اقوردادا ەلباسى نۇرسۇلتان نازارباەۆ ەلىمىزدىڭ ءوسىپ-وركەندەۋىنە زور ۇلەس قوسقان بىرقاتار ازاماتتى مەملەكەتتىك ناگرادالارمەن ماراپاتتادى. مەملەكەت باسشىسى سالتاناتتى راسىمگە قاتىسۋشىلاردى تاۋەلسىزدىك كۇنىمەن قۇتتىقتاپ, بۇل اسا ماڭىزدى تاريحي وقيعا جاڭا قازاقستاننىڭ دامۋىنا جول اشىپ, بىرەگەي مۇمكىندىكتەر تۋعىزعانىن اتاپ ءوتتى.
– ءبىز الەمنىڭ وزىق دامىعان 30 ەلىنىڭ قاتارىنا قوسىلۋدى ماقسات ەتكەن قۋاتتى ءارى ورنىقتى مەملەكەت قۇردىق. ءبىز دامۋ جولىن ۇستانا وتىرىپ, ءتۇرلى سالالار مەن باعىتتار بويىنشا زور تابىسقا جەتتىك. بۇل جەتىستىكتەرگە بارشا قازاقستاندىقتاردىڭ كۇش-جىگەرى مەن جاسامپاز قۋاتىنىڭ ارقاسىندا قول جەتكىزدىك, – دەدى ەلباسى.
قازاقستان پرەزيدەنتى مەملەكەتىمىزدە جىل سايىن ەلىمىزدىڭ گۇلدەنۋىنە زور ۇلەس قوسقان ازاماتتار ناگرادالارمەن ماراپاتتالىپ, مۇنداي ماراپاتتار ەڭ ۇزدىكتەرگە, كاسىبي تۇرعىدان بيىك بەلەستى باعىندىرعان جانە قوعام تاراپىنان مويىندالعان تۇلعالارعا تاپسىرىلاتىنىن اتاپ ءوتتى.
– سىزدەر وسكەلەڭ ۇرپاق پەن ەلىمىزدىڭ بارشا ازاماتتارىنا ايانباي قىزمەت ەتۋدىڭ, ايرىقشا ەڭبەكسۇيگىشتىكتىڭ جانە ناعىز ءپاتريوتيزمنىڭ جارقىن ۇلگىسىن كورسەتىپ كەلەسىزدەر. سىزدەردىڭ جەتىستىكتەرىڭىز مەملەكەتتىڭ ەڭ جوعارى باعاسىنا جانە حالىقتىڭ قۇرمەتىنە لايىق, – دەدى نۇرسۇلتان نازارباەۆ.
مەملەكەت باسشىسى «قازاقستاننىڭ ەڭبەك ەرى» اتاعىن «اقتوبە قالاسى سال اۋرۋىنا شالدىققان ازاماتتاردى قولداۋ ورتالىعى» قوعامدىق بىرلەستىگىنىڭ ءتورايىمى قۇرالاي بازاربايقىزى بايمەنوۆاعا بەرىپ, ونىڭ ءومىر قيىنشىلىقتارىنا مويىماي, تاعدىر تاۋقىمەتىن تارتقان ادامدارعا كومەك كورسەتىپ جۇرگەنىن اتاپ ءوتتى. قازىرگى كەزدە ق.بايمەنوۆا مۇمكىندىگى شەكتەۋلى جاندارعا قولداۋ كورسەتۋ جونىندەگى جوبالاردى ىسكە اسىرۋدا. جيىندا ءسوز العان ماراپات يەسى بارشا قاۋىمدى تاۋەلسىزدىك كۇنىمەن قۇتتىقتاپ, قوعامعا قوسقان ۇلەسىنىڭ باعالانعانىنا, ەڭبەگىنىڭ ەلەنگەنىنە العىسىن ءبىلدىردى.
– ءاربىر قازاقستاندىق سەكىلدى مەن دە حالىقارالىق احۋالدى قاداعالاپ جۇرەمىن. وسىعان بايلانىستى بەيبىتشىلىك, تۇراقتىلىق ءۇشىن, بالالاردى تاربيەلەي الاتىنىمىز ءۇشىن جانە ەرتەڭگە سەنىممەن قاراي الاتىنىمىز ءۇشىن نۇرسۇلتان ءابىش ۇلى سىزگە ۇلكەن انالىق العىسىمدى ايتقىم كەلەدى, − دەدى قۇرالاي بايمەنوۆا.
