بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا بەلگىلى بولدى. «كازكونتەنت» اق باسقارما توراعاسى ەۆگەني كوچەتوۆ, «بولاشاق» جانە «جاستار ءۇنى» قوعامدىق بىرلەستىگىنىڭ توراعاسى داۋرەن بابامۇراتوۆ, قازاقستان ازاماتتىق اليانسىنىڭ ديرەكتورى گامال تۇزەلباەۆ, «بولاشاق» قاۋىمداستىعى كەڭەسىنىڭ مۇشەسى دينارا ءشايجۇنىسوۆا قاتىسقان ءباسپاسوز جيىنىندا «100 جاڭا ەسىم» جوباسىنىڭ ماڭىزدىلىعى تۋرالى ءھام ەكىنشى كەزەڭىندەگى باسىمدىقتار تۋرالى اڭگىمە ءوربىدى.
«100 جاڭا ەسىم» جوباسىنىڭ ماقساتى – تابىستى, باسەكەگە قابىلەتتى بولۋ, پراگماتيزم مەن ءبىلىم كۋلتى يدەيالارىن, تاۋەلسىزدىك جىلدارى قازاقستاننىڭ دامۋىنا ەلەۋلى ۇلەس قوسقان ادامداردىڭ ءومىربايانىن ۇلگى ەتە وتىرىپ ناسيحاتتاۋ. ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» ماقالاسىندا باسا نازار اۋدارىلعان جاستار ماسەلەسى دە قوعام تالقىسىنان تىس قالماعان بولاتىن. قالىڭ ەل قولداعان سول باعدارلامالىق ماقالادا ايتىلعان ءار ماسەلە جەكە-جەكە قارالىپ, ءار تاپسىرما ءجىتى قاداعالاۋمەن ىسكە اسىپ كەلەدى. سونىڭ ءبىر تارماعى رەتىندە «100 جاڭا ەسىم» جوباسى دا ىسكە قوسىلعان بولاتىن. وتكەن جىلى اتالعان جوباعا 2 مىڭنان اسا ءوتىنىم قابىلدانىپ, ونىڭ 302-ءى ىرىكتەۋ كەزەڭىنەن ءوتىپ, 102 ۇمىتكەر «قازاقستاننىڭ 100 جاڭا ەسىمى» جوباسىنىڭ جەڭىمپازى اتانعان, ەلباسى ءوزى قابىلداپ, ارنايى كەزدەسۋ وتكىزگەن بولاتىن. بۇل جوبانىڭ باستى ءمانى كەيىنگى تولقىندى ەڭبەككە, بىلىمگە, ىسكەرلىك پەن ادالدىققا قۇشتار ەتۋ ەكەندىگى دە باسا ايتىلىپ كەلەدى. بيىلعى ەكىنشى كەزەڭنىڭ وزىندىك ەرەكشەلىگى بار.
«وسىدان ءبىر جارىم جىل بۇرىن ەلباسىنىڭ جاڭا زامانداعى ترەندتەر مەن جاڭا باعىتتارعا سايكەس جاستاردىڭ سانا-سەزىمىنە, رۋحاني دۇنيەسىنە قوزعاۋ سالعان ماقالاسى شىقتى. بۇل ماقالا ءبىزدىڭ ەلىمىزدەگى قوعام وكىلدەرىنىڭ اراسىندا قىزۋ قولداۋ تاپتى. سوڭعى جىلداردا كەزدەسپەي كەتكەن ازاماتتىق قوعام مەن بيلىكتىڭ اراسىندا ديالوگ ورنادى. سول رۋحاني جاڭعىرۋ ماقالاسى اياسىندا «100 جاڭا ەسىم» باعدارلاماسى ىسكە اسقان بولاتىن. مۇلدە باسقا باعىت, جاڭا تەحنولوگيا ارقىلى جۇزەگە استى. تاۋەلسىزدىك جىلدارى قازاق قوعامىنىڭ دامۋىنا زور ۇلەس قوسقان ازاماتتار تاڭدالدى. الەۋمەتتىك ءوپتيميزمنىڭ ارقاسىندا تاڭدالعان جاڭا تۇلعالارىمىز قوعامعا ۇلەس قوسادى دەۋگە نەگىز بار. ازاماتتىق قوعامنىڭ تاراپىنان 100 جاڭا ەسىمدى ءارى قاراي جالعاستىرساق دەگەن ۇسىنىستار بولدى. قازاق قوعامىنىڭ دامۋىنا ۇلەس قوسىپ كەلە جاتقان ازاماتتار 100-دەن كوپ دەگەن پىكىرلەر ايتىلعان سوڭ, سوعان سايكەس جاڭا ەسىمدەردى ىزدەسەك دەگەن قوعامدىق تاپسىرىس بولىپ وتىر. 100 جاڭا ەسىمنىڭ ەكىنشى كەزەڭىن باستاعالى وتىرمىز. بۇل جاستاردىڭ اراسىنا جاڭا باعىت, رۋحاني دۇنيەلەرگە جاڭا سەرپىن اكەلەدى دەپ ويلايمىن. ءارتۇرلى تاعدىرلاردى جاستارعا ۇلگى ەتىپ كورسەتىپ, جاقسى جاعىنان ۇسىنامىز» دەدى كاسىپوداقتار فەدەراتسياسى توراعاسىنىڭ ورىنباسارى ەرلان سايروۆ.
