مەملەكەت باسشىسىنىڭ اتىنا وڭتۇستىك قازاقستان وبلىسى, تولە بي اۋدانىنىڭ ءبىر توپ جاستارىنان حات كەلدى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
حات يەلەرى ەلباسى باستاماسىمەن ءجۇزەگە اسقان «بولاشاق», «ديپلوممەن – اۋىلعا», «جۇمىسپەن قامتۋ-2020» مەملەكەتتىك باعدارلامالارى ناتيجەسىندە جاستار شەت ەلدەردە ءبىلىم الىپ قانا قويماي, وقۋ ءبىتىرىپ كەلگەن جاس مامانداردىڭ جۇمىسقا ورنالاسۋىنا مۇمكىندىكتەر جاسالىپ وتىرعانىنا ريزاشىلىقتارىن ءبىلدىرگەن.
ودان ءارى: «ءسىزدىڭ كوشباسشىلىعىڭىزبەن ەلىمىز نەبارى 20 جىلدا دۇنيە ءجۇزى ەلدەرىمەن تەرەزەسى تەڭ, قۋاتتى مەملەكەتكە اينالدى. قازاقستان – بۇگىندە بەرەكە-بىرلىكتىڭ كيەلى مەكەنى. تۋعان ەلدىڭ تولاعاي تابىستارى ءبىزدى زور ماقتانىش سەزىمگە بولەيدى. وڭىرلەردە جاستارعا بارلىق قامقورلىق جاسالۋدا. جەكە كاسىبىن قۇرعاندارعا جاڭا مۇمكىندىكتەر اشىلدى. مەملەكەتتىڭ كەلەشەگى – جاستار. ءسىزدىڭ ارتقان سەنىمىڭىزدى, ۇكىلەگەن ءۇمىتىڭىزدى اقتايمىز دەگەن سەنىمدەمىز», دەپ جازادى حات يەلەرى.
ەلباسىنا دەگەن ىقىلاستى سەزىمدەرىن بىلدىرگەن حاتقا ش.قالداياقوۆ اتىنداعى حالىقارالىق بايقاۋدىڭ ديپلومانتى ماديار نيازبەك, وبلىستىق بايقاۋدىڭ جۇلدەگەرى بوتاگوز دوساليەۆا, سامبودان ەكى دۇركىن ازيا چەمپيونى ولجا رىسبەكتەگى, بوكستان ەكى دۇركىن ازيا چەمپيونى قايىرگەلدى داۋىتبەك جانە «شامشىراق» جاستار ۇيىمىنىڭ مۇشەسى اسقاربەك اليقۇلوۆ قول قويعان.