كەشە قازاقستان پارلامەنتى سەناتىنىڭ توراعاسى قايرات ءمامي تۇركپا-نىڭ الەۋمەتتىك, مادەني جانە گۋمانيتارلىق ماسەلەلەر كوميسسياسىنىڭ وتىرىسىنا قاتىسۋ ءۇشىن استاناعا كەلگەن تۇركىتىلدەس مەملەكەتتەر پارلامەنتتىك اسسامبلەياسىنىڭ دەلەگاتسيا مۇشەلەرىمەن كەزدەستى, دەپ حابارلادى پارلامەنت سەناتىنىڭ ءباسپاسوز قىزمەتى.
كەزدەسۋ بارىسىندا ق.ءمامي تۇركى الەمى حالىقتارىنىڭ اراسىنداعى مادەني-رۋحاني بايلانىستاردى نىعايتۋعا جاردەمدەسەتىن شارالارعا قاتىسقانى ءۇشىن پارلامەنتشىلەرگە العىس ايتتى.
– «پارلامەنت سەناتى باۋىرلاس مەملەكەتتەر اراسىنداعى ەكىجاقتى جانە كوپجاقتى تۇردەگى پارلامەنتارالىق بايلانىستاردى نىعايتۋعا ىقپال ەتۋگە ءازىر», – دەدى توراعا.
بىلتىرعى قازان ايىندا ءتۇركىتىلدەس ەلدەردىڭ قازاقستاندا بولعان العاشقى ءسامميتىنىڭ ءناتيجەلەرىن جوعارى باعالاي كەلىپ, توراعا تۇركىتىلدەس ەلدەر ىقپالداستىعىنىڭ ودان ءارى تەرەڭدەي تۇسۋىنە تىلەكتەستىگىن ءبىلدىردى.