موڭعوليادان كەلگەن بۇركىتشى قىز ايشولپان نۇرعايىپقىزى قازاقستان پرەزيدەنتى نۇرسۇلتان نازارباەۆقا العىسىن ايتتى. بۇل تۋرالى Sputnik قازاقستان حابارلادى.
ايشولپان جاستار جىلىنىڭ اشىلۋ سالتاناتىندا ەلباسىنىڭ الدىندا ءسوز سويلەگەنىنە وتە قۋانىشتى ەكەنىن ايتتى. ازداپ قوبالجىعانىن دا جاسىرمادى.
«بۇل مەن ءۇشىن ۇلكەن ابىروي بولدى دەپ سانايمىن. ەلباسىنى كورۋ مەنىڭ ارمانىم بولاتىن. كەشە سول ارمانىم ورىندالدى. استانادا, اتامەكەنىمدە ءبىلىم الىپ جاتقانىما قۋانامىن. وسىنداي ادەمى ەلوردانى سالعان نۇرسۇلتان ءابىش ۇلى, سىزگە العىسىم شەكسىز», دەدى بۇركىتشى قىز Sputnik مۋلتيمەديالىق ءباسپاسوز ورتالىعىندا.
ايشولپان قازىر اعىلشىن ءتىلىن جاقسارتىپ جۇرگەن ەكەن. سونداي-اق, ول استانانىڭ ادامدارى مەن كليماتىنا توقتالدى.
«ماعان استانا قاتتى ۇنادى, ادامدارى دا وتە جاقسى. نەگىزى, ءبىزدىڭ ەلگە قاراعاندا جىلى دەپ ايتسام بولادى. بىزدە بۇدان دا قاتتى سۋىق بولادى», دەيدى وقۋشى قىز.
بۇركىتشى قىز قازاقستاندىق تاراپتىڭ شاقىرۋىمەن Spectrum حالىقارالىق مەكتەبىندە 11-سىنىپتا وقيدى.
ء«بىلىم وردا» حالىقارالىق قوعامدىق قورىنىڭ پرەزيدەنتى دارحانبەك قوجابەكوۆتىڭ ايتۋىنشا, مەكتەپ وقۋشىلارى كەمبريدج باعدارلاماسىمەن وقىتىلادى. ال ءبىلىم ورداسىنىڭ ءوزى 12 جىلدىق.
«ايشولپان قازىر اعىلشىن ءتىلىن ۇيرەنىپ ءجۇر. بىزگە كەلگەندە, دەڭگەيى ءسال تومەن بولعان سوڭ, ءبىز قوسىمشا ساباقتار وتكىزىپ ءجۇرمىز, مۇعالىمدەر دە كومەكتەسەدى. بىراق, كوپ ەل ارالاعاننىڭ اسەرى بولۋى كەرەك, ايشولپان ءتىلدى وڭاي الىپ كەتىپ جاتىر. قابىلەتى بار. ساباعىن دا وقىپ, جۋرناليستەرگە سۇقبات بەرىپ تە ۇلگەرەدى», دەيدى قوجابەكوۆ.
حالىقارالىق مەكتەپتە تەگىن وقيتىن ايشولپانعا شاكىرتاقى دا تاعايىندالعان.
جۋىردا بۇركىتشى قىز قىسقى دەمالىستاردا موڭعولياداعى اتا-اناسىنا بارىپ كەلگەن.
«ارينە, ول مەكتەپتىڭ جۇلدىزى, ءبارى وعان قولداۋ كورسەتەدى. ءبىرىنشى كۇنى مەكتەپكە بۇركىتتى اكەلىپ, ءباسپاسوز ءماسليحاتىن وتكىزدىك», دەيدى قور پرەزيدەنتى.
23 قاڭتار كۇنى استانادا جاستار جىلىنىڭ اشىلۋىنا ارنالعان سالتاناتتى جيىندا ايشولپان نۇرعايىپقىزى قازاقستان پرەزيدەنتىن بايان-ولگيگە قوناققا شاقىرعان بولاتىن.