كەزدەسۋ بارىسىندا كارىم ءماسىموۆ جانە نيكولاي ازاروۆ قازاقستان جانە ۋكراينا اراسىنداعى ەكونوميكالىق قارىم-قاتىناستى نىعايتۋ قاجەتتىلىگىن اتاپ ايتتى. «ارامىزدا قالىپتاسقان قارىم-قاتىناستار ەكى ەلدىڭ العا قاراي دامي ءتۇسۋى ءۇشىن, ازاماتتارىمىزدىڭ باقۋاتتى تىرشىلىك ەتۋى ءۇشىن بىزگە اشىق جانە ءادىل اڭگىمە ايتۋعا, بارلىق ماسەلەلەر بويىنشا شەشىمدەر تابۋعا ءمۇمكىندىك بەرۋدە», – دەدى ك.ءماسىموۆ ءوزىنىڭ ۋكراينالىق ارىپتەسىمەن بولعان كەزدەسۋدە. «الەمدە قالىپتاسىپ وتىرعان بۇگىنگى جاعداي سارابدال باعىتتى تالاپ ەتەدى. مەنىڭ ويىمشا, ءبىزدىڭ ىنتىماقتاستىعىمىز كوپتەگەن ەلدەردىڭ ەكونوميكاسىندا قازىر بايقالىپ وتىرعان تاۋەكەلدەردى ازايتۋعا مۇمكىندىك بەرەدى», – دەدى ءوز كەزەگىندە قازاقستاندى الەۋمەتتىك-ەكونوميكالىق دامۋداعى جاقسى جەتىستىكتەرىمەن قۇتتىقتاي وتىرىپ ۋكراينا ۇكىمەتىنىڭ باسشىسى ن.ازاروۆ.
«2011 جىلى ۋكراينا مەن قازاقستاننىڭ ءىس-قيمىلدار جوسپارىنىڭ – ءبىزدىڭ ساۋدا-ەكونوميكالىق قارىم-قاتىناستارىمىزدىڭ كورسەتكىشتەرىن ارتتىرۋعا سەپ بولعان قۇجاتتىڭ مەرزىمى اياقتالدى. ەندى 2012-2013 جىلدارعا ارنالعان ءىس-قيمىلدار جوسپارىن جاساۋ كەرەك دەپ ويلايمىن», – دەپ اتاپ ءوتتى ن.ازاروۆ. كەلىسسوز اياقتالعاننان كەيىن كارىم ءماسىموۆ پەن نيكولاي ازاروۆ قازاقستان جانە ۋكراينا ىشكى ىستەر مينيسترلىكتەرىنىڭ اراسىنداعى ىنتىماقتاستىق تۋرالى كەلىسىمگە قول قويۋ راسىمىنە قاتىستى.
ودان كەيىن جۋرناليستەرمەن وتكەن بريفينگتە ۇكىمەت باسشىلارى ەكىجاقتى كەلىسسوزدەردىڭ قورىتىندىسىن شىعاردى.
قازاقستان ۇكىمەتى باسشىسىنىڭ ايتۋىنشا, ۋكراينالىق ءارىپتەستەرمەن اڭگىمە بەيرەسمي جانە وتە ناقتى مازمۇندا ءوتىپ, ەكىجاقتى ىنتىماقتاستىقتىڭ اۋقىمدى ماسەلەلەرى تياناقتى تالقىلانعان. اتاپ ايتقاندا, عارىش سالاسىنداعى ءوزارا ءىس-قيمىل ماسەلەسى ءسوز بولدى. ك.ءماسىموۆتىڭ پىكىرىنشە, «بۇل سالادا تابىستى ىنتىماقتاستىققا مۇمكىندىك مول». ۋكراينامەن اتوم ەنەرگەتيكاسى سالاسىنداعى ىنتىماقتاستىق تاقىرىبى دا نازاردان تىس قالعان جوق. «بۇل سالادا ۋكراينانىڭ ءتاجىريبەسى زور», – دەپ اتاپ كورسەتتى پرەمەر-مينيستر. بۇدان وزگە كارىم ءماسىموۆ ۋكراينالىق كاسىپورىنداردى قازاقستاننىڭ يندۋستريالاندىرۋ باعدارلاماسىنا اتسالىسۋعا شاقىردى.
