جۋىردا قازاق ۇلتتىق تەحنيكالىق ۋنيۆەرسيتەتىندە ادەمى كەزدەسۋ ءوتتى. جوعارى ءبىلىمدى ءوندىرىسپەن ۇشتاستىرۋ ماقساتىندا «ءداۋىر» رەسپۋبليكالىق پوليگرافيالىق باسپا كەشەنى (رپبك) اتالمىش وقۋ ورنىندا پوليگافيا ماماندىعى بويىنشا وقيتىن ۇزدىك ءارى بەلسەندى ستۋدەنتتەرگە شاكىرتاقى تاعايىنداعان بولاتىن. تاۋەلسىزدىكتىڭ 20 جىلدىعىنا وراي «ءداۋىر» رپبك ءتورايىمى سۆەتلانا نازارباەۆا قازۇتۋ-عا كەلىپ, شاكىرتاقى تاعايىندالعان ەكى ستۋدەنتكە سەرتيفيكاتتى سالتاناتتى تۇردە تابىس ەتتى. سونىمەن قاتار, «پوليگرافيا», «كولىك, كولىك تەحنيكاسى جانە تەحنولوگياسى», «تاۋ-كەن ءىسى», «مۇناي-گاز ءىسى», «مەتاللۋرگيا» ماماندىقتارى بويىنشا ءبىلىم الىپ جاتقان ستۋدەنتتەر مەن ماگيسترانتتارعا ارنالعان «روبوتتى تەحنيكا جانە كوتەرىپ-تاسىمالداۋ جۇيەلەرى» اتتى وقۋلىقتىڭ تۇساۋكەسەرىن وتكىزدى.
وقۋ ورنىنىڭ باسشىلارى, ينستيتۋت ديرەكتورلارى, «پوليگرافيالىق ءوندىرىس ماشيناسى مەن تەحنولوگياسى» كافەدراسىنىڭ پروفەسسورلارى, وقىتۋشىلارى مەن وسى ماماندىق بويىنشا ءبىلىم الىپ جاتقان ستۋدەنتتەر قاتىسقان جيىندى ۋنيۆەرسيتەت رەكتورى جەكسەنبەك ءادىلوۆ ءسوز سويلەپ اشىپ, «ءداۋىر» رپبك مەن قازۇتۋ اراسىنداعى ىسكەرلىك بايلانىسقا توقتالىپ ءوتتى.
ودان سوڭ ءسوز العان «ءداۋىر» رپبك باس ديرەكتورى س.نازارباەۆا ءوزى باسشىلىق جاساپ وتىرعان كاسىپورىننىڭ قىزمەتىنە قىسقاشا توقتالا كەلە, وزدەرىنىڭ قازۇتۋ-دا پوليگرافيا ماماندىعى بويىنشا ءبىلىم الىپ جاتقان ءۇزدىك جانە الەۋمەتتىك جاعىنان از قامتىلعان وتباسىدان شىققان ستۋدەنتتەرگە شاكىرتاقى تاعايىنداپ, قامقورلىق كورسەتەتىنىن, الداعى ۋاقىتتا سول ەكى ستۋدەنتتى وقۋ بىتىرگەن سوڭ جۇمىسپەن قامتۋ ماسەلەسىن دە قاراستىراتىنىن جەتكىزدى. سونداي-اق, ول «پوليگرافيالىق ءوندىرىس ماشيناسى مەن تەحنولوگياسى» كافەدراسىنىڭ ستۋدەنتتەرىنە «ءداۋىر» باسپاحاناسىندا تاجىريبەدەن تەگىن وتۋگە مۇمكىندىك جاسالاتىنىن ءمالىم ەتتى.
يگى شارانىڭ باستاماسى رەتىندە س.نازارباەۆا ۇزدىك ۇلگەرىمىمەن جانە بەلسەندىلىگىمەن كوزگە تۇسكەن ەكى ستۋدەنتكە سەرتيفيكات تاپسىردى. شاكىرتاقى يەلەرى وندىرىستىك ينجەنەريا ينستيتۋتىنىڭ 4-كۋرس ستۋدەنتتەرى ا.ءجۇسىپوۆ پەن ن.تۇرلىكيەۆا «ءداۋىر» باسپا كەشەنى مەن ونىڭ باسشىلارىنا العىستارىن ءبىلدىرىپ, سەنىمدى اقتاۋعا ۇمتىلاتىندارىن ايتتى.
سونىمەن قاتار, كەزدەسۋ بارىسىندا جاقىندا جارىق كورگەن «روبوتتى تەحنيكا جانە كوتەرىپ-تاسىمالداۋ جۇيەلەرى» اتتى وقۋلىق قازۇتۋ مەن «ءداۋىر» رپبك اراسىنداعى ىسكەرلىك بايلانىستىڭ جەمىسى بولىپ تابىلاتىنى ايتىلدى. اتالمىش وقۋلىقتى س.نازارباەۆا مەن وندىرىستىك ينجەنەريا ينستيتۋتىنىڭ وقىتۋشىلارى ن.ت.سۇراشەۆ پەن م.ي.گۋدوۆيچ بىرلەسە جازعان بولاتىن. كىتاپ اۆتورلارىنىڭ ءبىرى كوتەرىپ-تاسىمالداۋ ماشينالارى جانە گيدراۆليكا كافەدراسىنىڭ مەڭگەرۋشىسى, پروفەسسور ن.ت.سۇراشەۆتىڭ ايتۋىنشا, بۇل وقۋلىق مەتاللۋرگيا, تاۋ-كەن ءىسى, مۇناي-گاز ءىسى, پوليگرافيا سالالارىندا قولدانىلاتىن كوتەرىپ-تاسىمالداۋ جۇيەلەرىنىڭ قازىرگى زامانعى ۇلگىلەرى جايلى جازىلعان زەرتتەۋ ەڭبەگى بولىپ تابىلادى.
گۇلزەينەپ سادىرقىزى.