2000 جىلى ت. جۇرگەنوۆ اتىنداعى ۇلتتىق ونەر اكادەمياسىن بىتىرگەن وندىردەي ءبىر توپ تۇلەك پەتروپاۆل قالاسىنا ارنايى جولدامامەن كەلىپ, تاۋەلسىز ەلىمىزدىڭ قازاق ونەر ورداسىنىڭ شىمىلدىعىن اشقان ەدى. سول كەزدە ونەر دەسە ىشكەن اسىن جەرگە قوياتىن جۇرتشىلىق ولگەنى ءتىرىلىپ, وشكەنى جانعانداي كەرەمەت كۇي كەشتى. ءسويتىپ, رۋحاني شولىركەپ وتىرعان قىزىلجارلىقتاردى جاس ۇجىم ءوز ونەرلەرىمەن قۋانىشقا بولەدى. سودان بەرگى ۋاقىتتا الپىستان استام قويىلىم ساحنالاندى. وبلىسقا ارنايى جۇمىس ساپارى كەزىندە قاسيەتتى ونەر ورداسىنا ەلباسى نۇرسۇلتان نازارباەۆتىڭ كەلۋى ۇمىتىلماستاي اسەر قالدىردى.
سودان بەرگى كەزەڭ تەاتر ۇجىمىنىڭ قالىپتاسۋ, ءوسۋ, ورلەۋ جىلدارى بولدى. تالاي دودالى بايقاۋ-فەستيۆالداردا باعىن سىناپ, توپ جاردى. 2003 جىلى ەگيپەتتىڭ استاناسى كايردە وتكەن حالىقارالىق تەاترلار فەستيۆالىندە ۇزدىك وندىقتار قاتارىنان كورىنۋىمىز جىگەرىمىزدى تاسىتتى. شەتەلدىكتەر نازارىنا «قوزى كورپەش-بايان سۇلۋ» قويىلىمى ۇسىنىلدى. 2004 جىلى وتكەن رەسپۋبليكالىق فەستيۆالدا تەاتردىڭ كوركەمدىك جەتەكشىسى ءورازالى اقجارقىن-سارسەنبەك «ۇزدىك رەجيسسەر» اتاندى. ەڭ باستىسى, جۇرتشىلىق ۇلتتىق, الەمدىك كلاسسيكادان باستاپ قازىرگى زاماننىڭ تىنىس-تىرشىلىگىن بەينەلەيتىن شىعارمالاردى دا ىنتىعا كورەدى, اسىعا توسادى. م. اۋەزوۆتىڭ «ەڭلىك-كەبەگى», ع.مۇسىرەپوۆتىڭ «قوزى كورپەش-بايان سۇلۋى», ش.ايتماتوۆتىڭ «شىڭعىسحاننىڭ اق بۇلتى», «س.ءجۇنىسوۆتىڭ «قىسىلعاننان قىز بولدىسى», ا.كيريدىڭ «ءيىرىمى», ك.گولدونيدىڭ «ەكى قوجاعا ءبىر قىزمەتشىسى» سياقتى دۇنيەلەر رەپەرتۋارىمىزعا تۇراقتى ەندى.
ونەر ادامدارىنىڭ تىنىمسىز ەڭبەگى وبلىس باسشىلىعى تاراپىنان قوشەمەت-قۇرمەتكە بولەنىپ جۇرگەنىن ايتۋ ورىندى. ايماق باسشىسى سەرىك ءبىلالوۆ ءبىر توپ جاس ارتىستەرگە جايلى پاتەرلەردىڭ كىلتىن, سىياقىلار تابىس ەتتى. قوسىمشا قارجى ءبولدى. بۇگىندە تەاتر جانىندا «الۋا» بي توبى, كامەرالىق وركەستر جۇمىس ىستەيدى. ءبىز وبلىستىڭ ەلدى مەكەندەرىنە, كورشىلەس وبلىستارعا گاسترولدىك ساپارلارمەن شىعۋ ءداستۇرىن ۇزگەن ەمەسپىز. مىسالى, قوستانايدا ون بەس قويىلىم كورسەتىپ, ساپارىمىزدى گالا-كونتسەرتپەن تۇيىندەدىك. كوكشەتاۋلىقتارعا الىمبەك ورازبەكوۆتىڭ «ءبىر ءتۇپ الما اعاشى» سپەكتاكلىن ۇسىندىق. رەسەيدىڭ شەكارالاس وبلىستارىنداعى قازاق اۋىلدارىنا دا ءجيى بارىپ تۇرامىز.
سوڭعى جىلدارى ۇجىم قابىلەتتى, تالانتتى جاستارمەن تولىعا ءتۇستى. تەاترىمىز جاس. الار اسۋلارى ءالى الدا. جاسامپاز جيىرما جىلدىڭ تەڭ جارتىسىن ءوز تاريحىنا جازعان س. مۇقانوۆ اتىنداعى وبلىستىق سازدى-دراما تەاترى تەرىسكەيدەگى كيەلى ونەردىڭ ءبىر يەسى رەتىندە رۋحاني قۇندىلىقتارعا دەگەن قۇشتارلىعى مەن ءىڭكارلىگىن ءبىر ءسات تە بوساڭسىتپاق ەمەس.
قۋاندىق قاسىموۆ, ءسابيت مۇقانوۆ اتىنداعى سولتۇستىك قازاقستان وبلىستىق قازاق سازدى-دراما تەاترىنىڭ ديرەكتورى.
سولتۇستىك قازاقستان وبلىسى.