«قازاقستاننىڭ ەڭبەك ەرى» مارتەبەلى اتاعىن ۇلاعاتتى ۇستاز, ءوز وڭىرىندەگى ءبىلىم بەرۋ جۇيەسىن دامىتۋعا مول ۇلەس قوسقان الينا روبەرتوۆنا سولوۆەۆا يەلەندى. سونىمەن قاتار ەلباسى «قازاقستاننىڭ ەڭبەك ەرى» اتاعىمەن سايرامباي الىقۇل ۇلى دونەنباەۆتى ماراپاتتاي وتىرىپ, ونىڭ ءىرى شارۋا قوجالىعىنىڭ باسشىسى رەتىندە ادال ەڭبەك ەتىپ, تۋعان جەرىنىڭ دامۋىنا جانە وركەندەۋىنە ايتارلىقتاي ۇلەس قوسىپ كەلە جاتقانىن ايتتى.
– ءىى دارەجەلى «بارىس» وردەنىمەن اباي قاباتاي ۇلى بايگەنجين ماراپاتتالادى. ونىڭ بۇكىل كاسىبي قىزمەتى مەديتسينا سالاسىمەن بايلانىستى. ول ەلىمىزدىڭ دەنساۋلىق ساقتاۋ سالاسىنىڭ جەتەكشى مەكەمەلەرىن قۇرۋ جانە دامىتۋ ىسىنە زور ۇلەس قوستى, – دەدى نۇرسۇلتان نازارباەۆ.
ەلباسى قازاقستاننىڭ حالىق جازۋشىسى قابدەش ءجۇمادىلدى ءىى دارەجەلى «بارىس» وردەنىمەن ماراپاتتاپ, ونىڭ تاريحي روماندارى مەن شىعارمالارى الەمنىڭ كوپتەگەن تىلىنە اۋدارىلعانىن جانە قازاق ادەبيەتىنىڭ التىن قورىنا ەنگەنىن اتاپ ءوتتى.
– ءىىى دارەجەلى «بارىس» وردەنى ولەگ ۆلاديميروۆيچ دانيلەنكوعا تابىس ەتىلەدى. ول شيرەك عاسىردان استام ۋاقىت بويى ەلىمىزدىڭ اۋىل شارۋاشىلىعىندا جەمىستى ەڭبەك ەتۋدە. ولەگ دانيلەنكو باسقاراتىن ارگوفيرما اسىلتۇقىمدى مال شارۋاشىلىعىندا جوعارى ناتيجەلەرگە قول جەتكىزىپ, اۋىلدىڭ الەۋمەتتىك سالاسىنا لايىقتى قولداۋ كورسەتىپ كەلەدى, – دەدى مەملەكەت باسشىسى.
قازاقستان پرەزيدەنتى ءىىى دارەجەلى «ەڭبەك داڭقى» وردەنىن «Kazakhmys Smelting» جاۋاپكەرشىلىگى شەكتەۋلى سەرىكتەستىگى مىس قورىتۋ زاۋىتىنىڭ بالقىتۋشىسى تەمىرجان سابىرجان ۇلى بەكجانوۆقا تابىس ەتتى.
كەلەسى كەزەكتە ەلباسى استانا قالالىق ىشكى ىستەر دەپارتامەنتى جول-پاترۋلدىك پوليتسياسىنىڭ ينسپەكتورى ازامات قانات ۇلى بالتاباەۆتى ءىى دارەجەلى «ايبىن» وردەنىمەن ماراپاتتاي وتىرىپ, قاھارماندىققا باۋليتىن ماماندىق يەلەرى ازاماتتارىمىزدىڭ قاۋىپسىزدىگى مەن تىنىشتىعىن قامتاماسىز ەتۋ جولىندا ءاردايىم ەرلىك كورسەتۋگە ءازىر ەكەنىن ايتتى.
– قيىن جاعدايدا, وزىنە قاۋىپ ءتونىپ تۇرسا دا, ازامات ءتورت ادامنىڭ, سونىڭ ىشىندە ءبىر بالانىڭ ءومىرىن قۇتقارىپ قالدى, – دەدى ەلباسى.
مەملەكەت باسشىسى ادام ءومىرىن قۇتقارىپ, ەرلىك پەن باتىلدىق تانىتقانى ءۇشىن ءىىى دارەجەلى «ايبىن» وردەنىمەن ىشكى ىستەر مينيسترلىگىنىڭ قىزىلوردا وبلىستىق توتەنشە جاعدايلار دەپارتامەنتىنىڭ №2 ورتكە قارسى مامانداندىرىلعان بولىمشەسىنىڭ كومانديرى ەرمەكبەك پازليەۆتى ماراپاتتادى.
