وتكەن سەنبىدە «التىن قارعالى» شيپاجايىندا 2012 جىلى قاڭتار ايىنداعى پارلامەنت ءماجىلىسى مەن بارلىق دەڭگەيدەگى ءماسليحاتتار دەپۋتاتتارىنىڭ سايلاۋىنا وراي قازاقستان كوممۋنيستىك حالىقتىق پارتياسىنىڭ كەزەكتەن تىس ءVى سەزى ءوتتى. وندا پارتيا پلەنۋمىنىڭ قاۋلىسى بويىنشا ساياسي پارتيانىڭ سايلاۋالدى تۇعىرناماسى ورتاعا سالىنىپ, پارتيالىق تىزىمدەگى كانديداتتار بەكىتىلدى.
سونىمەن, پارلامەنت ءماجىلىسى مەرزىمىنەن بۇرىن تاراتىلىپ, ساياسي دودا باستالىپ كەتتى. قازاقستان كوممۋنيستىك حالىقتىق پارتياسى (قكحپ) دا وزدەرىنىڭ بۇل ساياسي ناۋقانعا قاتىسۋعا دايىن ەكەندىكتەرىن ءبىلدىرىپ, پارتيا مۇشەلەرىن سايلاۋدى ۇيىمشىلدىقپەن وتكىزۋگە شاقىردى. سەزدى اشقان قكحپ وك-ءتىڭ حاتشىسى ۆلاديسلاۆ كوسارەۆ پارتيا الدىندا تۇرعان ماقسات, مىندەتتەرىنە توقتالىپ, ەلىمىزدىڭ جوعارى زاڭ شىعارۋشى ورگانىندا ءوز وكىلدەرىنىڭ جوق ەكەنىن, سوندىقتان پارتيا مۇشەلەرى پارلامەنت ءماجىلىسى سايلاۋالدى دايىندىق جۇمىسىن جوعارى دەڭگەيدە وتكىزۋگە مۇددەلى ەكەندىكتەرىن ءبىلدىردى.
– بولاشاق ءماجىلىستىڭ جانە ءماسليحاتتاردىڭ قۇرامى ازاماتتاردىڭ ساياسي تالعامىن بارىنشا قاناعاتتاندىراتىن بولادى دەپ ۇمىتتەنەمىز, – دەدى حاتشى ءوز سوزىندە. – ءبىز قوعامىمىزداعى جاعدايدى تەڭەستىرەتىندەي تەتىك بولۋ نيەتىندەمىز, ويتكەنى, بۇگىنگى كۇنى وكىلەتتى ورگانداردا بۋرجۋازيا – باي ادامدار كوپشىلىك بولىپ وتىر.
بۇل جەردە ۆلاديسلاۆ كوسارەۆ وزدەرىنىڭ باي ادامدارعا قارسى كۇرەسپەيتىنىن, كەدەيلىككە قارسى كۇرەسەتىنىن اتاپ كورسەتتى. سوندىقتان دا پارتيا, بىرىنشىدەن, بيلىكتىڭ وكىلەتتى ورگاندارىنا, ەڭ الدىمەن ماجىلىسكە قاراپايىم حالىقتىڭ وكىلدەرى كىرۋى ءۇشىن كۇرەسپەك. وسىلايشا حالىقتىق كوممۋنيستەر وزدەرىنىڭ پارتيالىق تىزىمدەرىنە پارتيا حاتشىلارىمەن قاتار, قاتارداعى كوممۋنيستەردى دە – مۇعالىم, كونديتەر, دارىگەر, ەكسكاۆاتورشى, وپەراتورلاردى دا ەنگىزدى. ولاردىڭ اراسىندا ءار ۇلتتىڭ وكىلدەرى – قازاق, ورىس, ۋكراين, تاتار, ت.ب. بار. ەڭ ءبىر ايتا كەتەرلىگى, پارتيالىق ءتىزىمنىڭ 30 پايىزىن ايەلدەر قۇرايدى.
– ءبىزدىڭ پارلامەنتكە بارۋداعى ەڭ باستى ماقساتىمىز – قاراپايىم قازاقستاندىقتاردىڭ مۇددەسىن قورعاۋ. بىزدەر كاپيتاليزمنىڭ تىعىرىققا تىرەلگەنىن مالىمدەيمىز. سوندىقتان حالىقتىڭ اۋقاتتى ءومىر ءسۇرۋى ءۇشىن قولدان كەلگەننىڭ ءبارىن جاساۋىمىز كەرەك. ءبىزدىڭ پارتيا وسى شەشىمدى دۇرىس دەپ تابادى. سوندىقتان حالىقتىق كوممۋنيستەر پارتياسى ەڭ الدىمەن الەۋمەتتىك ماسەلەلەر – ازىق-ت ۇلىك, ءدارى-ءدارمەك, جانار-جاعار ماي, كوممۋنالدىق قىزمەت باعاسىنىڭ وسۋىمەن كۇرەسەتىن بولادى. سونىمەن بىرگە, بولاشاق ءماجىلىسشىلەرىمىز ەڭبەككە ساعاتتىق اقى تولەۋدى قاراستىراتىن جانە جالدامالى جۇمىسشىلاردىڭ قۇقىعىن قورعايتىن ءتيىمدى جاڭا ەڭبەك كودەكسىن قابىلداۋعا ىقپال ەتۋگە كۇش سالاتىن بولادى.