«قازاقستان ءبىزدىڭ رەسەي فەدەراتسياسىنان كەيىنگى ءىرى ساۋدا-ەكونوميكالىق سەرىكتەسىمىز. بۇعان ەكى ەلدىڭ پرەزيدەنتتەرىنىڭ, ۇكىمەتتەرىنىڭ ءبىزدىڭ ىنتىماقتاستىعىمىزعا ۇلكەن كوڭىل بولۋىنەن كەيىن قول جەتكىزىلدى», – دەپ ءمالىمدەگەن نيكولاي ازاروۆ قازاقستاننىڭ يندۋستريالاندىرۋ باعدارلاماسىنا وزدەرىنىڭ قاتىسۋعا دايىن ەكەندىكتەرىن جەتكىزدى.
كەلىسسوزدەر بارىسىندا قول جەتكىزىلگەن بارلىق كەلىسىمدەر 2012-2013 جىلدارعا ارنالعان ءىس-قيمىلدار جوسپارىن نەمەسە 4-جول كارتاسىن ازىرلەۋگە نەگىز بولادى. تاراپتار ولاردىڭ اتقارىلۋ بارىسىن ۇكىمەتارالىق كوميسسيا تەتىگى ارقىلى باقىلاۋعا كەلىستى.
تۇستەن كەيىن ەكى ەلدىڭ پرەمەر-مينيسترلەرى قازاقستان-ۋكراين بيزنەس-فورۋمىنىڭ اشىلۋىنا قاتىستى. پرەمەر-مينيستر كارىم ءماسىموۆ ۋكراينالىق كاسىپكەرلەردى قازاقستانعا جۇمىس ىستەۋگە شاقىردى. مەنىڭشە ەگەر ۋكراينالىق كومپانيالار قازاقستان اۋماعىندا جۇمىس ىستەۋگە نيەت بىلدىرسە, ءبىز ارينە, ءسىزدەردىڭ كەلۋلەرىڭىزگە قۋانىشتى بولامىز», – دەدى استانادا وتكەن قازاقستاندىق-ۋكراينالىق بيزنەس-فورۋمدا ۋكراينالىق كومپانيالاردىڭ وكىلدەرىنە ارناعان سوزىندە ك.ءماسىموۆ. پرەمەر قازىرگى ۋاقىتتا رەسپۋبليكادا بيزنەستى قولداۋ بويىنشا بىرقاتار باعدارلامالار جۇزەگە اسىرىلۋدا ەكەندىگىن دە ەسكە سالدى. اتاپ ايتقاندا, بىرقاتار جەڭىلدىكتەر قاراستىرىلعان «بيزنەستىڭ جول كارتاسى» ارەكەت ەتۋدە.
2010 جىلدىڭ قورىتىندىسى بويىنشا قازاقستان مەن ۋكراينانىڭ اراسىنداعى ساۋدا اينالىمى 2,066 ملرد. اقش دوللارىن قۇرادى. 2011 جىلدىڭ 8 ايىندا قازاقستان مەن ۋكراينانىڭ اراسىنداعى سىرتقى ساۋدا اينالىمى 2,9 ملرد. دوللارعا جەتتى جانە 2010 جىلدىڭ سايكەس كەزەڭىمەن سالىستىرعاندا 1,5 ەسەگە ارتتى. ۋكرايناعا قازاقستاندىق ونىمدەردىڭ ەكسپورتى 1,8 ملرد. دوللاردى قۇراپ, 2010 جىلمەن سالىستىرعاندا 4 ەسەگە كوبەيگەنى بايقالدى. ال ۋكراينادان قازاقستانعا يمپورتتالعان تاۋارلار كولەمى 1,1 ملرد. دوللارعا جەتىپ, 2010 جىلدىڭ سايكەس كەزەڭىمەن سالىستىرعاندا 30 پايىزعا ارتقان.
قانات ەسكەندىر.