قازاق ۇلتتىق قىزدار پەداگوگيكالىق ۋنيۆەرسيتەتىندە تۇڭعىش رەت حالىقارالىق ءبىلىم كۇنىنە ارنالعان جيىن ءوتتى.
يۋنەسكو-نىڭ قازاقستان, قىرعىزستان, تاجىكستان جانە وزبەكستان بويىنشا كلاستەرلىك بيۋروسى وكىلدەرى, جوعارى وقۋ ورىندارىنىڭ وقىتۋشىلارى مەن ءبىلىم بەرۋ ۇيىمدارىنىڭ قىزمەتكەرلەرىنىڭ قاتىسۋىمەن وتكەن باسقوسۋدا قازاقستاننىڭ 2030 جىلعا دەيىن تۇراقتى دامۋىن قامتاماسىز ەتۋگە ىقپال ەتەتىن 17 باسىم باعىتتاعى ءبىلىم بەرۋدىڭ ماڭىزى انىقتالىپ, ونى كەڭىنەن ناسيحاتتاۋ تۇرعىسىندا بىرقاتار ماڭىزدى مىندەتتەر كەڭىنەن تالقىلاندى. سونىمەن قاتار كەڭەس قاتىسۋشىلارى سالاداعى تۇيىتكىلدى ماسەلەلەردى شەشۋ جولدارىن دا قاراستىردى.
جيىندى ستراتەگيالىق دامۋ جانە حالىقارالىق بايلانىستار جونىندەگى پرورەكتورى لاززات بۋلەباەۆا اشىپ, شارانىڭ ماڭىزى تۋراسىندا وي ءوربىتتى.
– وزىندىك دارا ءداستۇرى بار – قىزدار ۋنيۆەرسيتەتى وتاندىق جوعارى وقۋ ورىندارىنىڭ اراسىندا تەك قىزداردان پەداگوگ ماماندارىن دايارلايتىن الەمدەگى بىرەگەي ءبىلىم ورداسى. اتاۋلى كۇننىڭ ءبىلىم مەن عىلىم قاراشاڭىراعىندا اتالىپ ءوتىلۋى ۋنيۆەرسيتەت قىزمەتىمەن تىكەلەي بايلانىستى جانە سيمۆولدىق ءمانى بار دەپ ويلايمىن. ەلىمىز ءبىلىم بەرۋ سالاسىنداعى گەندەرلىك تەڭدىك كريتەريى بويىنشا الەمدىك رەيتينگتە جوعارى كورسەتكىشكە يە. بارشاڭىزعا بەلگىلى, قازاقستاندا ءبىلىم الۋشىلار اراسىندا گەندەرلىك شەكتەۋ نەمەسە تەڭسىزدىك جوق. وتاندىق جوعارى وقۋ ورىندارىنداعى ستۋدەنتتەر, ماگيسترانتتار مەن دوكتورانتتاردىڭ اراسىندا قىزداردىڭ ۇلەس سالماعى باسىم. «بولاشاق» ستيپەندياسىنىڭ يەگەرلەرىنىڭ تىزىمىندە دە نازىكجاندىلاردىڭ سانى كوپ, – دەدى ل. بۋلەباەۆا.
سونداي-اق ول وسى تاراپتا اتقارىلىپ جاتقان بىرقاتار جۇمىستارعا دا توقتالىپ ءوتتى.
– ۇلتتىڭ بولاشاعى, ۇرپاقتىڭ كەلەشەگى – قىزدارعا تىكەلەي بايلانىستى. ۋنيۆەرسيتەت ءوز قىزمەتىندە مەملەكەت بولاشاعىن تاربيەلەۋگە سۇبەلى ۇلەس قوساتىن بولاشاق مۇعالىمدەردىڭ سان قىرلى بولۋىن, ولاردىڭ قوعامداعى الەۋمەتتىك جانە وتباسىنداعى ەتنوالەۋمەتتىك رولدەردى مۇلتىكسىز اتقارۋىن باستى نازاردا ۇستايدى. وسى ورايدا ستۋدەنتتەردىڭ زياتكەرلىك جانە شىعارماشىلىق الەۋەتىن كوتەرۋ ماقساتىندا ۇيىرمەلەر, روبوتوتەحنيكا كابينەتى جۇمىس ىستەيدى, سونداي-اق بىلىمگەرلەر ستارتاپ كونكۋرستار مەن عىلىمي كونفەرەنتسيالارعا جانە وليمپيادالارعا تۇراقتى تۇردە قاتىسادى. STEM ءتاسىلى بويىنشا اعىلشىن تىلىندە ساباق بەرۋ دە جۇرگىزىلۋدە. بۇل باستاما – وقۋ ورنى تۇلەكتەرىنىڭ باسەكەگە قابىلەتتىگىن ارتتىرىپ, ولاردىڭ جۇمىسپەن قامتاماسىز ەتۋىنە ىقپال جاسايدى. ءبىزدىڭ وقۋ ورنى ستۋدەنتتەرىنىڭ باسىم بولىگى اۋىلدىق مەكتەپتەردىڭ تۇلەگى ەكەندىگىن ەسكەرەتىن بولساق, اتالعان ءبىلىم ۇيالارى جاڭا ءبىلىم بەرۋ باعدارلامالارىن تولىققاندى مەڭگەرىپ, جەتە تانىسقانى وتە ماڭىزدى, – دەپ اتاپ ءوتتى لاززات بۋلەباەۆا.
