كەشە اقوردادا مەملەكەتتىك حاتشى قانات ساۋداباەۆتىڭ توراعالىعىمەن قازاقستان رەسپۋبليكاسى پرەزيدەنتى جانىنداعى جاپپاي قىرىپ-جويۋ قارۋىن تاراتپاۋ ماسەلەلەرى ءجونىندەگى كوميسسيانىڭ كەزەكتى وتىرىسى ءوتتى.
وتىرىس كەزىندە ءسوز العان قانات ساۋداباەۆ: «كوميسسيا جۇمىسىنىڭ ناتيجەسى, ونىڭ قىزمەتى يادرولىق قاۋىپتى تومەندەتۋگە جانە يادرولىق قارۋدى تاراتپاۋعا قاتىستى الەمدىك ۇدەرىستەگى ءبىزدىڭ ەلباسىنىڭ دۇنيە ءجۇزى مويىنداعان كوشباسشىلىعىن نىعايتۋعا جانە جاھاندىق قاۋىپسىزدىكتى قامتاماسىز ەتۋدەگى قازاقستاننىڭ ءرولىن ودان ءارى جوعارىلاتۋعا تىڭ سەرپىن بەردى», دەدى.
قانات ساۋداباەۆتىڭ ايتۋىنشا, كوميسسيانىڭ بەلسەندى قاتىسۋىمەن بىرنەشە حالىقارالىق جوبالار جۇزەگە اسىرىلعان. سولاردىڭ ءبىرى – بن-350 رەاكتورىنىڭ (اقتاۋ قالاسى) يگەرىلگەن يادرولىق وتىنىن تاسىمالداۋ. 2010 جىلعى ساۋىردە ۆاشينگتون قالاسىندا وتكەن يادرولىق قاۋىپسىزدىك جونىندەگى جاھاندىق سامميتكە اقش پرەزيدەنتى ب.وبامانىڭ شاقىرۋى بويىنشا قازاقستان پرەزيدەنتى نۇرسۇلتان نازارباەۆتىڭ قاتىسۋى ايرىقشا مانگە يە. سەمەي پوليگونىنىڭ جابىلۋىنىڭ 20 جىلدىعىنا وراي, استانا جانە سەمەي قالالارىندا «يادروسىز الەم ءۇشىن» حالىقارالىق فورۋمى, سونىمەن قاتار, شەت ەلدەردە بىرقاتار ءىس-شارالار ءوتكىزىلدى. قازاقستان مەن اتوم ەنەرگەتيكاسى جونىندەگى حالىقارالىق اگەنتتىك اراسىندا جەمىستى ىنتىماقتاستىق قامتاماسىز ەتىلۋدە, دەدى مەملەكەتتىك حاتشى.
وتىرىس بارىسىندا قازاقستان رەسپۋبليكاسى پرەمەر-ءمينيسترىنىڭ ورىنباسارى – يندۋستريا جانە جاڭا تەحنولوگيالار ءمينيسترى ءا.يسەكەشەۆتىڭ, سىرتقى ىستەر ءمينيسترى ە.قازىحانوۆتىڭ كوميسسيانىڭ وتكەن وتىرىستارىنداعى حاتتامالىق تاپسىرمالاردى ورىنداۋ بارىسى جونىندەگى ەسەپتەرى تىڭدالدى.
كوميسسيانىڭ قورىتىندى وتىرىسىنىڭ ناتيجەسى بويىنشا مەملەكەتتىك ورگاندارعا 2012 جىلعى ناۋرىزدا سەۋل قالاسىندا وتەتىن يادرولىق قاۋىپسىزدىك ءجونىندەگى جاھاندىق سامميتكە قازاقستاننىڭ لايىقتى قاتىسۋى ءۇشىن دايىندىق شارالارىنا جانە جاپپاي قىرىپ-جويۋ قارۋلارىن تاراتپاۋ رەجىمىن ودان ءارى نىعايتۋعا باعىتتالعان ءتيىستى تاپسىرمالار بەرىلدى.
ءلايلا ەدىلقىزى.