جاستار جىلىنىڭ رەسمي اشىلۋىنا وراي وتكەن فورۋم جوعارى دەڭگەيدە ۇيىمداستىرىلدى. مەملەكەت باسشىسى جاستاردىڭ كورنەكتى وكىلدەرىنىڭ وي-ۇسىنىستارىن تىڭداپ, ولار بويىنشا ۇكىمەتكە ناقتى تاپسىرما بەردى.
تاپسىرمانىڭ بارلىعى جاستار اسا ءزارۋ 4 سالانى قامتيدى – ءبىلىم الۋ, جۇمىس, باسپانا مەن وتباسىن قۇرۋعا جاعدايدىڭ بولۋى. وزگەسىن ايتپاي-اق نازارىمدى اۋدارتقان جاڭالىق – شاعىن نەسيە بەرۋدىڭ جانە وقىتۋ ءىسىنىڭ وڭ تاجىريبەسى نەگىزىندە بارلىق وڭىردە «جاس كاسىپكەر» باعدارلاماسىن ازىرلەۋ قاجەت دەدى. ودان بولەك ۇكىمەتكە «بيزنەستىڭ جول كارتاسى-2020» باعدارلاماسى اياسىندا جاس كاسىپكەرلەر ءۇشىن گرانت بويىنشا بولىنەتىن قارجى كولەمىن ەكى ەسە ارتتىرۋدى تاپسىرۋى. بۇل جاستاردىڭ كاسىپكەرلىكپەن اينالىسۋ ىنتاسىن ارتتىرىپ, ولارعا مۇمكىندىك تۋعىزۋ, ءبىلىم مەن بىلىك باسەكەلەستىگى دەندەگەن زاماناۋي جاعدايدا اسا قاجەتتى قادامدار ەكەنى ماڭىزدى.
تاعى ءبىر ەرەكشە ىنتىزارلىقپەن قابىلداعان جاڭالىعىم, ۆولونتەرلىقپەن اينالىساتىن ستۋدەنتتەردىڭ ستيپەندياسىن 30 پايىزعا كوتەرۋدى ۇكىمەتكە تاپسىرۋى. مەنىڭشە, وتە قاجەتتى باستاما. بارشا الەمدە جاستاردىڭ ومىردەن ءوز ورنىن تاۋىپ, كىرپىش بولىپ قالانۋى ولاردىڭ الەۋمەتتەنۋىنە بايلانىستى. قوعامدىق جۇمىسقا ارالاسىپ, ەرىكتى رەتىندە قوعام يگىلىگى ءۇشىن ىزگى امالعا كوپ بارعان جان ەڭ الدىمەن ەلگە جاناشىر.
الەمنىڭ ماڭدايالدى جوعارى وقۋ ورىندارى وقۋعا قابىلداردا جاس ازاماتتىڭ ۆولونتەرلىقپەن قانشالىقتى اينالىسقانىنا زور ءمان بەرەدى. جۋرناليست ءارى پەداگوگ رەتىندە كوڭىلىمدى سەرپىلتكەنى – پرەزيدەنتتىڭ ىرگەلى جانە قولدانبالى عىلىمدار زەرتتەۋلەرىن گرانتتىق قارجىلاندىرۋدى 3 ميلليارد تەڭگەگە كوبەيتۋ تۋرالى ۇكىمەتكە تاپسىرماسى.
قانات اۋەسباي,
پرەزيدەنت جانىنداعى جاستار ساياساتى جونىندەگى كەڭەس مۇشەسى, قر تۇڭعىش پرەزيدەنتى-ەلباسى كىتاپحاناسىنىڭ اعا ساراپشىسى