مەملەكەت تاراپىنان, اسىرەسە ەلباسىنىڭ جەكە باستاۋىمەن جاستارعا كورسەتىلىپ وتىرعان قامقورلىق پەن قولداۋ از ەمەس. ءبىلىم سالاسىندا جاس مامانداردى اۋىلعا تارتۋدى كوزدەيتىن «ديپلوممەن اۋىلعا» باعدارلاماسى, شەتەلدە ءبىلىم الۋعا مۇمكىندىك بەرەتىن «بولاشاق» حالىقارالىق ستيپەندياسى, «سەرپىن» باعدارلاماسى جۇزەگە ءساتتى اسىرىلىپ كەلەدى.
«StartapBolashak» بيزنەس-جوبالار بايقاۋى عىلىم مەن تەحنولوگيا, يننوۆاتسياعا جاقىن جاس قازاقستاندىقتاردىڭ تانىلۋىنا مۇمكىندىك بەرەدى. عىلىم, شىعارماشىلىق, قوعامدىق قىزمەت, سپورتتا ەرەكشە كوزگە تۇسكەن تالانتتى جاستارعا «دارىن» مەملەكەتتىك جاستار سىيلىعى تابىستالادى. پرەزيدەنتتىڭ تاپسىرماسىمەن قابىلدانعان «7-20-25» باعدارلاماسى ءار جاس وتباسىعا ىڭعايلى شارتتارمەن باسپانا الۋعا مۇمكىندىك بەرەدى.
جاستار ەلىمىزدىڭ جارقىن بولاشاعىنا جەتەلەيتىن باستى قوزعالتقىش بولىپ تابىلادى. وسى ورايدا, ەلباسى مەن قازاقستان حالقىنىڭ جاستارعا ءۇمىت ارتۋى ورىندى ەكەنىنە كۇمان جوق. ەلباسىنىڭ جاستار جىلىنىڭ اشىلۋى كەزىندە جاس ۇرپاقتىڭ الەۋمەتتىك جاعدايىن كوتەرۋگە ارنالعان تاپسىرمالارى ولاردىڭ ەل ەكونوميكاسى مەن رۋحانياتىن دامىتۋىنا ۇلكەن دەمەۋ بولارى ءسوزسىز. ءوز كەزەگىندە ولار دا وتانىنا ادال قىزمەت ەتىپ, وركەنيەتكە ۇمتىلارى انىق. جاستار بىلىمىمەن, تاربيەسىمەن, وتانسۇيگىشتىگىمەن, ەڭبەكقورلىعىمەن باسەكەگە ءتۇسۋى كەرەك.
ءالىمجان قۇرتاەۆ,
سەنات دەپۋتاتى