«ەگىن» جشس نەگىزىنەن ەگىنشىلىكپەن اينالىسادى. بيىل 7 مىڭ گەكتار جەرگە وسىرىلگەن استىقتىڭ گەكتار بەرەكەلىلىگى 30 تسەنتنەردەن اينالدى. اۋىلشارۋاشىلىق تەحنيكالارىن جاڭارتىپ الۋدىڭ ارقاسىندا كوكتەمگى, كۇزگى دالا جۇمىستارى ساپالى اتقارىلىپ ءجۇر. بىلتىر كۇنىنە 120 تونناعا دەيىن استىق وڭدەي الاتىن ديىرمەن-ماكارون كەشەنىنىڭ ءبىرىنشى كەزەگى ىسكە قوسىلدى. ونى سالۋعا «قازاگروقارجى» كومپانياسى تاراپىنان 150 ميلليون تەڭگە ليزينگتىك قاراجات ءبولىنىپ, قۇرال-جابدىقتار ءتۇركيادان اكەلىندى. 44 جۇمىس ورنى اشىلىپ, استىق ساقتايتىن ەكى قويما بوي كوتەردى. شارۋاشىلىق بيىل ۇدەمەلى يندۋستريالىق-يننوۆاتسيالىق دامۋ باعدارلاماسى اياسىندا ءوندىرىستى ودان ءارى كەڭەيتىپ, 220 ميلليون تەڭگەلىك جوبانىڭ ەكىنشى كەزەگىن جۇزەگە اسىردى. تسەحتارعا ءبىر ميلليون دوللاردىڭ يتاليالىق قوندىرعىلارى ورناتىلدى. 24 ادام جۇمىسپەن قامتىلدى. ەلباسى نۇرسۇلتان نازارباەۆ قاتىسقان تەلەكوپىر كەزىندە ياۆلەنكا كەنتىندە ورنالاسقان وسى زامانعى تەحنولوگيالارعا نەگىزدەلگەن ديىرمەن-ماكارون كاسىپورنى پايدالانۋعا بەرىلدى.
جالپى, جوبالىق قۋاتى جارتى ميلليارد تەڭگەنى قۇرايتىن جانە جىلىنا 4 مىڭ توننا ماكارون ونىمدەرىن شىعاراتىن كەشەن ءبۇگىنگى كۇنى تولىق قۋاتىندا جۇمىس ىستەي باستادى. ول تاۋلىگىنە 14 تونناعا دەيىن ماكاروننىڭ ونداعان ءتۇرىن شىعارادى. 100 توننا ۇن تارتا الادى.
– جاڭا جىلدان باستاپ ءوز ونىمدەرىمىزدى قازاقستاننان تىسقارى جەرلەرگە, اتاپ ايتساق, رەسەي مەن وزبەكستانعا جونەلتە باستايتىن بولامىز,– دەيدى باستى ينۆەستورلاردىڭ ءبىرى ۆلاديمير چۋبىكين.
ءومىر ەسقالي.
سولتۇستىك قازاقستان وبلىسى, ەسىل اۋدانى.