قىزدار ۋنيۆەرسيتەتىنىڭ باستاماسىمەن ەلىمىزدە العاش رەت اتالىپ ءوتىلىپ وتىرعان اتاۋلى داتا بىرىككەن ۇلتتار ۇيىمىنىڭ باس اسسامبلەياسىنىڭ بەكىتۋىمەن وتكەن جىلدىڭ جەلتوقسان ايىندا قابىلدانعان بولاتىن. وقۋ ورنى مەن يۋنەسكو-نىڭ قازاقستان, قىرعىزستان, تاجىكستان جانە وزبەكستان بويىنشا كلاستەرلىك بيۋروسىنىڭ ءوزارا ىنتىماقتاستىعى ناتيجەسىندە الماتىلىق جاس عالىمداردىڭ باستاماسىمەن جاستار جىلى قارساڭىندا قولعا الىنعان بىرقاتار جوبالار مەن باستامالار كوپشىلىك نازارىنا ۇسىنىلدى. سونىمەن قاتار يۋنەسكو وكىلدەرى تاقىرىپقا وراي پرەزەنتاتسيا جاساپ, ءبىلىم بەرۋدىڭ ماڭىزىنا كەڭىنەن توقتالدى.
شارادا قىزدار ۋنيۆەرسيتەتىنىڭ جاس پەداگوگ-عالىمدارىنىڭ باستاماسىمەن «t2t Networking» اتتى جوبانىڭ ءمانى كوپشىلىك نازارىنا ۇسىنىلدى. ۋنيۆەرسيتەت بازاسىندا قۇرىلعان قازاقستاننىڭ جاس پەداگوگ-عالىمدارى قاۋىمداستىعىنىڭ ۇيىتقى بولۋىمەن قولعا الىنعان جوبا ورتا ءبىلىم بەرۋ سالاسىندا باسشىلىق قىزمەت اتقاراتىن ۋنيۆەرسيتەت تۇلەكتەرى مەن ەلىمىزدىڭ پەداگوگيكالىق جوعارى وقۋ ورنىنداعى جاس عالىمداردىڭ ورتاق ديالوگ الاڭىن قۇرىپ, اۋىلدىق جەردە ورنالاسقان مەكتەپتەردىڭ عىلىمي-پەداگوگيكالىق الەۋەتىن كوتەرۋدى ماقسات تۇتادى. بۇل باستاما – وقۋ ورنى تۇلەكتەرىنىڭ باسەكەگە قابىلەتتىگىن ارتتىرىپ, ولاردىڭ جۇمىسپەن قامتاماسىز ەتۋىنە ىقپال جاسايدى. ۋنيۆەرسيتەت ستۋدەنتتەرىنىڭ باسىم بولىگى اۋىلدىق مەكتەپتەردىڭ تۇلەگى ەكەندىگىن ەسكەرەتىن بولساق, اتالعان ءبىلىم ۇيالارى جاڭا ءبىلىم بەرۋ باعدارلامالارىن تولىققاندى مەڭگەرىپ, جەتە تانىسقانى وتە ماڭىزدى.
سونداي-اق الماتى قالاسىندا بىرقاتار مەكتەپ مۇعالىمدەرى مەن وقۋشىلارى اتالعان جوبا تۋرالى وزىندىك پىكىرلەرىن ايتىپ, وقۋشىلاردىڭ عىلىمعا دەگەن ەرەكشە قىزىعۋشىلىعىن تۋدىراتىنىن تىلگە تيەك ەتتى.
ايتا كەتەيىك, حالىقارالىق ءبىلىم كۇنىنە ارنالعان جيىندى م. اۋەزوۆ اتىنداعى وقمۋ, ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتى, پاۆلودار مەملەكەتتىك پەداگوگيكالىق ۋنيۆەرسيتەتى, ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتى, قوستاناي مەملەكەتتىك پەداگوگيكالىق ۋنيۆەرسيتەتى جانە ش. ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ پروفەسسور-وقىتۋشىلارى ونلاين رەجيمىندە تاماشالادى.
جاندار اسان