سونىمەن قاتار قازاقستان پرەزيدەنتى ماراپاتتالۋشىلار قاتارىندا عىلىم, مادەنيەت جانە ونەر قايراتكەرلەرى, ءبىلىم بەرۋ جانە دەنساۋلىق ساقتاۋ سالاسىنىڭ قىزمەتكەرلەرى, كاسىپكەرلەر مەن وندىرىسشىلەر, اسكەريلەر مەن قۇقىق قورعاۋ ورگاندارىنىڭ قىزمەتكەرلەرى, ەڭبەك ارداگەرلەرى, سپورتشىلار مەن مەملەكەتتىك قىزمەتشىلەر بار ەكەنىن اتاپ ءوتتى.
– بۇگىن ءبىز ەڭ ۇزدىكتەردى, سونىڭ ىشىندە ەلىنىڭ گۇلدەنۋى مەن حالقىنىڭ ءال-اۋقاتىنىڭ ارتۋى ءۇشىن بار ءبىلىمىن, قۋاتى مەن كۇشىن جۇمساۋعا ءازىر ءوز وتانىنىڭ ناعىز پاتريوتتارىن ماراپاتتاپ وتىرمىز. سىزدەر ءوز ىستەرىڭىزگە ادالدىق تانىتىپ, ەڭبەكتى قادىرلەپ, ەرلىك كورسەتۋ ارقىلى ارىپتەستەرىڭىزدىڭ اراسىندا بەدەلگە يە بولىپ, قوعامىمىزدىڭ قۇرمەتىنە بولەندىڭىزدەر, – دەدى نۇرسۇلتان نازارباەۆ.
ەلباسى ادەبيەت پەن ونەر سالاسىنداعى مەملەكەتتىك سىيلىقتى تىنىشتىقبەك ابدىكاكىموۆكە, اقۇشتاپ باقتىگەرەەۆاعا جانە وتەگەن ورالباەۆقا تابىس ەتىپ, ازاماتتارىمىزدىڭ رۋحاني تۇرعىدان جاڭعىرۋى مەن شىعارماشىلىق الەۋەتىنىڭ دامۋى ەلىمىزدىڭ ماڭىزدى باسىمدىعى بولىپ سانالاتىنىن ايتتى.
بۇدان بولەك ءراسىم بارىسىندا ءى, ءىى, ءىىى دارەجەلى «بارىس» وردەندەرى ەڭبەك ارداگەرى ج.س.كارىبجانوۆقا, «قازاقستان تەمىر جولى» ۇك» اق باسقارما توراعاسى س.م.مىڭباەۆقا, «قازاق ۇلتتىق ونەر ۋنيۆەرسيتەتى» رمم پروفەسسورى س.ش.ورازالىعا, ورتالىق سايلاۋ كوميسسياسىنىڭ توراعاسى ب.م.يماشەۆقا تابىس ەتىلدى.
«پاراسات» وردەنىمەن سولتۇستىك قازاقستان وبلىسىنىڭ اكىمى ق.ءى.اقساقالوۆ, قورعانىس جانە اەروعارىش ونەركاسىبى ءمينيسترى ب.ب.اتامقۇلوۆ, مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى اپپاراتىنىڭ جەتەكشىسى س.ق.احمەتجانوۆ, «اباي اتىنداعى قازاق ۇلتتىق پەداگوگيكالىق ۋنيۆەرسيتەتى» رمك رەكتورى ت.و.بالىقباەۆ, «قازاقستان رەسپۋبليكاسى پرەزيدەنتىنىڭ تەلەراديوكەشەنى» كەاق باس ديرەكتورى ە.ق.بەكحوجين, پرەمەر-ءمينيستردىڭ ورىنباسارى ە.ا.دوساەۆ, جامبىل وبلىسىنىڭ اكىمى ا.ي.مىرزاحمەتوۆ, «Uniserv» جشس باقىلاۋ كەڭەسىنىڭ توراعاسى ن.ساتباەۆ, ماڭعىستاۋ وبلىسىنىڭ اكىمى ە.ل.توعجانوۆ ماراپاتتالدى.
«قۇرمەت» وردەنىمەن ماراپاتتالعاندار قاتارىندا دەنساۋلىق ساقتاۋ ءمينيسترى ە.ا.ءبىرتانوۆ, «قازاق ۇلتتىق حورەوگرافيا اكادەمياسى» كەاق وقىتۋشىسى ل.ۆ.ماكارتسەۆا, ۇلتتىق ەكونوميكا ءمينيسترى ت.م.سۇلەيمەنوۆ, ن.تىلەنديەۆ اتىنداعى اكادەميالىق فولكلورلى-ەتنوگرافيالىق وركەسترىنىڭ باس ديريجەرى د.ن.تىلەنديەۆا بار.
