سەمەيدە ەل تاۋەلسىزدىگىنىڭ 20 جىلدىعىنا ارنالعان 20 جارقىن ءىس اكتسياسى اياسىندا مەملەكەتتىك ءتىلدى مەڭگەرگەن جانە ونى قوعامدىق جۇمىستا, كۇندەلىكتى ومىردە بەلسەندى تۇردە پايدالانىپ كەلە جاتقان وزگە ۇلت جاستارىنىڭ قاتىسۋىمەن «ءبىر وتان, ءبىر ءتىل – تاۋەلسىز قازاقستان» دەگەن اتپەن وبلىس جاستارىنىڭ فورۋمى بولىپ ءوتتى.
وبلىس اكىمىنىڭ باستاماسىمەن وتكىزىلگەن بۇل يگىلىكتى شاراعا 18 بەن 30 ارالىعىنداعى مەملەكەتتىك ءتىلدى جەتىك مەڭگەرگەن وزگە ۇلت جاستارى ءتۇرلى قوعامدىق ۇيىمداردىڭ وكىلدەرى, باسقا دا ءتىل جاناشىرلارى قاتىستى. فورۋم جۇمىسى وسى شاراعا وراي اباي اتىنداعى دراما تەاترىندا ارنايى ۇيىمداستىرىلعان كورمەنى تاماشالاۋدان باستالدى. كورمەگە مەملەكەتتىك ءتىلدى ناسيحاتتاۋداعى وڭدى تاجىريبەلەر جيناقتالعانىن دا ايتا كەتسەك دەيمىز.
فورۋمعا قاتىسۋشىلاردى قۇتتىقتاعان وبلىس اكىمىنىڭ ورىنباسارى ءتۇسىپحان تۇسىپبەكوۆ مۇنداي القالى جيىننىڭ ۇلىلاردىڭ ءىزى قالعان قاسيەتتى سەمەي قالاسىندا ءوتۋى زاڭدىلىق ەكەنىن ايتا كەلىپ, وبلىس بويىنشا مەملەكەتتىك تىلگە بايلانىستى اتقارىلعان شارالارعا قىسقاشا توقتالىپ ءوتتى. ونىڭ ايتۋىنشا, بۇگىنگى كۇنى 700-دەن استام وزگە ۇلت وكىلدەرىنىڭ بالالارى قازاق تىلىندەگى بالاباقشالار مەن مەكتەپتەرگە بارادى ەكەن.
ال فورۋم دەلەگاتى شاكارىم اتىنداعى سەمەي مەملەكەتتىك ۋنيۆەرسيتەتىنىڭ اعا وقىتۋشىسى الەكسەي كليۆەنكو ءوز ءسوزىن قازاقشا ولەڭمەن باستاپ, مەملەكەتتىك ءتىلدى ورنىقتىرۋدا جاستار باستاماشى بولۋ كەرەك ەكەندىگىن ايتتى. ول حيميا پانىنەن ءدارىستى قازاقشا وقيدى ەكەن. وتباسىندا دا قازاقشا سويلەسەمىز. ال شەتەلدىك كولىكپەن جۇيتكىپ, تىلگە كەلگەندە ءمۇدىرىپ جاتاتىندارعا قارنىم اشادى. سونان سوڭ قيت ەتسە ءبۇيرەكتەن سيراق شىعارىپ جاتاتىن ورىس ءتىلدى باسىلىمدارعا دا وكپەم قارا قازانداي. ەلباسىمىز قازاق قازاقپەن قازاقشا سويلەسسىن دەدى. دۇرىس ءسوز, بىراق ەلىمىزدە تۇراتىن ورىس, نەمىس, كورەي جانە تاعى باسقا ۇلت وكىلدەرى قازاقپەن نەگە قازاقشا سويلەسپەسكە دەگەن ونىڭ ءسوزىن قۇپ كورگەندەر دە از بولمادى.
فورۋمدا جاستاردىڭ قۇرعاق ءسوز, جالاڭ سەزىمنەن اۋلاق بولعانىنا سۇيسىندىك. ايتالىق, بورودۋليحا اۋدانىنا قاراستى نوۆوپوكروۆكا اۋىلدىق وكرۋگىنىڭ اعا مامانى ينديرا بەلسكايا وبلىستىق مەكەمەلەرگە دەگەن وكپە-رەنىشىن دە جاسىرىپ قالمادى. ءماسەلەن, وبلىس ءىس قاعازدارىن مەملەكەتتىك تىلدە جۇرگىزۋگە ءۇش جىل بۇرىن كوشكەنمەن, كەمشىلىك جەتكىلىكتى. ايتالىق, بيىلعى جىلى اۋداندىق اكىمدىككە كەلىپ تۇسكەن بارلىق قۇجاتتىڭ 60 پايىزى رەسمي تىلدە جازىلعان. سوعان باسقا ۇلت وكىلى بولسام دا مەنىڭ قارنىم اشادى دەدى ول.
م.اۋەزوۆ اتىنداعى كوللەدجدىڭ 4-كۋرس وقۋشىسى ۆيكتوريا پاراسيۋكوۆانىڭ ءسوزى دە كوپ كوڭىلىندەگى ويدى قوزعادى. ول وسى كوللەدجدىڭ قازاق ءتىلى مەن ادەبيەتى بولىمىندە وقيدى ەكەن. جالپى ءبىزدىڭ كوللەدج بويىنشا ساباقتىڭ 75 پايىزى مەملەكەتتىك تىلدە جۇرگىزىلەدى دەدى ول. ورىس مەكتەپتەرىندەگى گۋمانيتارلىق ءپاندى نەگە مەملەكەتتىك تىلدە ءجۇرگىزبەسكە! بۇل دا ءتىلدى جەتە ءۇيرەنۋدىڭ ءبىر كىلتى بولار ەدى. ۆيكتوريا سولاي دەي كەلىپ, ورىس ءتىلدى جاستاردى جيدەبايعا, حاكىم ابايدىڭ باسىنا اپارىپ كەلۋدى داستۇرگە اينالدىرۋ قاجەت دەگەن ءوز ۇسىنىسىن ايتتى. ال ونىڭ دا تاربيەلىك ءمانى وتە زور.
فورۋم سوڭىندا حالىقارالىق «قازاق ءتىلى» قوعامىنىڭ شىعىس جانە سولتۇستىك ايماقتارى بويىنشا ۆيتسە-پرەزيدەنتى ورال ءشارىپباەۆ بىرقاتار وزگە ۇلت وكىلىنە قوعامنىڭ مۇشەلىك كۋالىگى مەن «ءتىل جاناشىرى» لەنتاسىن سالتاناتتى جاعدايدا تابىس ەتتى. جانە وسى ازاماتتىڭ باستاماسىمەن قوعام جانىنان وزگە ۇلت وكىلدەرىنىڭ جاستار قاناتى ۇيىمى قۇرىلدى. وسى يگىلىكتى شارۋا باسقا وبلىستاردا دا جالعاسىن تاۋىپ جاتسا, نۇر ۇستىنە نۇر بولار ەدى.
داۋلەت سەيسەن ۇلى.
سەمەي.