سانانى تۇرمىس بيلەيدى دەگەن بەلگىلى ويشىلدىڭ ويعا قونىمدى ءسوزى ەسكە تۇسەدى وسىندايدا. راس ءسوز. ءوزىنىڭ الەۋمەتتىك-تۇرمىستىق جاي-كۇيىنە الاڭداماعان ادام عانا ءونىمدى ەڭبەك ەتىپ, ءوزى ءومىر ءسۇرىپ وتىرعان قوعامعا پايداسىن تيگىزە الادى. وسى قاعيدانى تۇتاس ءبىر ۇجىمعا قاتىستى قاراستىرساق, ونىڭ پايداسى تىپتەن جوعارى بولماق. بۇل ارادا باستى ءماسەلە تەك قاراجاتقا عانا ەمەس, ەڭ الدىمەن, ەلدەگى كەز كەلگەن ۇجىم باسشىسىنىڭ الەۋمەتتىڭ جاي-كۇيىن بارلاي بىلەتىن سۇڭعىلا, سەرگەك تە سەزىمتال قاسيەتىنە بايلانىستى دەسەك, شىندىقتان الشاق كەتپەيتىن شىعارمىز.
جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنىڭ رەكتورى قازىباي بوزىموۆتى ءدال وسى توپقا قوسا الامىز. الەۋمەتتىك جاعداي جان-جاقتى شەشىلگەن كەزدە, كەز كەلگەن ادامنىڭ قىزمەت جاساۋ قابىلەتى مەن بەلسەندىلىگى سوعۇرلىم ارتا تۇسەتىنى ايتپاسا دا بەلگىلى ەمەس پە؟ «كوپ تۇكىرسە, كول» دەگەندەي, بارشا ۇجىم ءمۇشەلەرى وسىنداي اسقاق سەزىم اۋانىندا بولسا, عىلىمي تەرمين تىلىمەن ايتقاندا پايدالى اسەر كوەففيتسيەنتى تىپتەن شارىقتاي تۇسپەك.
مىنە, بۇگىندە رەسپۋبليكانىڭ باتىس وڭىرىندە بۇگىنگى زامانعى ءوندىرىسكە قاجەتتى كادرلار ازىرلەۋدىڭ جەتەكشى جوعارى وقۋ ورنىنا اينالىپ وتىرعان ۋنيۆەرسيتەت جەتىستىكتەرىنىڭ باستى سىرى وسىندا. مۇندا ستۋدەنتتەر بولاشاق ماماندىعىنىڭ قىر-سىرىن جەتىك مەڭگەرىپ, باسەكەگە قابىلەتتى مامان بولىپ قالىپتاسۋىنا بارلىق جاعداي تۋعىزىلعان.
بيىل ستۋدەنتتەر جاتاقحانامەن تۇڭعىش رەت تۇگەلدەي قامتىلدى. مۇنداي جەتىستىككە سوڭعى جەتى-سەگىز جىل كولەمىندە قوسىمشا تۇرعىن-جايلاردىڭ سالىنۋى, ستۋدەنتتەر ءۇيىنىڭ پايدالانۋعا بەرىلۋى ارقىلى قول جەتكىزىلدى.
وسى ورايدا ايتا كەتەرلىك تاعى ءبىر ماسەلە, جاڭگىر حان اتىنداعى ۋنيۆەرسيتەتتە ستۋدەنتتەردىڭ مەديتسينالىق ورتالىعى جۇمىس جاسايدى. بۇل نىسان رەسپۋبليكالىق بيۋدجەت ەسەبىنەن قارجىلاندىرىلىپ وتىر.
ۋنيۆەرسيتەت رەكتوراتى تۇرمىس-دەڭگەيى تومەن وتباسىلاردان شىققان, جەتىم نەمەسە اتا-اناسىنىڭ قامقورلىعىنسىز قالعان ستۋدەنتتەرگە قارجىلاي كومەك كورسەتۋگە دە الەۋمەتتىك جاۋاپكەرشىلىك تۇرعىسىنان قارايدى. بۇل ورايدا جوعارىدا كورسەتىلگەن ارنايى كاتەگورياداعى ستۋدەنتتەر توبىنا وقۋ اقىسىن تولەۋ ءۇشىن ەلۋ پايىزدىق جەڭىلدىك بەلگىلەنگەن. سونىمەن بىرگە, ستۋدەنت اسحاناسىنان اۋقاتتانۋ ءۇشىن ولارعا قاجەتتى قاراجات بولىنگەن.
