قاراعاندى قالاسىنداعى №92 گيمنازيادا اشىلعان «قاسىمتانۋ» ادەبيەت بولمەسىنە داۋىلپاز اقىن قاسىم امانجولوۆتىڭ كىتاپتارى, وقۋشىلاردىڭ وعان ارناعان جوبالارى مەن عىلىمي جۇمىستارى, سونداي-اق جەرلەس اقىن-جازۋشىلاردىڭ شىعارمالارى جيناقتالعان.
ادەبيەت بولمەسىنىڭ ءدال وسى مەكتەپتە اشىلۋى كەزدەيسوقتىق ەمەس. ويتكەنى, بۇل جەردە جىل سايىن «قاسىم وقۋلارى» اتتى اقىندار ءمۇشايراسى ءوتىپ تۇرادى. بۇدان بولەك, بيىل اتالعان گيمنازيانىڭ وقۋ باعدارلاماسىنا «قاسىمتانۋ» كۋرسى ەنگىزىلگەن.
«قاسىمتانۋ» بولمەسىنىڭ اشىلۋ سالتانىندا اقىن سەرىك اقسۇڭقار ۇلى قۇتتىقتاۋ ءسوز سويلەدى.
– قاراعاندى – قاسىمنىڭ تۋعان ولكەسى, ول وسىندا دۇنيەگە كەلگەن. مۇندا, قازاق گيمنازياسىندا, ونىڭ تۋعان جەرىندە «قاسىمتانۋ» بولمەسىن اشۋ – ايتۋلى وقيعا. ءبىز بۇعان وتە قۋانىشتىمىز. كەلەشەكتە بۇل جەردەن ەلىن سۇيەتىن ناعىز پاتريوتتار تاربيەلەنىپ شىعادى دەپ ويلايمىن, – دەدى اقىن.
«قاسىمتانۋ» بولمەسى وقۋشىلاردى كىتاپ وقۋعا باۋلىپ, ولارعا جەرلەس اقىننىڭ شىعارماشىلىعى تۋرالى جان-جاقتى مالىمەت بەرۋ ماقساتىندا اشىلعان.
قايرات ءابىلدا,
«Egemen Qazaqstan»
قاراعاندى