الماتى قالاسىندا قازاقستاننىڭ دەموكراتيالىق «اق جول» پارتياسى ءوزدەرىنىڭ سايلاۋالدى ۇگىت-ناسيحاتى شەڭبەرىندە «قازاقستاندىق بيزنەس-ءبىرلەستىكتەردىڭ الداعى داعدارىستىڭ الدىن الۋ شاراسى» اتتى دوڭگەلەك ۇستەل وتكىزدى.
«اق جول» پارتياسى وتاندىق شاعىن جانە ورتا كاسىپكەرلىككە قولداۋ كورسەتۋدى ءوزىنىڭ باستى ماقساتتارىنىڭ ءبىرى رەتىندە قاراستىرادى. ەلىمىزدەگى كاسىپكەرلىكتى دامىتىپ قانا قويماي, ونى زاڭدى تۇردە قورعاۋ ءۇشىن پارتيا كەشەندى شارالاردى دا قاراستىرعان. «الدا بولۋى ىقتيمال الەمدىك داعدارىس تولقىنىنىڭ قازاقستاندىق كاسىپ يەلەرىنە دە بەلگىلى دارەجەدە قاۋپى بار, سول سەبەپتى, كەلەشەكتە نەندەي شارالار قولدانۋ كەرەك دەگەن ماسەلەمەن بۇگىن بەلدى كومپانيالاردىڭ وكىلدەرىمەن باس قوسىپ وتىرمىز», دەدى دوڭگەلەك ۇستەلدە «اق جول» قدپ ءتوراعاسىنىڭ ورىنباسارى ءبورىحان نۇرمۇحامەدوۆ.
كەزدەسۋگە جينالعان وتاندىق بيزنەس-بىرلەستىك وكىلدەرى الەمدى تاعى ءبىر شارپىپ ءوتۋى ىقتيمال ەكونوميكالىق داعدارىستان «اربانى سىندىرماي, وگىزدى ولتىرمەي» امان شىعۋدىڭ شاراسى دەپ بىلەتىن وزدەرىنىڭ ۇسىنىستارىن ورتاعا سالدى. بۇگىنگى تاڭدا «اق جول» قدپ ەلىمىزدەگى ينتەگراتسيالىق ۇدەرىستەرگە قولداۋ كورسەتىپ كەلەدى. الايدا, قازاقستاندىق رىنوكتا وتاندىق تاۋار وندىرۋشىلەرگە جەڭىلدىكتەر قاراستىرىلۋى كەرەك دەپ ەسەپتەيمىن, دەگەن ويدى «جەتىسۋ» سپك باسقارما ءتوراعاسى ارمان ەۆنيەۆ تالقىعا سالۋدى ۇسىندى. وسى ۇسىنىستى دامىتقان ساۋدا بىرلەستىگى اسسوتسياتسياسىنىڭ ۆيتسە-پرەزيدەنتى جىبەك اجىباەۆا شاعىن جانە ورتا كاسىپكەرلىكتى قۇرىلعانىنان باستاپ 3 جىلعا دەيىن ءتۇرلى سالىقتاردان بوساتا تۇرۋ, ەسەپتىك جانە سالىقتىق جاۋاپكەرشىلىك پەن مىندەتتەمەلەرگە جەڭىلدىك جاساۋ, جەكە كاسىپ يەلەرىنە سالىقتىق ەسەپكە بايلانىستى سالىناتىن ايىپپۇلدى قىسقارتۋ جانە اتالعان ەسەپ مەملەكەتكە ۇلكەن شىعىن اكەلمەسە, قازاقستان رەسپۋبليكاسىنىڭ قىلمىستىق كودەكسىندەگى جالعان كاسىپكەرلىككە قاتىستى زاڭنامانى جۇمسارتۋ شارالارىن قايتا قاراستىرعان ءجون دەگەن پىكىرىن ءبىلدىردى.
مەملەكەت اقى تولەيتىن قوعامدىق جۇمىستار تاجىريبەسىن كەڭەيتۋ, جەكە مەنشىك كاسىپكەرلىك سۋبەكتىلەرىنىڭ جاڭا جۇمىس ورىندارىن قۇرۋ ءجونىندەگى قىزمەتىن مەملەكەت تاراپىنان ىنتالاندىرۋدى قامتاماسىز ەتۋ, كاسىپورىنداردىڭ قايىرىمدىلىق شارالارعا باعىتتالعان شىعىستارىنا سالىناتىن سالىق كولەمىن 3 پايىزدان 10 پايىزعا دەيىن ۇلعايتۋ جانە مەملەكەت تاراپىنان ىنتالاندىرۋ سەكىلدى بىرنەشە ۇسىنىستى وزدەرىنىڭ سايلاۋالدى تۇعىرناماسىنا ەنگىزگەن «اق جول» قدپ مەن وتاندىق بيزنەس بىرلەستىكتەرىنىڭ وكىلدەرى وسى دوڭگەلەك ۇستەلدە كاسىپكەرلىكتى دامىتۋ ءۇشىن مەملەكەتتىڭ قاراستىرىپ وتىرعان قاراجاتىن ءتيىمدى جاراتۋ ماقساتىندا جەكە كاسىپكەرلىككە قولداۋ كورسەتىپ وتىرعان ۇلتتىق ينستيتۋتتاردىڭ قىزمەتىنە پارلامەنتتىك مونيتورينگ جۇرگىزۋدى دە ۇسىندى.
قانات ەسكەندىر.
الماتى.