپلوممەن – اۋىلعا!» باعدارلاماسى بويىنشا كەلەتىندەر سانى ارتاتىنى انىق.

قالماحانبەت مۇقامەتقالي,

«Egemen Qazaqstan»