قۇرلىقتىق حوككەي ليگاسىنداعى (قحل) كەزەكتى تۋر ويىنىن سلوۆاكيانىڭ براتيسلاۆا قالاسىندا وتكىزگەن استانانىڭ «بارىسى» جەرگىلىكتى «سلوۆان» كلۋبىنا سان سوقتىردى.
ءبىرىنشى كەزەڭدە قوس كوماندا ءبىر-ءبىرىنىڭ وسال تۇسىن تابا المادى. ەسەسىنە ۇزىلىستەن كەيىن بىرقاتار ەكپىندى شابۋىلدار ۇيىمداستىرىلىپ, ويىن قىزا ءتۇستى. ەكىنشى كەزەڭ باستالعان بەتتە قوناقتاردىڭ ءسال كىدىرىپ قالعانىن ۇتىمدى پايدالانعان ايدىن يەلەرى ەسەپ اشتى. بۇل گولدىڭ اۆتورى – رۋدولف چەرۆەنى. بىراق سول كەشتە وندرەي نەپەلا اتىنداعى قىسقى ستاديونعا جينالعان 6 436 كورەرمەننىڭ قۋانىشى ۇزاققا سوزىلمادى. 27 مينۋتتا نيكيتا ميحايليس جانە 31 مينۋتتا دميتري گرەنتس نىسانانى ءدال كوزدەپ, استانالىق كوماندانى 2:1 ەسەبىمەن العا شىعاردى. ودان كەيىن ەشتەڭە وزگەرگەن جوق. بۇل ەسەپ ماتچتىڭ سوڭىنا دەيىن ساقتالدى.
وسى جەڭىسىنىڭ ارقاسىندا «بارىس» جارىس كەستەسىندەگى جاعدايىن تاعى دا جاقسارتا ءتۇستى. كۇنى بۇگىنگى دەيىن 24 كەزدەسۋ وتكىزگەن جەرلەستەرىمىز 34 ۇپايمەن تۇراقتى بىرىنشىلىكتە التىنشى ورىندى يەلەنۋدە. ەندى ءوزىنىڭ كەلەسى باسەكەسىن استانالىقتار 12 قاراشادا نوۆوسىبىردە جەرگىلىكتى «سيبير» كلۋبىنا قارسى وتكىزەدى.
عالىم سۇلەيمەن,
«ەگەمەن قازاقستان»