سايلاۋشىلار ءتىزىمىنىڭ دۇرىستىعى كوپ جاعدايدا ءاربىر سايلاۋشىعا بايلانىستى

  كونستيتۋتسيا مەن سايلاۋ تۋرا­لى زاڭناماعا سايكەس, قازاقستان رەسپۋبليكاسىنىڭ جاسى ون سە­گiز­گە تولعان ازاماتتارى,  تەگiنە, الەۋ­مەتتiك, لاۋازىمدىق جانە مۇلiكتiك جاعدايىنا, جىنىسىنا, ناسiلiنە, ۇلتىنا, تiلiنە, دiنگە كوز­قاراسىنا, نانىمىنا, تۇرعى­لىق­تى جەرiنە نەمەسە كەز كەلگەن وزگە جاعداياتتارعا قاراماستان, سايلاۋدا داۋىس بەرۋگە قاتىسۋعا قۇقىلى. ءاربىر سايلاۋشى وسى قۇقىعىن ىسكە اسىرا الۋى ءۇشىن اكىمدىكتەر سايلاۋشىلار ءتىزىمىن جاسايدى. بۇل رەتتە اكىمدىكتەردىڭ لاۋا­زىم­دى ادامدارى ولاردىڭ دۇرىس­تى­عى ءۇشىن جاۋاپتى بولادى. ناقتىلى سايلاۋ ۋچاسكەسiندە ازاماتتى سايلاۋشىلار تiزiمiنە ەن­گiزۋ ءۇشiن ونىڭ وسى سايلاۋ ۋچاس­كەسiنiڭ اۋماعىندا تۇرعى­لىق­تى جەرi بويىنشا تiركەلۋ فاكتiسi نەگiز بولادى. ازاماتتىڭ تۇرعىلىقتى جەرى بويىنشا تىركەلۋىن ناقتىلايتىن قۇجات  ازاماتتاردى تىركەۋ كىتابى بولىپ تابىلادى. جاتاقحانالاردا تۇراتىن كۇن­دiزگi بولiمدەردە وقيتىن ستۋدەنتتەر مەن اسپيرانتتار سايلاۋ­شى­لار تiزiمiنە جاتاقحانانىڭ ورنا­لاس­قان جەرi بويىنشا ەنگiزiلەدi. اسكەر بولiمدەرiندەگi سايلاۋ­شى اسكەري قىزمەتشiلەردiڭ, سون­داي-اق اسكەر بولiمدەرi ورنالاس­قان جەرلەردە تۇراتىن ولاردىڭ وتباسى مۇشەلەرi مەن باسقا ساي­لاۋشىلاردىڭ تiزiمi اسكەر ءبولiم­دەرiنiڭ كومانديرلەرi بەرگەن مالiمەتتەر نەگiزiندە جاسالادى. ەگەر سايلاۋشى ۋاقىتشا بولۋ ورىندارىندا, مىسالى: دەمالىس ۇيلەرiندە, ساناتوريلەردە نەمەسە ۆاحتالىق جۇمىستا بولسا, وندا   سايلاۋشىلاردىڭ تiزiمدەرi سول مەكەمەلەردiڭ باسشىلارى بەرگەن دەرەكتەر نەگiزiندە جاسالادى. بۇل تىزىمدەر داۋىس بەرۋگە ءبىر كۇن قال­عاندا مىندەتتى تۇردە ناقتى­لانۋعا ءتيىس. شەت مەملەكەتتەرگە جەكە شا­قىرۋلار بويىنشا, قىزمەتتىك, ىسكەرلىك جانە تۋريستىك ساپارمەن كەلگەن قازاقستان رەسپۋبليكاسى­نىڭ ازاماتتارى ۋچاسكەلىك سايلاۋ كو­ميس­سياسىنا ءوتىنىش جاساعان جاع­دايدا جانە ولاردىڭ قازاق­ستان رەس­پۋبليكاسى ازاماتىنىڭ جارام­دى پاسپورتى بولسا, شەت مەملە­كەت­تەردەگi سايلاۋ ۋچاسكەلەرىندە سايلاۋشىلار تىزىمىنە ەنگىزىلەدى.

____________________

2011 جىلعى 30 جەلتوقساننان باستاپ سايلاۋشىلار  سايلاۋشىلار تىزىمىندەگى وزدەرى تۋرالى مالىمەتتەردى تەكسەرە الادى

ءاربىر سايلاۋشى سايلاۋ ۋچاسكەلەرىندە سايلاۋشىلار تىزىمىندەگى ءوزى تۋرالى  دەرەكتەردى تەكسەرە الادى. بۇل ءۇشىن جەكە باسىن كۋالان­دىراتىن, سونداي-اق تۇرعىلىقتى جەرىن  راستايتىن قۇجاتتارىمەن ۋچاسكەلىك سايلاۋ كوميسسياسىنا بارىپ, سايلاۋشىلار تىزىمىمەن  مۇ­قيات تانىسۋى كەرەك. سايلاۋشىنىڭ اتى-ءجونى تىزىمدە بولماي شىقسا نەمەسە ول تۋ­رالى دەرەكتەردە جاڭساقتىق­تار­دىڭ بار ەكەنى انىقتالسا, ساي­لاۋ­شى ءتيىستى قۇجاتتاردىڭ نەگىزىندە ءوزىن تىزىمگە ەنگىزۋدى نەمەسە قاجەتتى تۇزەتۋلەر جاساۋدى تالاپ ەتۋگە قۇقىلى. سايلاۋشىنىڭ اتى-ءجونىن تىزىمگە ەنگىزۋدەن نەمەسە ول تۋرالى دەرەكتەرگە تۇزەتۋلەر ەنگىزۋدەن باس تارتىلعان جاعدايدا سايلاۋ­شىنىڭ سوتقا شاعىمدانۋعا قۇ­قىعى بار.

