ەلباسى «بولاشاققا باعدار: رۋحاني جاڭعىرۋ» ماقالاسىندا باستاما رەتىندە كوتەرگەن, بۇگىندە جۇزەگە اسىرىلىپ جاتقان «تۋعان جەر» باعدارلاماسى شەڭبەرىندە تۇركىستان وبلىسىنداعى تۇلكىباس تەمىر جول ستانتسياسىندا قوعام قايراتكەرلەرى م.تىنىشباەۆ پەن ت.رىسقۇلوۆتىڭ ەسكەرتكىشى اشىلدى.
قازاقتان شىققان تۇڭعىش ينجەنەر م.تىنىشباەۆ تەمىر جول قۇرىلىسىن سالۋ كەزىندە تۇلكىباس جەرىندە ت.رىسقۇلوۆپەن كەزدەسكەن. دەرەكتەرگە جۇگىنسەك, مۇحامەدجان تىنىشباەۆ 1926 جىلدان باستاپ تۇرار رىسقۇلوۆتىڭ قولداۋىمەن تۇركىستان-ءسىبىر جولىن سالۋعا قاتىسادى. تەمىرجولشى رەتىندە ول بۇل جوباعا تاجىريبەلى ينجەنەر جانە جەرگىلىكتى جەردىڭ وي-شۇڭقىرىن, ەرەكشەلىكتەرىن جاقسى بىلەتىن مامان رەتىندە تارتىلعان.
قوس تۇلعاعا دەمەۋشىلەر كومەگىمەن ەسكەرتكىش ورناتىلىپ, قۇرمەت كورسەتىلدى, بۇگىنگى ۇرپاق وسىلايشا ءوز اسىلىن باعالايتىنىن ءبىلدىردى. الاش پەرزەنتى تۇرار رىسقۇلوۆتىڭ تۇركىستان-ءسىبىر تەمىر جولىن سالدىرۋداعى ەڭبەگى ەرەن.
ەسكەرتكىشتىڭ اشىلۋ سالتاناتىندا دۇنيەجۇزى قازاقتارى قاۋىمداستىعى توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ, تۇركىستان وبلىسى ارداگەرلەر كەڭەسىنىڭ توراعاسى جەڭىسبەك ماۋلەنقۇلوۆ, ورتا ازياداعى ماڭىزى زور تەمىر جول — تۇركسىبتى سالۋعا قاتىسقان قازاقتىڭ العاشقى ينجەنەر-تەمىرجولشىسى م.تىنىشباەۆ اتىنداعى قوعامدىق قوردىڭ ءتورايىمى نۇرشاكەن ءجۇنىسوۆا ءسوز سويلەپ, اۋداندا اتقارىلعان يگى ءىستىڭ ماڭىزى مەن بۇگىنگى ۇرپاققا بەرەر تاربيەلىك مانىنە توقتالدى.
سونداي-اق, اۋداننىڭ 90 جىلدىق مەرەيتويىنا كەلگەن قوناقتار ەل مۇددەسىن جانقيارلىقپەن قورعاعان الىپ تۇلعانى قۇرمەتتەي وتىرىپ, اۋدان ورتالىعىندا جاڭادان قويىلعان تۇرار رىسقۇلوۆتىڭ ەسكەرتكىشىنە تاعزىم ەتتى. كوپشىلىك الىستان ات ارىتىپ, ءتاۋ ەتە كەلەتىن جەر, اۋداندىق بيۋدجەتتەن 41 ملن تەڭگە ءبولىنىپ, جاڭارتىلعان «تۇركىباسى اۋليە» كەسەنەسىمەن تانىستى.
عالىمجان ەلشىباي,
«ەگەمەن قازاقستان»
تۇركىستان وبلىسى