«قازاقستاننىڭ ەڭبەك سىڭىرگەن قايراتكەرى» اتاعى كينو ءارتىسى س.ءى.ەسلاموۆاعا جانە «قۇرمانعازى اتىنداعى قازاق ۇلتتىق كونسەرۆاتورياسى» رمم اعا وقىتۋشىسى يا.س.رۋدكوۆسكيگە بەرىلدى.
اسكەري جانە قىزمەتتىك بورىشىن ۇلگىلى اتقارعانى, زاڭ مەن قۇقىق ءتارتىبىن قامتاماسىز ەتۋ, ەلدىڭ ۇلتتىق قاۋىپسىزدىگى مەن قورعانىس قابىلەتىن نىعايتۋ كەزىندە كورسەتكەن ەرلىگى مەن قاجىرلىلىعى ءۇشىن ءىى دارەجەلى «داڭق» وردەنىمەن جانە «جاۋىنگەرلىك ەرلىگى ءۇشىن» مەدالىمەن اسكەري قىزمەتشىلەر مەن قۇقىق قورعاۋ ورگاندارى وكىلدەرىنىڭ ءبىر توبى, اتاپ ايتقاندا ۇلتتىق قاۋىپسىزدىك كوميتەتىنىڭ سولتۇستىك قازاقستان وبلىسى بويىنشا دەپارتامەنتىنىڭ باستىعى ا.ا.اقشاەۆ, قورعانىس ءمينيسترىنىڭ ورىنباسارى م.م.التىنباەۆ, الماتى قالاسىنىڭ پروكۋرورى ب.ق.جۇيرىكتاەۆ, قازاقستان رەسپۋبليكاسى قارۋلى كۇشتەرى اۋە قورعانىسى كۇشتەرى اسكەري-اۋە كۇشتەرىنىڭ قولباسشىسى د.ج.قوسانوۆ, مەملەكەتتىك كۇزەت قىزمەتى نىسانداردى قورعاۋ قىزمەتى «ايبىن» پرەزيدەنت پولكى» راسىمدىك باتالونى قۇرمەت قاراۋىل روتاسىنىڭ بولىمشە كومانديرى ءا.ا.تورەبەكوۆ ماراپاتتالدى.
سونىمەن قاتار ءراسىم بارىسىندا قازاقستان رەسپۋبليكاسىنىڭ ادەبيەت پەن ونەر سالاسىنداعى 2018 جىلعى مەملەكەتتىك سىيلىق «اباي» وپەراسى ءۇشىن ت.ن.الپيەۆ, س.ءا.بايعوجين, ع.ا.احمادياروۆ ەنگەن اۆتورلار ۇجىمىنا جانە «اناعا اپارار جول» تولىقمەترلى كوركەم ءفيلمى ءۇشىن ا.ق.ساتاەۆ, ءا.ن.نازارباەۆا, ا.ب.نوگەربەك, ت.ق.جاقسىلىقوۆ, ءا.ە.احمەتوۆ ەنگەن اۆتورلار ۇجىمىنا تابىس ەتىلدى.
سوڭىندا قازاقستان پرەزيدەنتى مەملەكەتتىك ناگرادالار مەن سىيلىقتاردىڭ باستى مەرەكەمىز – تاۋەلسىزدىك كۇنى قارساڭىندا بەرىلۋىنىڭ سيمۆولدىق مانىنە توقتالدى.
– سىزدەر مەملەكەتتىڭ وسى جوعارى باعاسىنا لايىقتى بولىپ, قازاقستان حالقىنىڭ يگىلىگى جولىندا قىزمەت ەتە بەرەدى دەپ سەنەمىن. جاستارىمىز وزدەرىڭىز سالعان جولمەن ءجۇرىپ, جاڭا بەلەستەردى باعىندىراتىن بولادى. وتانىمىزدىڭ قاۋىپسىزدىگى مەن باقۋاتتىلىعى سىزدەردىڭ قولدارىڭىزدا. وسى جوعارى ءارى مارتەبەلى ميسسياعا ارقاشان لايىق بولىڭىزدار – دەدى نۇرسۇلتان نازارباەۆ.
ەركەجان ايتقازى,
«ەگەمەن قازاقستان»