ەرتەڭ, 26 قاڭتار دۇنيەجۇزىلىك جاتىر موينى وبىرىنا قارسى كۇرەس كۇنى. وسىعان وراي استانادا ماناس كوشەسى №17 مەكەن-جايىندا ونكولوگيا ورتالىعىنىڭ بازاسىندا ونكوگينەكولوگتار, تسيتولوگتاردىڭ قاتىسۋىمەن ونكولوگيالىق اۋرۋلاردىڭ پروفيلاكتيكاسى بويىنشا جانە دەرتتى ەرتە كەزەڭىندە انىقتاۋ ماقساتىندا اشىق ەسىك كۇنى وتەدى. بۇل جايىندا «جمو پروفيلاكتيكاسى, سكرينينگ, ادام پاپيللوماسى ۆيرۋسىنا قارسى ۆاكتسيناتسيا» تاقىرىبىندا بولعان ءباسپاسوز كونفەرەنتسياسىندا ايتىلدى.
2018 جىلدىڭ قورىتىندىسى بويىنشا استانا قالاسىندا جاتىر موينى قاتەرلى ىسىگىمەن 490 ايەل ەسەپكە الىنعان. ايتا كەتكەن ءجون, ونكواۋرۋلارعا شالدىعۋدىڭ ستاتيستيكاسىنا زەر سالعاندا ايەلدەردىڭ جاتىر موينىنىڭ قاتەرلى ىسىگى ءۇشىنشى ورىندا تۇر. 2017 جىلى وسى دەرتتىڭ تىرناعىنا ىلىنگەندەر سانى 436 بولعان ەكەن, ياعني وتكەن جىلمەن سالىستىرعاندا اۋرۋدىڭ وسكەنى بايقالىپ, ءولىم-ءجىتىم 100 مىڭ حالىققا شاققاندا 2,5-تەن 2,7 دەيىن ارتىپ وتىر.
جىل سايىن 80-نەن (8,2) استام ايەل جاتىر موينى وبىرىمەن اۋىرىپ, 29 ايەل (2,7) قايتىس بولاتىنىن ايتقان ماماندار, قاتەرلى دەرتتىڭ الدىن الۋ ماقساتىندا ەرتەڭ, 26 قاڭتاردا ەلوردالىق قىز-كەلىنشەكتەردى ماناس 17, ونكولوگيالىق ديسپانسەردە اشىق ەسىك كۇنى كەلىپ تەكسەرىلىپ كەتۋگە شاقىراتىنىن جەتكىزدى.
انار تولەۋحانقىزى