ەل تاۋەلسىزدىگى مەرەيتويى قاراساڭىندا ىشكى ىستەر مينيسترلىگىنىڭ كولىكتەگى ىشكى ىستەر دەپارتامەنتىندە ايتۋلى وقيعا بولىپ ءوتتى. مۇندا سالتاناتتى جاعدايدا ۆەدومستۆو باسشىلىعى مەن ارداگەر-زەينەتكەرلەردىڭ قاتىسۋىمەن وزدەرىنىڭ قىزمەتتىك مىندەتتەرىن اتقارۋ كەزىندە وتانى مەن حالقى ءۇشىن ومىرلەرىن قۇربان ەتكەن قىزمەتكەرلەرگە ارنالىپ ەسكەرتكىش اشىلدى.
كولىكتەگى ىشكى ىستەر دەپارتامەنتى باستىعىنىڭ مىندەتىن اتقارۋشى ەرلان يسابەكوۆ سالتاناتتى جيىندى اشقان كەزىندە سويلەگەن سوزىندە اتاپ وتكەندەي, ىشكى ىستەر ورگاندارىنىڭ قىزمەتكەرلەرى ەل ازاماتتارىنىڭ كونستيتۋتسيالىق قۇقىقتارى مەن بوستاندىقتارىن قورعاۋ باعىتىندا ەلەۋلى جۇمىستار اتقارۋدا. وزدەرىنىڭ قىزمەتتىك مىندەتتەرىن ورىنداۋ كەزىندە ولاردىڭ باستارىن قاۋىپ-قاتەرگە تىگىپ جاتاتىنى دا اقيقات. بۇگىن اشىلىپ وتىرعان ەسكەرتكىش وسى قازا تاپقان قىزمەتكەرلەردىڭ رۋحىنا تاعزىم ىسپەتتەس بولىپ وتىر.
ەسكەرتكىشتىڭ بيىكتىگى شامامەن 4 مەتردى قۇرايدى. ونىڭ ەكى قاناتىندا قىزمەتتىك مىندەتتەرىن اتقارۋ كەزىندە وپات بولعان كولىكتەگى ىشكى ىستەر ورگاندارى قىزمەتكەرلەرىنىڭ اتى-جوندەرى التىن ارىپتەرمەن قاشالىپ جازىلىپ, ۇشار باسىندا ىشكى ىستەر ورگاندارىنىڭ ارنايى تاڭباسى بەينەلەنگەن.
ءىىم كولىكتەگى ىشكى ىستەر دەپارتامەنتى ارداگەرلەر كەڭەسىنىڭ توراعاسى, وتستاۆكاداعى پولكوۆنيك بوريس كوروشكەۆيچ ايتىپ وتكەندەي, كولىكتەگى ىشكى ىستەر ورگاندارىنىڭ قىزمەتكەرلەرى وزدەرىنىڭ قىزمەتتىك مىندەتتەرىن اتقارۋعا ارقاشان زور جاۋاپكەرشىلىكپەن قارايدى. سوناۋ جىلدارى دا, قازىرگى كۇنى دە كولىكتەگى پوليتسەيلەر حالىق الدىندا بەرگەن انتىن بەرىك ۇستانىپ, پوليتسيا اتىنا داق تۇسىرمەۋگە تىرىسىپ كەلەدى.
كولىكتەگى ىشكى ىستەر دەپارتامەنتى جانىنداعى قوعامدىق كەڭەس مۇشەسى, «Solutio» زاڭگەرلىك فيرماسىنىڭ باسقارۋشى ديرەكتورى ەۆگەني سەيپۋلنيك ءوز سوزىندە بۇل سەكىلدى ەسكەرتكىشتى اشۋ يدەياسى ەرتە تۋىنداعانىن, قارجى پروبلەماسىنا وراي, ونى شەشۋگە مۇمكىندىك بولماعانىن اتاپ ءوتتى. وسى ءىستى نازارعا العان ءىىم كولىكتەگى ىشكى ىستەر دەپارتامەنتىنىڭ باستىعى, پوليتسيا گەنەرال-مايورى قانات توقسەيىتوۆتىڭ ۇسىنىسىمەن, ەسكەرتكىشتى اشۋعا قاجەتتى قارجىنى رەسپۋبليكا اۋماعىنداعى كولىك پوليتسەيلەرى جيناپ بەرەدى. جەتپەگەن اقشانى دەپارتامەنت باسشىلىعى بولگەن. وسىنىڭ ارقاسىندا ەسكەرتكىش بوي كوتەرىپ وتىر, دەپ حابارلادى كولىكتەگى ءىىد ءباسپاسوز قىزمەتى.