رۇقسات قاعازدارى جوق تاۋارلار ەلگە كىرگىزىلمەدى

5 توننا ءيىسسۋ

قورداي شەكارا وتريادىنا قاراستى «قاراسۋ-اۆتو» باقىلاۋ بولىمشەسىندە «سكانيا» اۆتوكولىگىمەن قىرعىز رەسپۋبليكاسىنان ەلىمىزگە قاراي پارفيۋمەريالىق زاتتار (ايەلدەر ءيىسسۋلارى) الىپ كەلە جاتقان 29 جاستاعى قازاقستاندىق ۇستالدى.

جالپى سالماعى 5 توننادان استام ءيىسسۋ اكتىلەنىپ جامبىل وبلىسى بويىنشا مەملەكەتتىك كىرىس دەپارتامەنتىنىڭ قىزمەتكەرلەرىنە تاپسىرىلدى.

اسقاباقتار

ءدال وسى بولىمشەدە 2019 جىلدىڭ 24 قاڭتارىندا, ساعات 18-دەر شاماسىندا «مان» جۇك كولىگىمەن كورشى ەلدەن قازاقستانعا قاراي 13 توننا اسقاباق اكەلە جاتقان 33 جاستاعى قازاقستاندىق ۇستالدى. كەشە, تاڭعى 4-تەردە ءدال وسىنداي جۇك كولىگىمەن 8 توننا اسقاباقتى زاڭسىز وتكىزبەكشى بولعان تاعى ءبىر 33 جاستاعى قازاقستاندىق ۇستالعان بولاتىن. تاۋار اكتىلەنىپ جامبىل وبلىسى بويىنشا مەملەكەتتىك كىرىس دەپارتامەنتىنىڭ قىزمەتكەرلەرىنە تاپسىرىلدى.

قۇرت

اتالعان وتريادتىڭ «قورداي-اۆتو» بولىمشەسىندە ساعات 22-لەر شاماسىندا 35 جاستاعى رەسەيلىك ۇستالدى. ول ەلىمىزگە 40 كگ قۇرت ء(سۇت ءونىمى) اكەلە جاتقان ەكەن.

قىتاي ءدارى-دارمەگى

قورعاس شەكارالىق باقىلاۋ وتريادىنىڭ «شەكارا بويى حالىقارالىق ىنتىماقتاستىعى ورتالىعى» بولىمشەسىننىڭ شەكارا ناريادى 2019 جىلعى 24 قاڭتار كۇنى, ساعات 17.00 شاماسىندا ىنتىماقتاستىق ورتالىعىنان, شەكارالىق جانە كەدەندىك باقىلاۋدان ءوتىپ, قايتىپ كەلە جاتقان 23 جاستاعى قازاقستاندىقتى ۇستادى. ول ەشقانداي رۇقسات قۇجاتتارىنسىز 80 كگ-عا جۋىق قىتاي ءدارى-دارمەگىن ەلىمىزگە وتكىزبەك بولىپتى.

سول ورتالىقتىڭ قازاقستان اۋماعىنا قاراي كىرەتىن زالىنان شەكارا ناريادى ساعات 19-داردا قىتاي ءدارى-دارمەگى تولتىرىلعان, جالپى سالماعى 45 كگ-عا جۋىق, تاعى دا ەكى قوراپ تاۋىپ الدى. بۇل قوراپتاردىڭ يەسى تابىلعان جوق.

تاركىلەنگەن ءدارى-دارمەك اكتىمەن «التىنكول» كەدەن بەكەتىنە تاپسىرىلدى.