28 جەلتوقساندا ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ اقش-تىڭ قازاقستانداعى ەلشىسى كەننەت فەيرفاكسپەن ونىڭ ءوتىنىشى بويىنشا كەزدەستى. كەزدەسۋدە وسك توراعاسى اقش ەلشىسىن پارلامەنت ءماجىلىسى دەپۋتاتتارى مەن ءماسليحاتتارى دەپۋتاتتارى سايلاۋىنا ازىرلىك بارىسىمەن تانىستىردى.
ورتسايلاۋكوم باسشىسى اتاپ وتكەندەي, ساياسي پارتيالاردىڭ سايلاۋالدى ۇگىت جۇمىستارى قۇقىق اياسىندا جانە سايلاۋالدى ۇگىت شارالارىنىڭ زاڭنامامەن كوزدەلگەن بارلىق نىساندارىندا ءجۇرىپ جاتىر. تەك جاڭاوزەن قالاسىندا عانا توتەنشە جاعدايدىڭ ەنگىزىلۋىنە بايلانىستى ساياسي پارتيالار مەن ءماسليحاتتار دەپۋتاتتىعىنا كانديداتتار بۇقارالىق كوپشىلىك شارالاردى وتكىزۋدەن باس تارتۋى جانە ولاردىڭ ورنىن باق-تار مەن كورنەكى ۇگىت نىساندارىن بەلسەندىرەك پايدالانۋ ەسەبىنەن تولتىرۋى ءتيىس.
«سايلاۋ ورگاندارى ءوز تاراپىنان 15 قاڭتاردا بۇل قالانىڭ تۇرعىندارى وزدەرىنىڭ سايلاۋ جانە سايلانۋ كونستيتۋتسيالىق قۇقىعىن ىسكە اسىرۋعا مۇمكىندىك الۋى ءۇشىن بارلىق قاجەتتى جاعدايدى جاساۋدا», – دەدى قۋاندىق تۇرعانقۇلوۆ وسى تۋرالى. وسك توراعاسى, سونداي-اق «رۋحانيات» پارتياسىنىڭ پارتيالىق ءتىزىمىن تىركەۋدىڭ كۇشىن جويۋ سەبەپتەرى جونىندە ايتا كەلىپ, حالىقارالىق بايقاۋشىلاردىڭ داۋىس بەرۋ كۇنى سايلاۋدى بايقاۋدى ىسكە اسىرۋىنا, انىقتالعان كەمشىلىكتەردى جويۋ تارتىبىنە, ءماسليحاتتار دەپۋتاتتىعىنا كانديداتتار ۇسىنۋ مەن تىركەۋ تارتىبىنە, بۇل ۇدەرىسكە ساياسي پارتيالاردىڭ كاتىسۋىنا بايلانىستى سۇراقتارعا جاۋاپ قايتاردى.
ال ەلشى ءوز كەزەگىندە ءبىزدىڭ ەلىمىزدىڭ سايلاۋ زاڭناماسى مەن پرەزيدەنت ن.ءا.نازارباەۆتىڭ ساياسي ەركى قازاقستان رەسپۋبليكاسىنىڭ الداعى سايلاۋدى اشىق وتكىزۋگە مۇمكىندىك بەرەتىنىن اتاپ ءوتىپ, سايلاۋدى ۇيىمداستىرۋشىلارعا تابىس تىلەدى. «بۇرىنعى بارلىق سايلاۋلاردا حالىقارالىق بايقاۋشىلار قازاقستان رەسپۋبليكاسىنىڭ ورتالىق سايلاۋ كوميسسياسى سايلاۋدى ءوز دەڭگەيىندە ۇيىمداستىرعانىن اتاعان ەدى, – دەدى كەننەت فەيرفاكس. – وسى دەڭگەي الداعى سايلاۋدا بارلىق دەڭگەيدەگى سايلاۋ كوميسسيالارىندا قولداۋ تابادى جانە بۇل سايلاۋ ەڭ تابىستى سايلاۋ بولادى دەپ ۇمىتتەنەمىز».
ءاليسۇلتان قۇلانباي.