ءبىزدىڭ ەلتاڭبامىز 1992 جىلى رەسمي تۇردە بەكىتىلدى. ول كەزدە گەرب جوبالارىن تالقىلاۋعا ارنالعان مەملەكەتتىك كوميسسيا جۇمىس ىستەگەن ەدى. ونىڭ توراعاسى جاقىندا عانا ارامىزدان كەتكەن اكادەميك سالىق زيمانوۆ بولاتىن. وسى كوميسسيا مەنىڭ جاساعان ەلتاڭبانىڭ نۇسقاسىن 1992 جىلعى 4 ماۋسىم كۇنى جوعارعى كەڭەستىڭ ءحىى سەسسياسىندا دەپۋتاتتاردىڭ قاراۋىنا جىبەردى. شىنى كەرەك, ەلتاڭبانى جاساۋ ءۇشىن كوپ ۋاقىت كەتتى. ءبىر ايداي ۋاقىت كەتكەن شىعار. ونى جاساۋ ءۇشىن ەلىمىزدىڭ تاريحىن, ءداستۇرىن زەرتتەدىم. ءبىزدىڭ مادەنيەتىمىزدىڭ ءوزى تەرەڭ عوي. ساق داۋىرىنەن كەيىن كيىز ءۇيدىڭ تاريحىنىڭ ءوزى ءۇش مىڭ جىلعا كەتەدى. ەلتاڭبانى جاساۋ ءۇشىن تاريحتى جان-جاقتى زەرتتەپ, كوشپەلى حالقىمىزدىڭ مادەنيەتى مەن ەلىمىزدىڭ قازىرگى ءوز تاۋەلسىزدىگىن الىپ, قايتا وتاۋ تىككەنگە دەيىنگى ارالىقتا قامتۋعا تىرىستىم. ەلتاڭباعا شاڭىراق, كەرەگە, بوساعا, تۇلپارلار سياقتى حالقىمىزدىڭ باسقا دا قاسيەتتى دۇنيەلەرىن ورنالاستىرۋدى ءجون كوردىم. ءسويتىپ, ەلتاڭبانى جاساپ بولعان سوڭ, ونى شىمكەنتتەن جۇك كولىگىنە تيەپ الماتىعا اكەلدىم. ديامەترى 2 مەتر بولىپ شىقتى. سەسسيادا جوبانى تالقىلانعاننان كەيىن ول ءىلىنىپ قويىلاتىن بولدى. بىراق سەسسيا كەزىندە ءبىراز تارتىس بولىپ, دەپۋتاتتار جۇلدىزعا, قوشقار مۇيىزگە قارسى شىعىپ, بۇل جۇلدىز كەڭەس وداعىنىڭ بەلگىسى ەمەس پە دەگەن ۋاجدەرىن ايتتى. سوندا ەلباسىنىڭ تەرەڭ ويلايتىنى عوي, نۇرسۇلتان ءابىش ۇلى: «جۇلدىز – كسرو-نىڭ بەلگىسى ەمەس, ونىڭ دىنگە ەشقانداي قاتىسى جوق. ءار ادامنىڭ, ءار ەلدىڭ ءوزىنىڭ جۇلدىزى بولادى. ءبىزدىڭ جاس مەملەكەتىمىزدىڭ جۇلدىزى جارقىراپ ءجۇرسىن», دەگەن تىلەگىن ايتىپ دەپۋتاتتاردى ەلتاڭبانى قابىلداۋعا شاقىردى.
جالپى, كونكۋرسقا رەسمي تۇردە 245 جۇمىس ۇسىنىلعان بولاتىن. سونىڭ ىشىندە قازىرگى ەلتاڭبامىز قابىلداندى. گەرب جاقسى شىقتى دەپ ويلايمىن. بارلىق جەردە جىلى سوزدەر ەستىپ جاتامىن. ال شەت ەلدە ءبىزدىڭ تۋىمىز بەن ەلتاڭبامىزعا جۇرتشىلىقتىڭ سۇيسىنە قارايتىنىن ۇنەمى بايقاپ ءجۇرەمىن.
جانداربەك مالىبەك ۇلى, ساۋلەتشى.