جيىندا قكحپ-نىڭ قوستاناي وبكومىنىڭ ءبىرىنشى حاتشىسى, تاريح عىلىمدارىنىڭ دوكتورى دميتري لەگكي, باتىس قازاقستان وبكومىنىڭ ءبىرىنشى حاتشىسى ەكاتەرينا ماكەەۆا, قكحپ-دان قاراعاندى وبلىسى اباي اۋداندىق ءماسليحاتىنىڭ دەپۋتاتى نيكولاي دۋدكين, ت.ب. جارىسسوزگە شىعىپ, ءوز ويلارىن ورتاعا سالدى.
– ءبىزدىڭ وبلىستىق پارتيا كوميتەتى سايلاۋعا كىرىسىپ تە كەتتى, – دەدى سەزدە ءسوز العان جامبىل وبكومىنىڭ ءبىرىنشى حاتشىسى جاننا ماماشەۆا. – نەگىزىنەن پارتيانىڭ سايلاۋالدى باعدارلاماسىندا بىرقاتار وزەكتى ماسەلەلەر قامتىلىپ, جان-جاقتى كورسەتىلگەن. كەيىن كوميسسيا جۇمىس ىستەگەندە ول تاعى دا تولىقتىرىلدى. قازىر ەلىمىزدە بىرقاتار ساياسي پارتيا تىركەلگەن. سىزدەر بىلەسىزدەر, ادام ەڭ العاش ءۇي سالعاندا الدىمەن ىرگەتاسىن قالايدى. مەنىڭ ايتايىن دەگەنىم, سول پارتيالاردىڭ ىرگەتاسى – كوممۋنيستىك پارتيانىڭ نەگىزى, يدەياسى. ونى بيلىك پارتياسىنان باستاپ جاڭادان قۇرىلعان پارتيالاردىڭ بارلىعى ۇمىتپاۋى كەرەك. ارينە, ساياسي جەڭىس, جەڭىلىستەر ءار مەملەكەتتە دە بولىپ جاتادى. سوندىقتان ولار وزدەرىنىڭ سايلاۋالدى تۇعىرناماسىندا وسىنى نەگىز ەتىپ, ەسكەرۋلەرى ءتيىس.
سونداي-اق سەزدە ءسوز العان مارتەبەلى قوناق – كۋبا ەلشىلىگىنىڭ ءبىرىنشى حاتشىسى ميگەل سانچەس وردونەس الدىمەن جينالعانداردى ەل تاۋەلسىزدىگىنىڭ 20 جىلدىعىمەن قۇتتىقتاپ, كۋبا كوممۋنيستەرىنىڭ اتىنان تابىس تىلەدى.
«قازاقستاننىڭ بولاشاعى ءۇشىن» اتتى پارتيا باعدارلاماسىنىڭ قازاقستان حالقىنىڭ الەۋمەتتىك جاعدايىن تۇپكىلىكتى ءوزگەرتۋگە ارنالىپ, ءتۇرلى ءادىس-ءتاسىلدەر ارقىلى حالىقتىڭ تۇرمىسىن جاقسارتۋدى ويلاستىرعاندارىن جەتكىزگەن قكحپ وك-ءتىڭ حاتشىسى جامبىل احمەتبەكوۆ سەزدە تۇجىرىمدامالى تۇردە بەكىتىلگەنمەن, پارلامەنتكە وتەتىن بولسا, بيىك مىنبەردەن سويلەپ, ونى زاڭ تۇرىندە بەكىتىپ, ورىنداۋعا كۇش سالاتىندىقتارىن جەتكىزدى.
– پارتيانىڭ كەزەكتەن تىس سەزىنە وڭىرلەردەن 67 دەلەگات قاتىسىپ وتىر, – دەدى ول بىزگە. – بارلىق وبلىستاردان تۇسكەن كانديداتتار بويىنشا پارلامەنت ماجىلىسىنە پارتيالىق تىزىممەن 24 ادام ۇسىنىلدى. ونى سەزدە بەكىتەتىن بولسا, ۇگىت-ناسيحات ناۋقانىنا ەرتەڭنەن باستاپ كىرىسەمىز. قازىرگى كەزدە ەكونوميكانىڭ قانشالىقتى وركەندەپ دامىعانىن ەسكەرەتىن بولساق, وعان كەتكەن قاراجاتتىڭ قايدا جۇمسالىپ, قايدا قويىلىپ جاتقانىنان حالىق حابارسىز. سوندىقتان سونىڭ كوزىن اشىپ بەرىپ, ونى تەك الەۋمەتتىك سالاعا جۇمساۋدى, بيۋدجەت قىزمەتكەرلەرىنىڭ جالاقىسىن كوتەرۋ, تۇرعىن ءۇي-كوممۋنالدىق شارۋاشىلىعىنداعى ءوسىپ جاتقان ءتاريفتى قالاي اۋىزدىقتاۋ, ەسكىرگەن ينجەنەرلىك جۇيەلەردى اۋىستىرۋ ماسەلەلەرىن قولعا الماق بولىپ وتىرمىز. ولاردىڭ ىشىندە جۇمىسسىزدىقتى, زەينەتكەرلەردى, مۇگەدەكتەردى, ءبىلىم بەرۋ جانە مەديتسينا سالالارى قىزمەتكەرلەرىن دە قامتىدىق.
سەزد سوڭىندا كۇن ءتارتىبىندەگى ەكىنشى ماسەلە – «ءبىز بولاشاق ءۇشىن كۇرەسەمىز» سايلاۋالدى تۇعىرناماسى ءبىراۋىزدان قابىلدانىپ, 21 ادامنان تۇراتىن پارتيالىق ءتىزىم بەكىتىلدى.
گۇلزەينەپ سادىرقىزى.