____________________

2011 جىلعى 30 جەلتوقساننان  باستاپ 2012 جىلعى 14 قاڭتارعا دەيىن سايلاۋشىلاردىڭ داۋىس بەرۋ قۇقىعىن بەرەتىن ەسەپتەن شىعارۋ كۋالىگىن الۋىنا بولادى

پارتيالىق تىزىمدەر بويىنشا سايلاناتىن پارلامەنت ءماجىلىسى دەپۋتاتتارىنىڭ سايلاۋىندا داۋ­ىس بەرۋ كۇنى سايلاۋشى ءوزىنىڭ تۇرعىلىقتى جەرىنەن تىس جەردە بولسا, ول باسقا سايلاۋ ۋچاسكەسىندە داۋىس بەرە الادى. بۇل ءۇشىن 2011 جىلعى 30 جەلتوقسان مەن 2012 جىلعى 14 قاڭتارعا  دەيىنگى ارالىقتا تىركەلۋ ورنى بويىنشا ۋچاسكەلىك سايلاۋ كوميسسياسىنا بارىپ, داۋىس بەرۋ قۇقىعىن بەرەتىن ەسەپتەن شىعارۋ كۋالىگىن الۋ كەرەك. ول جازباشا ءوتىنىش نەگىزىندە, جەكە باستى كۋالاندىراتىن قۇ­جات­تى كورسەتكەن كەزدە بەرىلەدى. داۋىس بەرۋ كۇنى ۋچاسكەلىك سايلاۋ كوميسسياسى, داۋىس بەرۋ قۇقىعىن بەرەتىن ەسەپتەن شىعارۋ كۋالىگى مەن سايلاۋشىنىڭ جەكە باسىن كۋالاندىراتىن قۇجاتىن كورسەتكەن كەزدە, ونى بارعان جەرى بويىنشا سايلاۋشىلار تىزىمىنە ەنگىزەدى. ءبىر ەلدى مەكەن اۋماعىندا باس­قا سايلاۋ ۋچاسكەسىندە داۋىس بەرگىسى كەلەتىن سايلاۋشىلارعا داۋىس بەرۋ قۇقىعىن بەرەتىن ەسەپتەن شىعارۋ كۋالىگى بەرىلمەيدى. سونداي-اق ءماسليحاتتاردىڭ دەپۋتاتتارىن سايلاۋدا داۋىس بەرۋ قۇقىعىن بەرەتىن ەسەپتەن شىعارۋ كۋالىگى بەرىلمەيدى.

 ____________________

سايلاۋ كۇنى داۋىس بەرۋ ءتارتىبى

ءوزىنىڭ سايلاۋ ۋچاسكەسىندە جەكە كۋالىگىن نەمەسە رەسپۋبليكا ازاماتىنىڭ پاسپورتىن, ۋاقىتشا جەكە كۋالىكتى, جەدەل قىزمەتتەگى اسكەريلەردىڭ اسكەري بيلەتىن ۇسىنا وتىرىپ, سايلاۋشى ءۇش سايلاۋ بيۋللەتەنىن الادى. ءبىر داۋىس بەرۋ بيۋللەتەنى – پارتيالىق تىزىمدەر بويىنشا ساي­لاناتىن ءماجىلىس دەپۋتات­تا­رىن سايلاۋ بويىنشا. ەكىنشى بيۋللەتەن – وبلىستىق نەمەسە استانا مەن الماتى قا­لا­لارى ءماسليحاتتارىنىڭ دەپۋتا­تىن سايلاۋ بويىنشا داۋىس بەرۋ ءۇشىن. ءۇشىنشى بيۋللەتەن – قالالىق نەمەسە اۋداندىق ءماسليحاتتىڭ دە­­پۋتاتىن سايلاۋ بويىنشا داۋ­ىس بەرۋ ءۇشىن. استانا مەن الماتى قالا­لارى­نىڭ سايلاۋشىلارى ەكى بيۋللەتەن الادى. ءاربىر سايلاۋشى بيۋللەتەندى جاسىرىن داۋىس بەرۋ كابينا­سىندا تولتىرادى. سايلاۋشى ءوزىنىڭ داۋىسىن بەرەتىن ساياسي پارتيا اتاۋىنىڭ نەمەسە ءماسليحات دەپۋتاتتىعىنا كان­دي­داتتىڭ اتى-ءجونىنىڭ وڭ جاعىنداعى بوس شارشىعا بەلگى قويۋ كەرەك.

ءبىر بەلگىدەن ارتىق بەلگى قوي­ىل­عان,  قارىنداشپەن تولتىرىل­عان, سونداي-اق سايلاۋشىنىڭ ەرىك ءبىل­دىرۋىن انىقتاۋ مۇمكىن ەمەس بيۋل­لەتەندەر جارامسىز دەپ تانىلادى. 

قازاقستان رەسپۋبليكاسىنىڭ ورتالىق سايلاۋ كوميسسياسى.