«استانا تايگەرس» ايەلدەر كلۋبى ەۋروپا باسكەتبول ليگاسىنىڭ پلەي-وفف كەزەڭىنەن سىرت قالدى. بۇل تۋرالى ۇلتتىق وليمپيادالىق كوميتەتتىڭ رەسمي سايتى حابارلادى.
چەحيانىڭ وستراۆا قالاسىندا وتكەن سوڭعى تۋردا استانالىقتار مينسكىنىڭ «تسموكي» جانە جەرگىلىكتى «سبس» كوماندارىمەن كەزدەسكەن بولاتىن.
ءبىرىنشى ويىندا استانالىقتار 49:68 ەسەبىمەن بەلارۋس كومانداسىنا جول بەردى. ال ەكىنشى ماتچتا الاڭ يەلەرىنەن 74:55 ەسەبىمەن باسىم ءتۇستى.
دەسە دە, توپتان شىعۋ ءۇشىن بۇل جەڭىس جەتكىلىكسىز ەدى. استانالىق كوماندا جالپى تۋرنير بارىسىندا ەكى رەت جەڭىسكە جەتىپ, بەس رەت جەڭىلىسكە ۇشىرادى. قورىتىندى كەستەدە 6-شى ورىندا تۇر.
ەسكە سالا كەتەيىك, 2015/2016 جىلعى ماۋسىمدا «استانا تايگەرس» كلۋبى «ەۋروپا ايەلدەر باسكەتبول ليگاسىنىڭ» قولا جۇلدەسىن يەلەندى. كەيىن كوماندا باسشىلىعى شەتەلدىك ويىنشىلاردان باس تارتىپ, كلۋب تولىعىمەن جەرگىلىكتى ويىنشىلاردان جاساقتالعان بولاتىن.
بۇگىندە «تايگەرستىڭ» 90 پايىزى ۇلتتىق قۇراما مۇشەلەرىنەن قۇرالعان.