ەل تاۋەلسىزدىگىنىڭ ون جىلدىق مەرەكەسى قارساڭىندا سەمەيدە جاستار تەاترى اشىلعان بولاتىن. ال ونىڭ قىسقاشا تاريحى تومەندەگىدەي. 1996 جىلى وسىنداعى ساز كوللەدجىندە اكتەرلىك ءبولىم اشىلعان بولاتىن. ونىڭ اشىلۋىنا الماتىداعى ت.جۇرگەنوۆ اتىنداعى ونەر اكادەمياسىنىڭ پروفەسسورى داريعا تۇرانقۇلوۆا, دوتسەنت مايرا ومارباەۆا مەن اعا وقىتۋشى مەيرامگۇل الەپاروۆا بىردەن ءبىر سەبەپكەر بولعان-دى. سول شاقتا بۇل كىسىلەر سەمەيگە قىزمەت اۋىستىرىپ كەلە قالعان.
ءCويتىپ, 2001 جىلى سول ءبولىم تۇلەكتەرىنىڭ كۇشىمەن مۇندا «داريعا-اي» جاستار تەاترى اشىلعان بولاتىن. سول شاقتا تەاتردىڭ اياعىنان قاز تۇرىپ كەتۋىنە ونىڭ العاشقى ديرەكتورى ءارى كوركەمدىك جەتەكشىسى اقپارالى ايتىباەۆ كوپ ەڭبەك ءسىڭىردى.
العاشقى جىلدارى قالالىق بيۋدجەتتەن قارجىلاندىرىلعان تەاتر بۇگىندە وبلىس قامقورلىعىنا الىنعان. بيىل وبلىس اكىمى تاراپىنان تەاتر ۇجىمىنا سۋ جاڭا اۆتوكولىك ءبولىندى. سونىڭ ارقاسىندا وبلىستىڭ كوپتەگەن اۋداندارىندا ونەر ساپارىمەن بولىپ قايتتىق. كورەرمەندەر نازارىنا ەل تاۋەلسىزدىگىنىڭ جيىرما جىلدىعىنا وراي بەلگىلى اقىن نەسىپبەك ايت ۇلىنىڭ «بايتەرەك» داستانى نەگىزىندە جازىلعان پوەتيكالىق درامانى جانە جەلتوقسان قاھارمانى قايرات رىسقۇلبەكوۆ تۋرالى «ىزعارلى جەلتوقسان» جانە باسقا تۋىندىلاردى ۇسىندىق.
وسى وتكەن ون جىلدا تەاتردىڭ قول جەتكىزگەن جەتىستىكتەرى بارشىلىق. سولاي دەي تۇرعانمەن, الار اسۋىمىز ءالى دە الدا دەپ بىلەمىز. جوعارىدا ايتقانىمىزداي, قامقورلىقتان كەندە ەمەسپىز. ەندى وبلىس, قالا تاراپىنان جاستار تەاترى ءۇشىن جەكە عيمارات ىزدەستىرىلىپ جاتىر. سونداي-اق ساز تەاترىنداعى جابىلىپ قالعان اكتەرلىك ءبولىم قايتا اشىلسا, نۇر ۇستىنە نۇر بولار ەدى. ءبىر سوزبەن ايتقاندا, تاۋەلسىزدىك جەمىسى بولىپ تابىلاتىن جاستار تەاترى ەلىمىزدىڭ رۋحاني ورتالىقتارىنىڭ ءبىرى بولىپ سانالاتىن سەمەيدىڭ مادەني جاعىنان ودان ءارى گۇلدەنە تۇسۋىنە ءوز ۇلەسىن قوسا بەرەتىندىگىنە ەش كۇمان بولماسا كەرەك.
امانگەلدى باقتينوۆ, «داريعا-اي» جاستار تەاترىنىڭ ديرەكتورى.
سەمەي.