ءبىز بۇعان دەيىن گازەتىمىزگە ۋنيۆەرسيتەتتىڭ ءوز قاراجاتتارى ەسەبىنەن پروفەسسور-وقىتۋشىلار قۇرامى ءۇشىن تۇرعىن-ءۇي سالۋ تاجىريبەسى ورنىققانىن وزگە جوعارى وقۋ ورىندارىنا ۇلگى رەتىندە جازعان ەدىك. وسى ءداستۇر ۇزىلمەي, جىل سايىن جالعاسىن تاۋىپ كەلەدى. ۋنيۆەرسيتەت رەكتورى بىزگە قالاشىق ينفراقۇرىلىمىن ودان ءارى جەتىلدىرۋ ءۇشىن قوسىمشا كەشەندى شارالار ىسكە اسقانىن ايتىپ بەردى. سوعان ءسايكەس, جالپى قۇنى 97 ميلليون تەڭگە تۇراتىن ەلەكتر ەنەرگياسىن تاراتاتىن قوسىمشا ستانسا پايدالانۋعا بەرىلدى. بۇل ستۋدەنتتەر قالاشىعىن ەلەكتر قۋاتىمەن تولىقتاي ءارى ۇزدىكسىز قامتۋعا مۇمكىندىك بەردى.
ءجاڭگىر حان ۋنيۆەرسيتەتىنىڭ كادرلىق قۇرامى مەن الەۋەتى دە جىلدان-جىلعا ءوسىپ كەلەدى. مۇنداعى وقىتۋشىلار قۇرامى جاس ماماندارمەن تولىقتىرىلۋدا. بۇل ءجايتتىڭ ءوزى ولاردى تۇرعىن ۇيمەن جانە باسپانامەن قامتۋ ءىسىن ۇدايى نازاردا ۇستاۋ قاجەتتىلىگىن تۋعىزادى. سولاي بولىپ تا ءجۇر.
تاياۋدا ورال قالاسى اكىمىنىڭ شەشىمىنە سايكەس, پروفەسسور-وقىتۋشىلار قۇرامىنىڭ تۇرعىن ءۇي جاعدايلارىن ودان ءارى جاقسارتۋ ءۇشىن تۇرعىن ۇيلەر مەن كوتتەدجدەر سالۋعا جەر بولىنگەنى الدىڭعى پىكىرىمىزدىڭ دالەلى. ايماقتىق ۋنيۆەرسيتەتتە عالىمدار ءۇيى – عىلىمي-زەرتتەۋ ورتالىعى جۇمىس ىستەيدى. بۇل ۇجىم وتكەن جىلى مينيسترلىكتە بەلگىلەنگەن بازالىق گرانتتى جەڭىپ الىپ, عىلىم مەن ءوندىرىستىڭ اراسىن جاقىنداتا تۇسۋگە سۇبەلى ۇلەس قوسىپ ءجۇر.
ءونىمدى قىزمەت جاساعان ادام, الاڭسىز دەمالا دا ءبىلۋى قاجەت. ۇجىمدا ماسەلەنىڭ بۇل جاعى دا جان-جاقتى ەسكەرىلگەن. جوعارى وقۋ ورنى بازاسىنداعى «نيۆا» دەمالىس جانە ساۋىقتىرۋ كەشەنى جىلدىڭ ءتورت مەزگىلىندە ۇزدىكسىز ءجۇمىس ىستەيدى. مۇندا جىلىنا مىڭعا جۋىق ادام دەمالىپ, دەنەلەرىن شىنىقتىرا الادى. بۇل كەشەن بيۋدجەتتەن تىس كوزدەر ەسەبىنەن قىزمەت اتقارادى.
