ءۇش عاسىرعا جۋىق ۋاقىت بويى بوداندىقتىڭ بۇعاۋىندا بولىپ, وسىدان 20 جىل بۇرىن ەگەمەندىگىن العان ەلىمىزدىڭ ءار ازاماتى ءۇشىن تاۋەلسىزدىك كۇنى مەرەكەسىنىڭ ورنى ايرىقشا. بۇل كۇن – اتا-بابالارىمىز اڭساعان ارماننىڭ جۇزەگە اسقان, كەۋدەسىن ماقتانىش كەرنەپ مەرەيى تاسقان, ەلىمىزگە ەركىندىك سىيلاعان ۇلى كۇن. مىنە, كەڭ بايتاق قازاق دالاسىندا اسپانكوك تۋىمىزدىڭ جەلبىرەگەنىنە 20 جىل تولدى. جيىرما جىلدا ەلىمىز ءجۇز جىلعا تاتيتىن جۇمىس جاسادى. الەۋمەتتىك-ەكونوميكالىق رەفورمالار, يندۋستريالىق-يننوۆاتسيالىق دامۋ قارقىنى ءوز ناتيجەسىن بەردى. 46 كونفەسسيا مەن 130-دان استام ەتنوستىڭ ورتاق ورداسى بولىپ وتىرعان ەلىمىزدە بەرەكە-بىرلىك, تاتۋلىق قالىپتاسقان. تاۋەلسىزدىكتىڭ تۋىن بيىك كوتەرىپ كەلە جاتقان ەلباسى حالقىمىزدى قىسپاققا ۇرىندىرماي, ۇلى جولعا باستاپ كەلەدى. ول ەلىمىزدى باياندى باقىتقا جەتەلەيتىن ازاتتىق جولى.
اۋدان جۇرتشىلىعى جىل سايىن تاۋەلسىزدىك كۇنىن ۇلكەن قۋانىشپەن مەرەكەلەيدى. اۋدان ورتالىعىنداعى مەرەكەلىك ءىس-شارالار مويىنقۇم اۋدانىنىڭ اكىمى ساكەن ارۋباەۆ پەن جەلتوقسان وقيعاسىنىڭ قۇربانى, ««حالىق قاھارمانى»» ق.رىسقۇلبەكوۆتىڭ اناسى دامەتكەن اسانباەۆانىڭ مەكەمە-ۇيىم باسشىلارىنىڭ جەلتوقسان كوتەرىلىسى ەرلەرىنىڭ ءبىرى, ««حالىق قاھارمانى»» ق.رىسقۇلبەكوۆتىڭ جاستار ساياباعىنداعى ەسكەرتكىشىنە گۇل شوعىن قويۋدان باستادى. كوپشىلىك قاتىسقان ميتينگىدە اۋدان اكىمى ساكەن ارۋباەۆ ءسوز سويلەدى.
1986 جىلعى الماتىداعى جەلتوقسان وقيعاسى كەمەرىنەن اسىپ تۇرعان شوۆينيستىك وتارشىل ساياساتقا قازاق حالقىنىڭ قارسىلىعىنان تۋىنداعان ەدى. ءبىزدىڭ جەرلەسىمىز, «حالىق قاھارمانى» قايرات رىسقۇلبەكوۆ قاتارىندا بولعان بۇل كوتەرىلىس كرەمل بيلەۋشىلەرىنە قارسى ءۇن قاتقان جاستارىمىزدىڭ جالىندى داۋىسى جاڭا زامانعا جول اشتى. قايرات رىسقۇلبەكوۆ جەلتوقسان وقيعاسىنىڭ باس قاھارمانى عانا ەمەس, اۋىرتپالىعىن ارقالاعان باس قۇربانى, قىرشىن جاس قايراتتىڭ ەسىمىن بۇگىندە بۇكىل قازاقستاندىقتار قۇرمەتتەيدى. قاشاندا ز ۇلىمدىقتى ءادىلدىك جەڭۋمەن كەلەدى. بۇل جولى دا ادىلدىك سالتانات قۇرىپ, تاريح تارازىسى ءبارىن ءوز ورنىنا قويدى.