«100 جاڭا ەسىم» قازاقستاندا ەرەكشە تالانتتى جانە تۇلعالىق سيپاتقا يە ادامداردى ىزدەپ, جوباعا بەلسەنە قاتىسۋعا شاقىرىپ وتىر. اتالعان جوبا كاسىبي سالادا جەتىستىككە جەتكەن, ءوز دارا جولى وزگەگە ونەگە بولاتىن ادامدارعا ارنالعان. وسىمەن ەكىنشى جىل ۇيىمداستىرىلىپ وتىرعان جوبانىڭ بيىلعى ەرەكشەلىكتەرىنە كەلسەك, ۇمىتكەر ءوزىن ءوزى ۇسىنۋعا جانە ۇمىتكەردى ۇيىم اتىنان ۇسىنۋعا بولادى. سونىمەن قاتار ۇكىمەتتىك ەمەس ۇيىمدار وكىلدەرىنە باسىمدىق بەرىلەتىنى ايتىلدى. سول سياقتى وتكەن جىلعى ىرىكتەۋ كەزەڭىنەن وتپەي قالعان ۇمىتكەرلەر بيىل تاعى دا ءوتىنىم بەرۋگە قۇقىلى. ءوتىنىم وسى جىلدىڭ قازان ايىنىڭ ورتاسىنا دەيىن 100esim.el.kz سايتى ارقىلى قابىلدانادى, ودان ءارى قاراشا ايى بويى ونلاين داۋىس بەرۋگە جالعاسادى. «100 جاڭا ەسىم» جوباسىنىڭ جاڭا ماۋسىمىن اشىق دەپ جاريالايمىز. ۇمىتكەردى تاڭداۋدا قويىلاتىن باستى تالاپ, ول ادامنىڭ تاۋەلسىز ەلىمىزدىڭ دامۋىنا ءوز ۇلەسىن قوسۋى. ۇمىتكەرلەردى انىقتاۋدا قازىلار القاسى بولمايدى, لايىقتى دەگەن ازاماتتى نە ازاماتشانى حالىق داۋىس بەرۋ ارقىلى ءوزى تاڭدايدى», دەدى «قازكونتەنت» اق-تىڭ باسقارما توراعاسى ەۆگەني كوچەتوۆ.
قىزمەت سالاسى بويىنشا ۇيىمدار توبىنىڭ كەڭىنەن تانىستىرىلۋىن قامتاماسىز ەتۋ, سونداي-اق ازاماتتىق باستامالاردى ناسيحاتتاۋ ماقساتىندا جوبانىڭ جاڭا ۇمىتكەرلەرىن تاڭداۋ ينستيتۋتسيونالدىق ادىستەرمەن جۇرگىزىلەدى. ءار قوعامدىق ۇيىم, بىرلەستىك ەرەكشە تاريحى مەن كاسىبي جەتىستىكتەرى بار ۇمىتكەرلەرىن ۇسىنا الادى. ۇمىتكەرلەرگە قويىلاتىن نەگىزگى تالاپ مىناداي:
• ۇمىتكەردىڭ كامەلەت جاسقا تولعان بولۋى (18);
• قىزمەت سالاسىندا ەلدىڭ جاعىمدى ءيميدجىن قالىپتاستىرۋعا ۇلەس قوسقان ايرىقشا جەتىستىكتەرىنىڭ, قاتىسۋشى ءيميدجىن دامىتۋعا ىقپال ەتەتىن تۇلعالىق قاسيەتتەرىنىڭ بولۋى;
• ۇلگى الۋعا لايىق, جاستاردى پاتريوتتىق جانە تۋعان جەرگە ادالدىق رۋحىندا تاربيەلەۋگە, ەڭبەك كۋلتىن قالىپتاستىرۋعا ىقپال ەتەتىن قوعامدىق-ساياسي جانە ەڭبەك قىزمەتىنىڭ بولۋى;
• قازىرگى قازاقستاننىڭ دامۋىنا قوسقان ناقتى ۇلەسىنىڭ بولۋى.
• قازىرگى قازاقستاننىڭ, ونىڭ تابىستارى مەن ءتۇرلى سالاداعى جەتىستىكتەرىنىڭ جارقىن ۇلگىسى بولا الاتىن تۇلعا;
«100 جاڭا ەسىم» جوباسىندا ۇكىمەتتىك ەمەس ۇيىمدارعا باسىمدىق بەرىلۋى – ۇلكەن سەنىم مەن قولداۋ. لايىقتىلار, ارينە, كوپ. سونىڭ ىشىنەن 100 ەسىمدى انىقتاۋ بارىنشا ءادىل ءوتۋى ءتيىس. سول ءۇشىن ۇكىمەتتىك ەمەس ۇيىمداردىڭ قىزمەتىنە باسىمدىق بەرۋ قاجەت. قازاقستان حالقىنىڭ كوبى اۋىلدا تۇرادى. سول سەبەپتى ايماقتاعى تالانتتى جاستاردى, ازاماتتاردى انىقتاۋ ءۇشىن وسى ۇيىمدار بارىنشا اتسالىسادى دەپ ويلايمىن», دەدى داۋرەن بابامۇراتوۆ.
«100 جاڭا ەسىم» جوباسى قازاق قوعامىنا, يا جاستارىنا نە بەرەدى؟ ونىڭ ماڭىزدىلىعى نەدە؟ وسى سۇراقتارعا دا ءباسپاسوز جيىنىندا جاۋاپ بەرىلدى. بۇل قازاق قوعامىنىڭ وپتيميستىك ساناسىن دامىتۋعا, قازاق جاستارىنا ۇلگىلى ەل ازاماتتارىن كورسەتۋدە ماڭىزدى قىزمەت اتقاراتىن جوبا. ەل ءۇشىن تەر توگىپ جۇرگەن زامانداستارىمىز ەلەنۋگە دە, قۇرمەتتەلۋگە دە لايىق.
باعاشار تۇرسىنباي ۇلى,
«ەگەمەن قازاقستان»