ءبىلىم ورداسىنىڭ جاڭا باسشىسى بولىپ, قوستاناي قالاسىنداعى جوعارى پوليتەحنيكالىق كوللەدجدىڭ ديرەكتورى, وبلىستىق ءماسليحاتتىڭ دەپۋتاتى, ەكونوميكا عىلىمدارىنىڭ كانديداتى الما دوسجانوۆا تاعايىندالدى.
وتكەن جىلدىڭ 4-جەلتوقسانىندا ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنىڭ رەكتورى لاۋازىمىنا جاريالانعان كونكۋرسقا 9 عالىم قاتىسقان بولاتىن. بارلىق ءتيىستى سىناقتاردان كەيىن رەسپۋبليكالىق كوميسسيا جاسىرىن داۋىسپەن ۋنيۆەرسيتەت رەكتورىن انىقتادى. تاڭداۋ الما دوسجانوۆاعا ءتۇستى.
الما ىرگەبايقىزى دوسجانوۆا – پروفەسسور, وبلىستىق ءماسليحات دەپۋتاتى, وندا بيۋدجەت, ونەركاسىپ, شاعىن جانە ورتا بيزنەستى دامىتۋ ماسەلەلەرى جونىندەگى كوميسسيا ءتورايىمى, «نۇر وتان» پارتياسى ساياسي كەڭەستىڭ مۇشەسى, پارلامەنت ماجىلىسىندە قر ء«بلىم تۋرالى» زاڭى جوباسى بويىنشا ساراپشىلار توبىنىڭ مۇشەسى بولعان.
الما ىرگەبايقىزى قوستاناي وبلىسىنداعى بۇرىنعى لەنين اۋدانىندا تۋعان. ارقالىق قالاسىندا مەكتەپتى بىتىرگەن, قوستاناي اۋىل شارۋاشىلىعى ينستيتۋتىنان ەكونوميست ماماندىعى بويىنشا ءبىلىم الدى. وسى وقۋ ورنىندا كىشى عىلىمي قىزمەتكەر بولا ءجۇرىپ, 2000-شى جىلى كانديداتتىق ديسسەرتاتسياسىن قورعادى. 2004 جىلى «يننوۆاتسيالىق-كەڭەس ورتالىعى» قوعامدىق بىرلەستىگىن قۇردى. قوستاناي پوليتەحنيكالىق جوعارى كوللەدجىن باسقاردى. وندا ءجۇرىپ بىرنەشە تابىستى جوبالاردى جۇزەگە اسىردى: رەسەي, فرانتسيا, گەرمانيا, فينليانديا, سولتۇستىك كيپر, تۋركيا جوعارى وقۋ ورىندارىمەن حالىقارالىق ىنتىماقتاستىق ورناتتى. باسقا دا وزەكتىلىگىمەن قۇندى جوبالاردى جۇزەگە اسىردى.
سونىمەن قاتار الما ىرگەبايقىزى باسقارعان جوعارى پوليتەحنيكالىق كوللەدج تەحنيكالىق جانە كاسىپتىك ءبىلىم بەرەتىن مەكەمەلەر اراسىندا وبلىس جانە رەسپۋبليكا بويىنشا ۇزدىك كوللەدج دەپ مويىندالدى.
ءنازيرا جارىمبەت,
Egemen Qazaqstan
قوستاناي