ەلباسىمىز ن.ءا. نازارباەۆتىڭ كەمەڭگەرلىگى مەن سارابدال ساياساتىنىڭ ارقاسىندا ءبىز بۇگىن تەك تاۋەلسىز ەل بولىپ قانا قويماي, الەم ەلدەرى مويىنداعان ىرگەلى مەملەكەتكە اينالىپ وتىرمىز. تاۋەلسىزدىككە قول جەتكىزۋدەن گورى, ونى ساقتاپ تۇرۋ باعاسى قىمبات. سوندىقتان بىزدەر كەشەگى تاۋەلسىزدىك جولىندا جانىن قيعان اردالارىمىزدىڭ اسىل ارماندارىن اقيقاتقا اينالدىرىپ قانا قويماي, باياندى ەتۋگە ءتيىسپىز.
ءبىزدىڭ الدىمىزدا تۇرعان قايراتتىڭ وجەت بەينەسى بۇكىل جاستارىمىزدى تاۋەلسىزدىك جولىندا ەرلىك ىستەرگە شاقىرىپ تۇرعانداي سەزىنەمىز. ول بارشا قازاق جاستارىنىڭ اياۋلى تۇلعاسىنا اينالارىن تىرشىلىگىندە بىلە العان جوق. ول ازاماتتىق ءىس اتقاردى, نامىس پەن ار-وجداننىڭ تاپتالۋىنا جول بەرگەن جوق. قايرات ءبىز ءۇشىن ماڭگى ءتىرى, ماڭگى جاساي بەرەدى, – دەپ ءتۇيىندەدى ءسوزىن اۋدان باسشىسى.
ال اۋداندىق ارداگەرلەر كەڭەسىنىڭ توراعاسى, اۋداننىڭ قۇرمەتتى ازاماتى جاشارالى قويگەلديەۆ جەلتوقسان وقيعاسى, ەل بىرلىگى, ورىمدەي جاس جىگىتتەر مەن قىزداردىڭ شوۆينيستىك كوزقاراستاعى توتاليتارلىق جۇيەگە قارسىلىعى جايىندا ايتسا, قايراتتىڭ اناسى دامەتكەن اسانباەۆا جاستارعا قايراتتىڭ ەرجۇرەكتىگىن, نامىسشىلدىعىن بەرسىن, ەلىمىزدىڭ ايتۋلى ازاماتتارى بولىڭدار, دەگەن ىزگى انالىق تىلەگىن جەتكىزدى.
تاۋەلسىزدىك كۇنىنە ارنالعان مەرەكەلىك شارا ابىلايحان الاڭىندا جالعاستى. شارا بارىسىندا اۋدان باسشىسى تاۋەلسىزدىكتىڭ 20 قۇرداسىنا ەستەلىك سىيلىق, الەۋمەتتىك جاعىنان از قامتىلعان 20 وتباسىعا قايىرىمدىلىق پاكەتىن تاپسىردى. ءارى قاراي مەرەكەلىك ءىس-شارا اۋداندىق مادەنيەت ءۇيى ونەرپازدارىنىڭ كونتسەرتىنە ۇلاستى.
سول كۇنى ءتۇس قايتا اۋدان اكىمى ساكەن ارۋباەۆ باستاعان اۋدان باسشىلارى جەلتوقسان وقيعاسىنىڭ قۇربانى, «حالىق قاھارمانى» قايرات رىسقۇلبەكوۆتىڭ تۋعان اۋىلى بىرلىكتە بولىپ, قايراتتىڭ ەسكەرتكىشىنە گۇل شوعىن قويدى جانە مەرەكەگە جينالعان قاۋىمدى وزگە مەرەكەلەرگە قاراعاندا شوقتىعى بيىك ەل تاۋەلسىزدىگىنىڭ 20 جىلدىعىمەن قۇتتىقتادى.
جولدىباي دامەتوۆ, جۋرناليست.
جامبىل وبلىسى, مويىنقۇم اۋدانى.