الەۋمەتتىك باعدارلانعان مەملەكەتتىك باعدارلامالاردىڭ وپەراتورى رەتىندە «بايتەرەك» حولدينگى مەن ونىڭ ەنشىلەس ۇيىمدارى تۇرعىنداردى قولجەتىمدى باسپانامەن, جۇمىسپەن جانە بيزنەس-جوبالاردى دامىتۋعا ارنالعان قۇرالدارمەن قامتاماسىز ەتۋدە ماڭىزدى ءرول اتقارادى.
وسى تەكتەس مىندەتتەردى شەشۋ ءۇشىن حولدينگ جاستار باستامالارىن ىسكە اسىرۋعا باعىتتالعان بىرقاتار جوبانى جۇزەگە اسىرۋدا. بۇل - مەملەكەت باسشىسى نۇرسۇلتان نازارباەۆتىڭ جاستار جىلىنىڭ سالتاناتتى اشىلۋىندا قويعان مىندەتتەرىنە سايكەس كەلەدى.
ماسەلەن, «دامۋ» قورى ارقىلى جاستار كاسىپكەرلىگىنە قولداۋ كورسەتىلەدى. «ەڭبەك» ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017 – 2021 جىلدارعا ارنالعان باعدارلاماسى بويىنشا ميكرو جانە شاعىن بيزنەس سەكتورىنداعى باستاۋشى كاسىپكەرلەرگە ينۆەستيتسيالاۋعا بەس جىلعا دەيىنگى مەرزىممەن 6 پايىزدان اسپايتىن مولشەرلەمەمەن, جەڭىل شارتتارمەن 8 مىڭ اەك-كە دەيىن نەسيە بەرىلەدى. سونىمەن قاتار, باعدارلاما قاتىسۋشىلارى قارىز سوماسىنىڭ 85 پايىزىنا دەيىن كەپىلدىك الۋ مۇمكىندىگىنە يە.
2018 جىلى ىسكە قوسىلعان كراۋدفاندينگ قىزمەتى - جوبانى ۇجىمدىق قارجىلاندىرۋ ءتاسىلى. وندا ءونىم نەمەسە قىزمەت جاساۋ ءۇشىن اقشا تۇتىنۋشىلاردان تۇسەدى. قور جاڭادان ءىس باتاعان كاسىپكەرلەرگە قۇجات تاپسىرۋ, Starttime.kz كراۋدفاندين تۇعىرناماسىندا ءتۇرلى مەملەكەتتىك گرانتتار الۋعا وتىنىمدەر بەرۋ جانە باسقا دا جۇمىستارعا كونسۋلتاتسيالىق-پراكتيكالىق قولداۋ كورسەتەدى.
سونىمەن قاتار, «دامۋ» قورى جەرگىلىكتى اتقارۋشى ورگاندارمەن بىرىگىپ, باستاۋشى كاسىپكەرلەرگە ارنالعان ايماقتىق باعدارلامالاردى جۇزەگە اسىرادى. مىسالى, «استانا ZhastStart» جانە «اقتوبە ZhasStart» باعدارلامالارى 29 جاسقا دەيىنگى جاستارعا ارنالعان. ولار ارقىلى بەرىلەتىن نەسيە سوماسى 20 ملن. تەڭگەدەن, پايىزدىق مولشەرلەمەسى – 8,5% اسپايدى. «استانا Start Up» باستاۋشى كاسىپكەرلەرگە 7,9% مولشەرلەمەسى بويىنشا 50 ملن تەڭگەدەن اسپايتىن قارىز سوماسىنا دەيىن قولداۋدى كوزدەيدى. باسقا باستامالار قاتارىندا «نۇر كاپيتال» (ماڭعىستاۋ وبلىسى), «قوس قولداۋ» (قوستاناي وبلىسى), «دامۋ اقجايىق» (باتىس قازاقستان وبلىسى), «التىن كەمە» (اتىراۋ وبلىسى), «جىبەك جولى» (الماتى) جانە باسقا باعدارلامالاردى اتاپ وتكىم كەلەدى.
قولداۋدىڭ تاعى ءبىر باعىتى - «قازاقستاننىڭ تۇرعىن ءۇي قۇرىلىس جيناق بانكى» اق ارقىلى جۇرگىزىلەدى. ونداعى ماقسات – جاس ازاماتتاردى تۇرعىن ۇيمەن قامتاماسىز ەتۋ. قازىر بۇل جوبا «الماتى جاستارى» باعدارلاماسى شەڭبەرىندە جۇزەگە اسىرىلۋدا.
وسى باعدارلامانى ىسكە اسىرۋ ءۇشىن الماتى قالاسىنىڭ اكىمدىگى مەن قتقجب اراسىندا كەلىسىم جاسالدى, الدىن الا جانە ارالىق تۇرعىن ءۇي قارىزدارىن بەرۋ ءۇشىن بانككە بيۋدجەتتىك نەسيە ءبولىندى, ونىڭ جالپى سوماسى –3 ملرد. تەڭگە. باعدارلاماعا قاتىسۋشىلارعا ەرلى-زايىپتىنىڭ جاسى 35 جاسقا دەيىن بولۋى, الماتىدا كەم دەگەندە ءبىر جىل تۇراقتى تىركەۋدە تۇرۋى, وتباسىنىڭ جەكە باسپاناسىنىڭ بولماۋى, الماتىدا كەمىندە التى اي جۇمىس ءوتىلى, قوسىمشا كەپىلدىك نەمەسە قتقجب-دا تۇرعىن ءۇي قۇرىلىسى جيناقتارىنىڭ بولۋى سىندى تالاپتار قويىلادى. نەسيەنىڭ جىلدىق مولشەرلەمەسى – 5 پايىز, مەرزىمى – 9 جىلعا دەيىن.
حولدينگتىڭ تاعى ءبىر ەنشىلەس ۇيىمى - قازاقستاننىڭ دامۋ بانكى «Taiburyl» قوعامدىق بىرلەستىگىمەن بىرلەسىپ «كەرەك ادام» الەۋمەتتىك ءبىلىم بەرۋ جوباسىن ىسكە اسىرۋدا. جوبا شەڭبەرىندە ورتا ارنايى جانە جوعارى وقۋ ورىندارىنىڭ 3-4 كۋرس ستۋدەنتتەرى مەن 2015-2018 جىلعى تۇلەكتەرى ەلىمىزدىڭ ءىرى كاسىپورىندارىندا اقىسى تولەنەتىن تاعىلىمدامادان وتەدى.
جالپى, «بايتەرەك» حولدينگى جاستاردى قولداۋدىڭ قارجىلىق جانە كونسۋلتاتسيالىق قۇرالدارىنان بولەك, كادرلىق ساياساتتى دا قولعا الىپ وتىر. بۇگىندە حولدينگ قىزمەتكەرلەرىنىڭ 17 پايىزى – 29 جاسقا دەيىنگى جاس ماماندار.
ايدار ءارىپحانوۆ,
«بايتەرەك» ۇلتتىق باسقارۋشى حولدينگى» اق باسقارما توراعاسى