ءبىز مۇنىڭ ءبارىن نەگە ءتاپتىشتەپ, ءتۇپ-تۇقيانىمەن تۇگەندەپ وتىرمىز. ارينە, تەكتەن-تەك ەمەس. تەاتر كيىم ىلگىشتەن باستالادى دەگەندەي, وقۋ ورنىنداعى الەۋمەتتىك-تۇرمىستىق ماسەلەلەردىڭ شەشىمىن تابۋى وسىنداي ورەلى ىستەردەن باستاۋ الىپ ءجۇر. جوعارىدا ايتىلعان تۇرعىن ۇيلەر مەن اكىمشىلىك عيماراتتارعا, عىلىمي زەرتتەۋ ورتالىعى, 1200 ورىندىق ماشينا جاساۋ فاكۋلتەتىنە, «نيۆا» دەمالىس كەشەنىنە قىزمەت كورسەتۋ ءۇشىن جۇزدەگەن جاڭا جۇمىس ورىندارى اشىلعان. مۇنىڭ ءوزى ۋنيۆەرسيتەتتىڭ تۇتاستاي ورال وڭىرىندەگى جانە ورال قالاسىنداعى جۇمىسسىزدىق دەڭگەيىن تومەندەتۋگە قوسقان قوماقتى ۇلەسى بولىپ تابىلادى. مىنە, ماسەلەنىڭ ءمانىسى وسىندا.
بۇعان قوسا ايتارىمىز, ۇقىپتى دا ۇنەمشىل, قارجىنى جۇمساي ءبىلۋدىڭ ءتارتىبىن جەتىك مەڭگەرگەن وقۋ ورنى باسشىسى ورنىقتىرعان ءۇردىسكە ساي مۇندا قاراجاتتى ۇنەمدەي ءبىلۋدىڭ وڭ تاجىريبەلەرى قالىپتاسقان. ەڭ باستى ايتايىن دەگەنىمىز, وسى ۇنەمدەلگەن قاراجات ءبىرىنشى كەزەكتە ۋنيۆەرسيتەت قىزمەتكەرلەرى مەن ستۋدەنتتەردىڭ الەۋمەتتىك ماسەلەلەرىن شەشۋگە باعىتتالعان. ءبىز اڭگىمە بارىسىندا, اۋىل شارۋاشىلىعى عىلىمىنىڭ دوكتورى, پروفەسسور قازىباي بوزىموۆقا ءبىرىنشى كەزەكتە ۇجىمداعى الەۋمەتتىك ماسەلەلەرگە باسا كوڭىل ءبولۋىڭىزدىڭ باستى سىرى نەدە دەگەن ساۋال تاستاعان ەدىك. بۇل ساۋالعا ول:
– ۋنيۆەرسيتەتتىڭ بولاشاعى – جاستار مەن كاسىبي دەڭگەيى جوعارى بىلىكتى ماماندار. ولار الاڭسىز قىزمەت اتقارۋى ءۇشىن ەڭ الدىمەن الداعى كۇندەر مەن كەلەشەككە دەگەن سەنىمدەرى بولۋى كەرەك. الەۋمەتتىك جانە ماتەريالدىق-تۇرمىستىق جاعدايىنىڭ شەشىمى تابىلاتىنىنا كوزدەرى جەتۋلەرى ءتيىس. تەك سوندا عانا ولار ءوز قابىلەتتەرىن تولىقتاي كورسەتىپ, وزدەرى قىزمەت جاساپ ءجۇرگەن ورتاعا, تۇتاس ەلگە پايداسىن تيگىزە الادى. بۇل رەتتە رەكتوراتتىڭ باستى ءمىندەتى – ولاردى باسپانامەن, جىلۋمەن, جارىقپەن جانە وزگە دە تۇرمىسقا قاجەتتى ماتەريالدىق يگىلىكتەرمەن قامتۋ دەپ ەسەپتەيمىز. وسى باعىتىمىز دۇرىس ەكەنىنە جىل سايىن ايقىن كوز جەتكىزىپ كەلەمىز دەپ, جاۋاپ قايتاردى.
ۋنيۆەرسيتەت باسشىسىنىڭ ويعا قونىمدى وسى پىكىرىنە باسقا ءبىر تۇجىرىم قوسۋدىڭ قاجەتى جوق دەپ بىلەمىز.
تەمىر قۇسايىن.
باتىس قازاقستان وبلىسى.